UWT Iringa wampongeza JPM

Francis Godwin, Iringa 

Dk. John Magufuli

BARAZA  Kuu  la  Umoja  wa Wanawake  Mkoa  wa Iringa limetoa tamko kumpongeza Rais John Magufuli kwa kutimiza mwaka  mmoja madarakani.

Aidha, limempongeza pia Mwenyekiti wa Chama  Cha Mapinduzi (CCM)  wa mkoa huo, Jesca Msambatavangu kwa  kuwa  kiongozi  wa mfano ndani na nje ya  Iringa, huku wakimwomba  kugombea  tena nafasi  hiyo katika uchaguzi mwakani 2017 .

Mwenyekiti wa  UWT wilaya ya  Mufindi Marcelina  Mkini ambaye  pia ni Mjumbe wa Halmashauri  Kuu ya CCM Taifa (Nec), alisema  kuwa  ushindi ambao CCM iliupata katika  uchaguzi mkuu mwaka jana  ulitokana pamoja na mambo mengine, kazi  nzuri  iliyofanywa na Msambatavangu.

Alisema  mkoa  wa Iringa kwenye  uchaguzi huo  ulifanya  vizuri kwa kushinda  majimbo sita kati ya saba  na kuwa  pamoja na kila  mmoja  kushiriki katika  kupigania ushindi  huo wa chama, wanawake  hawanabudi  kumpongeza mwanamke mwenzao ambaye ndiye mwenyekiti wa chama  mkoa

''Naomba  kuchukua nafasi hii kwa niaba ya  wanawake  wenzangu  kukupongeza  sana mwenyekiti  wetu wa CCM mkoa Jesca Msambatavangu. Umeonyesha  mfano  mzuri kuwa unaweza kuongoza .......nakumbuka  wakati wa kampeni  wewe  ulisimama  kidete   kuhakikisha  chama kinashinda  kwa  kishindo  mbali ya figisu figisu zilizokuwa zikielekezwa kwao  ila hukuteteleka ''

Mbali na mwenyekiti  huyo kufanya  vema katika  kampeni  za 2015, bado aliendelea kuitumikia jamii ya  mkoa wa Iringa. “Mwenyekiti   wetu  anafanya kazi  vizuri  ndani ya  mkoa  wetu  tena  pasipo ubaguzi wowote  na ni mtetezi  mzuri  sana kwa  wanawake  ndani ya  mkoa na hanaga unafiki kabisa  kwani  yeye  siku  zote  husema  kweli  tupu ''

Mkini  alisema   kuwa   kutokana na  utendaji  kazi wake mzuri  ndani ya  chama  wao  wanaona  bado  mwenyekiti huyo ana uwezo  wa  kuwavusha wana CCM kwa miaka  mingine mitano ijayo,  hivyo  kumshawishi  kuingia tena ulingoni  mwakani 2017 katika  uchaguzi  mkuu wa  viongozi ngazi mbali mbali za  chama .

Mwenyekiti  wa UWT  mkoa  wa  Iringa Zainab Mwamwindi akisoma tamko la  UWT  mkoa  wa Iringa kwa ajili ya kumpongeza Rais Dkt  Magufuli  alisema  kuwa   wao kama  wanawake wa CCM  wameendelea   kufurahishwa na utendaji kazi wa Rais Dkt Magufuli na  kuwa  kubwa  zaidi  ni jinsi  Rais alivyoweza  kujibu maswali ya  watanzania  kupitia   mkutano wake  wahariri  wa  vyombo   mbali mbali  vya habari  hapa nchini.

Msambatavangu  alisema atahakikisha pongezi za  wanawake hao zinamfikia Rais Dkt Magufuli  huku  akiwasisitiza  wanawake  kuendelea  kuongoza  nafasi zao kwa kujiamini.

Alisema  wakati  chama kinajiandaa kwa  chaguzi zake mwakani ni vizuri  wanawake  kuanza  kujipima ama  kuwapima  wale ambao wanaingia kuwania nafasi mbalimbali ili  kupata  viongozi wenye  uwezo wa kuwatumikia  wananchi.

Share on Google Plus

About Unknown