Madeni ya Temesa kwa Serikali ni zaidi ya Sh bilioni 11

Joyce Kasiki, Dodoma

BUNGE limeelezwa kwamba hadi sasa Wakala wa Ufundi na Umeme (Temesa) inazidai taasisi mbalimbali za Serikali zikiwamo wizara zaidi ya Sh.bilioni 11.

Kufuatia madeni hayo, taasisi hizo zimetakiwa kulipa madeni hayo haraka kabla serikali haijachukua hatua styahiki dhidi yao.

Naibu Waziri wa Maji na Umwagiliaji Isack Kamwelwe alitoa kauli hiyo wakati  akijibu swali la Mbunge wa Arusha Magharibi Gibson Ole Maiseyeki (Chadema).

Maiseyeki alihoji serikali kama haioni sasa umefika wakati wa kuifuta Temesa na Mamlaka ya udhibiti wa ununuzi wa umma(PPRA) au kuvibadilishia utaratibu wake wa kufanya kazi ili viweze kuwa na tija kwa Taifa.

Akijibu swali hilo, Kamwelwe alisema changamoto kubwa inayoikabili Temesa ni madeni makubwa ambayo Wakala unadai Wizara, Taasisi za serikali na Halmashauri.

Alisema kuchelewa kulipwa madeni hayo kunaipunguzia Temesa uwezo wa kutoa huduma.

“Serikali itaendelea kusimamia Temesa ili kuhakikisha kuwa kuna usimamizi wa karibu wa ubora wa matengenezo ya magari na karakana zake zinatumia vipuri halisi katika matengenezo ya magari,”alisema

Aidha alisema serikali itahakikisha kuwa huduma za Temesa zinaboreshwa na kutolewa kwa ufanisi bila urasimu wowote kwa kufuata mkataba wa huduma kwa wateja na mwongozo wa matengenezo ya magari ya serikali.

Alibainisha kwasasa Temesa ina jumla ya wahandisi 78 na mafundi 344.

Kuhusu PPRA, Naibu Waziri huyo alizishauri Wizara, Taasisi na Halmashauri nchini kuendelea kuzingatia sheria ya ununuzi wa umma ya mwaka 2011 pamoja na kanuni zake na kuendelea kutumia huduma za Temesa.

Share on Google Plus

About Unknown