Wakuu wa mikoa saba hatarini kutumbuliwa

*Wapewa muda hadi Januari kukamilisha

*Vinginevyo watakuwa wameshindwa kasi 

Mwandishi Wetu

WAKUU wa mikoa saba wamo hatarini ‘kutumbuliwa’ kutokana na kushindwa kutimiza agizo la Rais John Magufuli la kukamilisha utengenezaji madawati kwa wakati.

Akiitaja mikoa hiyo, wakati akipokea madawati 3,500 yaliyotolewa na benki ya NMB, Waziri wa Nchi Ofisi ya Rais (Tamisemi), George Simbachawene alisema mikoa hiyo ni Geita ambao unadaiwa madawati 83,975 (68,306 kwa shule za msingi, na sekondari ni 15,669).

Mikoa mingine ni Mara unaodaiwa madawati 15,843 kwa shule za msingi, wakati za sekondari ni 1,135; Dodoma (msingi ni 10,592, sekondari 4,281), Rukwa (msingi 9,634, sekondari 1,340) na Simiyu (msingi ni 10,209 na sekondari ni 647).

Wakati mikoa hiyo ikidaiwa madawati kwa shule za msingi na sekondari, mikoa mingine inayodaiwa madawati kwa ajili ya shule za msingi pekee ni Mwanza (41,438) na Kigoma ambao wanadaiwa madawati 31,171.

“Leo (jana) ninapokea madawati haya 3,500 kutoka NMB ikiwa ni mpango mkakati wao wa kusaidia kutatua upungufu wa madawati nchini, huku kukiwa na mikoa hiyo ambayo bado haijakamilisha. Ninatoa hadi Januari mwakani wawe tayari wamekamilisha.

“Endapo watakuwa wameshindwa kukamilisha hadi muda huo, itakuwa wameshindwa kuendana na kasi itakiwayo. Lakini naamini kuwa watakamilisha na ninatarajia kuwa kila mhusika atasimamia ipasavyo ukamilishaji huo,” alisema Simbachawene.

Akizungumzia madawati hayo ya NMB, Simbachawene alisema kwa namna ya pekee, Serikali inaishukuru benki hiyo kwani imekuwa mstari wa mbele kuchangia madawati ikiwa ni mpango mkakati wao wa kutatua changamoto hiyo.

“Kwa niaba ya Serikali, naishukuru NMB kwani imekuwa mstari wa mbele kuisaidia Serikali kuondokana na upungufu wa madawati nchini. Kupitia mpango wao wa CSR, benki iliahidi kutoa Sh bilioni 1.5 kwa ajili ya madawati na ndiyo kama haya ninayopokea,” alisema Simbachawene.

Mtendaji Mkuu wa NMB, Ineke Bussemaker alisema utoaji wa madawati hayo ni utimizaji ahadi yao kwa Serikali ya kuchangia madawati yenye thamani ya Sh bilioni 1.5.

“Kupitia mpango wetu wa CSR, tulilenga kutoa madawati yenye thamani ya Sh bilioni 1.5 na kwa mwaka huu, tumeshatoa madawati 10,000 yenye thamani ya Sh milioni 900. Madawati mengine yenye thamani ya sh milioni 600 itatolewa mapema mwakani,” alisema Bussemaker.

Share on Google Plus

About Unknown