Watatu ‘watumbuliwa’ Nyasa

Julius Konala, Nyasa

Simbachawene

BARAZA la Madiwani la Halmashauri ya Wilaya limewafukuza kazi watumishi watatu wa halmashauri ya  hiyo kutokana na makosa mbalimbali yakiwamo ya utoro kwenye vituo vyao vya kazi.

Uamuzi huo ulifikiwa jana kupitia kikao cha Baraza la Madiwani chini ya Mwenyekiti wake, Alto Komba na kuhudhuriwa na watendaji wa Halmashauri hiyo.

Komba alitaja watumishi waliosimamishwa kuwa ni John Chota, Fundi Sanifu wa Maabara Daraja la Pili, Dk Emmanuel Nkumbi na Geofrey Kayombo, Mhasibu Daraja la Kwanza.

Aidha, madiwani hao walimpongeza Mkurugenzi Mtendaji wa Halmashauri ya Nyasa, Dk Oscar Mbyuzi kwa hatua na jitihada anazofanya kuhakikisha anainua uchumi wa Halmashauri hiyo kimapato na kuwa mstari wa mbele kusimamia makusanyo ya ushuru na kuziba mianya ya ufujaji wa fedha za Serikali.

Walisema katika kipindi kifupi tangu ateuliwe na Rais John Magufuli kuwa Mkurugenzi, amekuwa mstari wa mbele kuhakikisha anainua uchumi wa Halmashauri kwa kutumia fursa mbalimbali zilizopo wilayani humo.

Waliiomba Halmashauri hiyo kuhakikisha inakamilisha ujenzi wa miradi yote viporo kabla ya kuanza mipya kwa lengo la kuunga mkono nguvu za wananchi ambao wamekuwa mstari wa mbele kujitolea kwenye maendeleo.

Share on Google Plus

About Unknown