Hospitali ya Chuo Kikuu Kampala kukamilika Oktoba

Hussein Ndubikile

CHUO Kikuu cha Kampala (KIU), tawi la Dar es Salaam kimesema ujenzi wa hospitali yake ya rufaa unatarajiwa kukamilika Oktoba.  

Awali ujenzi huo ulikuwa ukamilike Juni ila kutokana na kutokamilika kwa taratibu ulisogezwa mbele.

Akizungumza na gazeti hili jana, Mkurugenzi wa Masoko wa KIU, Rashid Noor alisema ujenzi umefikia hatua nzuri na kinachofanyika sasa ni umaliziaji wa maeneo ya ndani ya jengo.

“Mafundi sasa wanamalizia eneo la ndani ya jengo na mambo yakienda vizuri tunatarajia itafunguliwa muda uliopangwa,” alisema Rashid.

Alisema vifaa vinavyohitajika kwa mafunzo na matibabu vimeshawasili huku akiongeza kuwa kukamilika kwake kutasaidia watu wa karibu na chuo hicho kupata huduma bora ya afya.

Alisisitiza kuwa madaktari wa hospitali hiyo watatoka ndani na nje ya nchi zinazoshirikiana na chuo hicho.

Aliongeza kuwa wanafunzi wanaosomea vitivo vya Sayansi watafanyia humo mazoezi ya vitendo ili kuendana na maelekezo ya Wizara ya Elimu, Sayansi na Teknolojia, yanayotaka chuo kinachofundisha taaluma ya udaktari kuwa na hospitali yenye hadhi hiyo.

Aidha, alisema jengo hilo linatarajiwa kufunguliwa na Mkuu wa Chuo hicho, Rais mstaafu, Ali Hassan Mwinyi.

Share on Google Plus

About Unknown