Miradi ya umeme Nzega kuendelezwa

Joyce Kasiki, Dodoma

Hussein Bashe

SERIKALI imesema inaendelea kutekeleza miradi ya kufikisha umeme katika maeneo yote ya vijijini ikiwa ni pamoja na katika vijiji vya Nzega Mjini.

Kauli hiyo ilitolewa jana bungeni na Naibu Waziri wa Nishati na Madini Medard Kalemani alipokuwa akijibu swali la Nyongeza la Mbunge wa Nzega Mjini Husein Bashe (CCM).

Katika swali lake Bashe (pichani) alitaka kujua ni lini Serikali itapeleka umeme wa REA awamu ya tatu katika jimbo hilo.

“Naomba kujua ni lini Serikali itapaeleka umeme katika vijiji vya Mwanzole, Bulunde na Kashishi,” alihoji Bashe Akijibu Kalemani alisema, Serikali inaendelea kutekeleza miradi ya kufikisha umeme katika maeneo yote ya vijijini nchini ikiwemo katika Jimbo la Nzega Mjini kupitia mradi wa REA awamu ya tatu.

Awali akijibu swali la msingi la Mbunge wa Mufindi Kusini (CCM) Mendrad Kigola ambaye alitaka kujua ni lini Serikali itapeleka umeme katika Kata za Idete,Idunda,Kiyowelo, Maduma na Mtambula ili wananchi waweze kufaidika na huduma hiyo.

Akijibu Kalemani alisema, Serikali inaendelea kutekeleza miradi yakufikisha umeme katika maeneo yote nchini ikiwa ni pamoja na vijiji vya Mufindi Kusini.

Kalemani alisema vijiji vya Kata ya Idete, Idunda, Kiyowela, Maduma na Mtambula vitapatiwa umeme kupitia mradi wa REA awamu ya tatu.

Alisema kazi ya kupeleka umeme kwenye vijiji hivyo pamoja na katika Wilaya ya Mufindi itahusisha ujenzi wa njia ya njia ya umeme, msonga wa kilovoti 0.4 yenye urefu wa Kilomita 81, ufungaji wa trasfoma 24 pamoja na kuwaunganishia umeme wateja wa awali 3,533.

Share on Google Plus

About Unknown