Polisi Dar yaanza msako wa mashoga

Sharifa Marira

Dk Hamis Kigwangalla

JESHI la Polisi Kanda Maalumu ya Dar es Salaam linawasaka wanaume wanaodaiwa kufanya mapenzi kinyume cha maumbile au ‘mashoga’ na kujitangaza kwenye mitandao ya kijamii.

Hao ni wale ambao walitakiwa kuripoti kituoni hapo na Naibu Waziri wa Afya, Maendeleo ya Jamii, Jinsia, Wazee na Watoto, Dk Hamis Kigwangalla, lakini hawakutii.

Washukiwa hao waliotajwa majina yao juzi na Kigwangalla  ni James Charles ‘James Delicious’, Godfrey Majunga ‘Kaoge’ na Daniel Claud ‘Dani Mtoto wa Mama’.

Akizungumza na waandishi wa habari jana Dar es Salaam, Kamanda wa Kanda hiyo, Simon Sirro alisema ni kosa kufanya mapenzi kinyume cha maumbile, hivyo vijana wake wameshaingia mtaani kuwatafuta watu hao.

‘’Sambamba na agizo la Naibu Waziri, tulishaanza kushughulikia suala hilo na sasa askari wetu wako maeneo mbalimbali kusaka mashoga, hivyo tutawakamata wote wanaofanya hivyo, wakiwamo waliotajwa ambao wamekuwa wakijitangaza kwenye mitandao ya kijamii,’’ alisema Kamanda Sirro.

‘’Suala hili tunalishughulikia kwa ukaribu, naombeni hata ninyi kama mnafanya mwache tutawashughulikia bila kujali, timu yetu ya mambo ya makosa ya kimtandao imeshawatambua wote wanaofanya hivyo mitandaoni hata kama hawajatajwa,’’ aliongeza

Alieleza kuwa ni lazima kuheshimu sheria na kuacha kuiga mambo ya kigeni ambayo hayana faida na yenye madhara makubwa kiafya.

Share on Google Plus

About Unknown