Polisi Mbeya waua majambazi wawili

Venance Matinya, Mbeya

JESHI la polisi mkoani Mbeya limewaua watu wawili wanaosadikiwa kuwa majambazi katika mapambano ya kurushiana risasi. Katika tukio hilo, jambazi mmoja alifanikiwa kuwakimbia polisi hao.

Kamanda wa polisi mkoa wa Mbeya, Dhahiri Kidavashari amethibitisha hilo na kueleza kuwa lilitokea juzi saa moja na dakika 45 jioni katika Kijiji cha Busisya, Kata ya Kisiba, Wilaya ya Rungwe.

  

Alisema  Askari Polisi wa Mkoa wa Mbeya kwa kushirikiana na Askari Polisi Wilaya ya Rungwe kwa walipata taarifa za siri za kuwepo kwa majambazi wenye silaha ambao walikuwa na lengo la kufanya uvamizi katika duka la mfanyabiashara wa soda na bia za jumla ambaye pia ni wakala wa M-Pesa.

Alisema baada ya taarifa hiyo kupatikana, askari Polisi wa Mbeya na wale wa Wilaya ya Rungwe walianza kuwafuatilia majambazi hao na muda wa saa 19:45 jioni katika barabara ya Tukuyu – Mbambo, askari walikutana na majambazi hao wakiwa wamepakiana katika pikipiki aina ya T- Better ambayo haina namba ya usajili yenye rangi nyekundu.

Alisema baada ya majambazi hao kugundua kuwa wanafuatiliwa na askari, walianza kuwarushia risasi askari hao na ndipo yalipotokea majibizano ya risasi kati ya askari na majambazi hao.

Alisema katika tukio hilo bunduki tatu na risasi tisa zilizokuwa zinatumiwa na majambajhi hao zilipatikana.

Alizitaja silaha hizo kuwa bunduki aina ya Mark IV yenye namba 38482 na risasi mbili, Short Gun Greener yenye namba G.73878 na risasi 1 na Gobole lililotengenezwa kienyeji ambalo halina namba na risasi 6. 

Aliongeza kuwa baada ya kupekuliwa majambazi hao walikutwa pia na vitu vingine ambavyo ni rungu moja, praizi moja, bisibisi moja, mafuta ya cherehani, koti la ngozi rangi ya brown na begi dogo rangi nyeusi ambalo lilitumika kuhifadhi vitu hivyo. 

Kamanda Kidavashari alisema kuwa miili ya marehemu imehifadhiwa katika Hospitali ya Serikali Makandana iliyoko wilayani Rungwe kwa uchunguzi wa kitabibu na kutambuliwa na ndugu zao.

Alisema msako unaendelea na kwamba katika tukio hilo hakuna mali iliyoporwa wala askari kupata madhara, lakini jitihada za kumtafuta jambazi aliyekimbia bado zinaendelea.

Share on Google Plus

About Unknown