Hussein Ndubikile
 |
| Freeman Mbowe |
KAMATI Kuu ya CHADEMA imeteua wanachama
wake sita kugombea ubunge wa Bunge la Afrika Mashariki (EALA), wakiwamo Ezekia
Wenje na Lawrence Masha waliopigiwa kura za hapana katika uchaguzi uliopita.
Katika kikao kilichofanyika jana
Zanzibar walioteuliwa wengine ni Naibu Katibu Mkuu wa Chama hicho Zanzibar,
Salum Mwalimu, Makamu Mwenyekiti Taifa, Profesa Abdallah Safari, Josephine
Lemoyan na Pamela Massay.
Uteuzi huo ulifanyika kukiwa na
kumbukumbu ya kilichotokea Aprili 4 Dodoma baada ya Masha na Wenje kushiriki
uchaguzi ambao Chadema ilipeleka majina yao pekee jambo lililozua mjadala
bungeni na kuhitimishwa kwa wao kupigiwa kura za hapana.
Katika uchaguzi huo, wabunge wa Bunge la
Jamhuri ya Muungano walichagua wajumbe saba wa EALA, sita wakiwa wa CCM na
mmoja CUF.
Taarifa iliyotolewa jana na Mkuu wa
Idara ya Habari na Mawasiliano wa Chama hicho, Tumaini Makene ilieleza kuwa
majina hayo yatakamilisha hatua zingine za uteuzi kwa mujibu wa taratibu na Kanuni
za Bunge na Uchaguzi wa Bunge la EALA.
Awali, Katibu wa Bunge ambaye pia ni
Msimamizi wa Uchaguzi huo, Dk Thomas Kashililah alisema uchaguzi mdogo wa
kupata wawakilishi wawili wa nafasi hiyo utafanyika Mei 10.
Dk Kashililah alisema wabunge
watakaopigiwa kura katika uchaguzi huo wataungana na wengine saba wa CCM na
CUF.
Wabunge wa CCM waliochaguliwa ni
Happiness Legiko, Maryam Ussi Yahya, Dk Abdullah Hasnu Makame, Dk Ngwaru
Maghembe, Alhaji Adam Kimbisa huku kutoka Cuf akiwa ni Habib Mnyaa.
0 comments:
Post a Comment