Askofu amtaka ‘Mzee wa Upako’ aombe radhi

Edith Msuya

Askofu William Mwamalang

MWENYEKITI wa Kamati ya Taifa ya Maaskofu na Mashekhe, Askofu William Mwamalanga, amemtaka Mchungaji wa Kanisa la Maombezi (GRC), Anthony Lusekelo kutoka hadharani na kuomba radhi waandishi wa habari.

Kauli hiyo imekuja siku chache baada ya Mchungaji Lusekelo 'Mzee wa Upako', kusema kuwa waandishi wote walioandika habari za kumchafua watakufa kabla ya Machi.

Akizungumza jana Dar es Salaam, Mwamalanga alisema kauli hiyo si nzuri na imekosa maadili kwa kiongozi wa dini kama yeye.

Alisema hakuna dini duniani inayoruhusu kumtishia binadamu, kwani hata Mungu katika maandiko yake ya Korani au Biblia anaeleza kuwa ni wa huruma na anahurumia watu wake.

Alisema ni vema Lusekelo akamrudia Mungu wake kwa kutubu kwani hakuna mtu anayeweza kujilinganisha na Mungu.

"Alichokifanya Lusekelo ni kinyume cha maadili, kwani hata Mungu anahurumia watu wake, hivyo ni vema akatoka hadharani na kuomba radhi waandishi na Watanzania kwa jumla," alisema.

Aliongeza kuwa alichokifanya Mchungaji huyo ni kosa la jinai, kwani si vema kutishia mtu maisha kwani hakuna binadamu mwenye mamlaka hayo duniani.

"Kwa sababu walichoandika waandishi wa habari alikifanya mwenyewe na hajasingiziwa kama anavyodai," alisema.

Mwamalanga alisema mbali na yote hayo, Mchungaji huyo amemdhalilisha Rais John Magufuli kwani alimheshimu na kufika kwenye Kanisa lake na kuzungumza naye na kumwonesha heshima ya juu.

Share on Google Plus

About Unknown