Ajali ya basi, lori yaua wanafunzi 2 Dar

Hussein Ndubikile

Gilles Muroto

WANAFUNZI wawili wamepoteza maisha na watu wengine 24 kujeruhiwa katika ajali ya gari iliyotokea jana eneo la Tazara, Dar es Salaam.

Akizungumza na gazeti hili jana, Kamanda wa Polisi Mkoa wa Temeke, Gilles Muroto, alisema ajali hiyo ilitokea asubuhi baada ya basi aina ya Eicher namba T376 BFT likitoka Gongo la Mboto kuelekea katikati ya Jiji kugonga lori aina ya Scania namba T273 CVT na kusababisha maafa hayo.

"Watoto wawili wanafunzi wamepoteza maisha na majeruhi kukimbizwa hospitalini huku wengi wao wakiruhusiwa na wachache kulazwa kwenye Hospitali ya Taifa ya Muhimbili," alisema Kamanda Muroto.

Alitaja waliopoteza maisha kuwa ni Iklam Athumani (15) mwanafunzi wa Sekondari ya Msimbazi na Sakina Imam (14) wa sekondari ya Mchikichini wote wa kidato cha kwanza.

Aliongeza kuwa ajali hiyo ilisababisha majeruhi 24 na kati yao, 21 waliruhusiwa huku akibainisha kuwa ni watatu pekee ndio wamelazwa  hospitalini hapo wakiendelea na matibabu.

Alisisitiza kuwa chanzo cha ajali bado hakijajulikana na kwamba madereva wote wawili wanashikiliwa na Polisi kwa mahojiano zaidi.

Share on Google Plus

About Unknown