Wasomi wasifu uchapakazi wa Muhongo

Hussein Ndubikile

Profesa Sospeter Muhongo

WASOMI nchini wamesifu utendaji kazi wa  mwaka mmoja wa Waziri wa Nishati na Madini, Profesa Sospeter Muhongo kuwa amejaribu kuendana na kasi ya Serikali katika usambazaji umeme vijijini, upatikanaji wa umeme na kupunguza gharama.

Akizungumza na JAMBO LEO jana, Mhadhiri wa Sayansi ya Siasa na Utawala Bora wa Chuo Kikuu cha Dar es Salaam, Richard Mbunda alisema katika kipindi hicho, Waziri Muhongo ameonesha wazi kujali wananchi.

Alisema Waziri amefanya kazi kubwa ya kusaidia kupunguza makato ya umeme yaliyokuwa yakiumiza wananchi na kasi ya usambazaji umeme kupitia Wakala wa Umeme Vijijini (REA).

"Ameonesha wazi ni kiongozi anayejali wananchi wake kwa kuwapunguzia ukali wa makato ya umeme na hata usambazaji umeme vijijini kasi yake inaridhisha," alisema.

Alisisitiza kuwa Waziri Muhongo amefanya kazi ya kujali maslahi ya wananchi kwa kuzuia upandishaji bei ya umeme nchini na amefanikiwa kuondoa utata uliokuwapo katika kashfa ya Akaunti ya Tegeta Escrow.

Aliyekuwa Mjumbe wa Bunge la Mabadiliko ya Katiba, Profesa Mwesiga Baregu alisema Waziri huyo ameboresha vyanzo vya uzalishaji nishati hiyo ikiwamo mitambo ya kuzalisha umeme ya Kinyerezi I na II Dar es Salaam hali ambayo imeimarisha upatikanaji umeme.

Alimshauri Profesa Muhongo kuendelea kukuza vyanzo hivyo, ili tatizo la kukatika umeme liwe historia.

Mhadhiri wa Chuo Kikuu Huria (OUT), Hamad Salim alisema ni miongoni wa viongozi wanaoendana na kasi ya Rais John Magufuli katika utekelezaji wa ahadi likiwamo suala la uunganishiaji umeme kwa wananchi wa vijijini.

Share on Google Plus

About Unknown