Mrema amchongea Mkuu wa Magereza kwa Waziri Mkuu

Edith Msuya

Augustine Mrema

MWENYEKITI wa Bodi ya Taifa ya Msamaha kwa Wafungwa (Parole), Agustino Mrema, amemuandikia barua Waziri Mkuu, Kasim Majaliwa kumuomba aamuaru Jeshi la Magereza, liruhusu upunguzaji wa   wafungwa magerezani kwa mujibu wa sheria za nchi.

Amesema hayo jana alipozungumza na waandishi wa habari kuhusu hatua ya Mkuu wa Magereza wa Mkoa wa Dodoma, Antonin Kilumbi (SACP), kusitisha upunguzaji huo wa wafungwa, baada ya kupata maagizo kutoka kwa viongozi wa juu, huku akinukuu baadhi ya aya za barua hiyo.

"Utaratibu huu wa kupunguza wafungwa magerezani, umefanyika baada ya wewe Waziri Mkuu kuniagiza wakati ulipokabidhiwa taarifa kutoka kwa Mkuu wa Magereza mkoani Dodoma, ulipotembelea Gereza Kuu la Isanga Oktoba 5 mwaka huu na kuambiwa kuna wafungwa wengi katika magereza.

"Uliniagiza nifuatilie na kutatua tatizo hilo la msongamano wa wafungwa kwenye magereza ya Mkoa wa Dodoma," alisema Mrema akinukuu barua hiyo mbelea ya waandishi wa habari.

Mrema ambaye aliambatanisha baadhi ya risiti za malipo ya faini za wafungwa katika barua hiyo, alisema baada ya agizo hilo la Waziri Mkuu, alianza kutafuta wadhamini wa kulipia wafungwa walio magerezani baada ya kushindwa kulipa faini.

Mmoja wa wafadhili hao kwa mujibu wa Mrema ni Mchungaji Getrude Lwakatare wa Kanisa la Assembilies of God 'Mlima wa Moto', ambaye alikubali kutoa Sh milioni 12.84.

Alisema fedha hizo zingeweza kuwatoa wafungwa 43 walio katika magereza ya mkoa huo baada ya kushindwa kulipa faini, hivyo kupunguza msongamano katika magereza hayo yenye uwezo wa kuhifadhi wafungwa 1,552, lakini yamelazimika kutunza wafungwa 1,795.

"Waziri Mkuu tunaamini kwamba kitendo hicho ni kinyume cha utawala wa sheria na ni ukiukwaji wa amri za mahakama, ambazo zilieleza wazi kwamba endapo washitakiwa watalipa au kulipiwa faini waachiwe huru," alisema.

Mwenyekiti huyo alisema bado hawajapatiwa sababu za maandishi kwa nini wafungwa waliolipiwa faini wasiachiwe, isipokuwa amesoma kwenye magazeti kwamba upunguzaji huo wa wafungwa umesitishwa.

Mrema alisema kupungua kwa wafungwa katika magereza, kunasaidia wafungwa kuondokana na magonjwa ya mlipuko, wafungwa wanawake wanyonyeshe na wazee na wagonjwa na kubana bajeti.

"Lengo letu si kuwatoa majambazi, majangili na wauza dawa za kulevya na si kama watu wanavyosema kwamba sisi tunatoa majambazi," alisema.

Share on Google Plus

About Unknown