*Asema kiini cha mgogoro ni mfumo wa serikali
*Aendelea kumtambua kama Katibu Mkuu
halali
Celina
Mathew
 |
| Profesa Ibrahim Lipumba |
MWENYEKITI wa CUF, Profesa Ibrahim
Lipumba, amesema anavyoona Mwenyekiti wa Tume ya Uchaguzi Zanzibar (ZEC), Jecha Salim
Jecha ni bora kuliko Katibu Mkuu wake, Maalim Seif Sharrif Hamad.
Wawili hao wamekuwa na mvutano na
kutupiana vijembe kwa muda sasa baada ya Lipumba aliyejitoa CUF Agosti mwaka
juzi kuamua kurejea ndani ya chama hicho mwaka jana na kuzua mgogoro.
Kutokana na mgogoro huo, CUF
imegawanyika mapande mawili, moja la Lipumba ambaye pia anatambuliwa na Ofisi
ya Msajili wa Vyama vya Siasa nchini na lingine la Maalim Seif.
Lakini jana Profesa Lipumba alitaja
kiini kingine cha mgogoro wake na Maalim Seif ndani ya CUF kuwa ni Mchakato wa
Katiba mpya mwaka 2013 wakati wa Bunge la Katiba ambapo Maalim Seif alikuwa
akipigania kuwepo Muungano wa Mkataba huku Lipumba na msimamo wa chama ukiwa ni
Serikali tatu.
Jecha alifuta matokeo ya Uchaguzi Mkuu
wa Zanzibar mwaka juzi, kabla ya kurudiwa Machi 20 mwaka jana na Dk Ali
Mohammed Shein wa CCM kushinda, huku CUF ikisusia uchaguzi huo.
Lipumba alisema hayo jana alipotakiwa
kueleza kiini na sababu zinazoendeleza mgogoro ndani ya CUF, uvamizi wa
mkutano, kuvamia ofisi za chama Buguruni, kushiriki kwenye mchakato wa kumpokea
Edward Lowassa ndani ya Ukawa na msimamo wake wa kuomba kujiuzulu.
Akizungumza kupitia kipindi cha 360
kinachorushwa na kituo cha Clouds Media, Lipumba alionekana kumrushia mpira
Maalim Seif kuwa ndiye chanzo cha mgogoro na kwamba hana ushirikiano.
“Bora ya Jecha Salum Jecha aliyefuta
uchaguzi Zanzibar kuliko Maalim Seif aliyetangaza matokeo kabla ya uchaguzi
kufanyika,” alisema na kuongeza:
“Mimi sijakataa kufanya kazi na Maalim,
tatizo lake ni kuwa kila nikimwita ofisini nimpangie majukumu anagoma kuja,
hivyo hali hiyo imesababisha mgogoro uzidi kuwepo ndani ya chama na hakuna
ushirikiano wowote.”
Alisema kwa kiasi kikubwa, Maalim Seif
amekuwa akivunja Katiba ya chama na kwamba angeiheshimu matatizo kama hayo
yasingeweza kujitokeza.
“Maalim anajiona Sultani wa chama, maana
hata wakati naandika barua ya kujiuzulu, baadaye nilishauriwa na wananchi
nikaona bora nitengue barua yangu, kwa kuwa mimi sikuwa wa kwanza,” alisema.
Alisema Katiba haijakataza mtu
aliyejiuzulu kutengua uamuzi wake, kwa kuwa Nassoro Mazrui alipogombana na
Maalim Seif alijiuzulu, lakini baadaye aliamua kurudi.
Katiba inasema mtu akijiuzulu kama
mchakato haujakamilika wa wajumbe wa Kamati Kuu, pande mbili za Zanzibar na
Tanzania Bara wapige kura kila upande upate theluthi mbili ndipo mtu anakuwa
amejiuzulu, jambo ambalo halikufanyika.
Alisema baada ya kuandika barua ya
kujiuzulu kwa Maalim Seif, jambo la kushangaza aliitisha Mkutano Mkuu ili
kumjadili Lipumba na kupiga kura, jambo ambalo baadaye lilivurugika na kuamua
kutangazwa matokeo ya kura wakati uchaguzi haukufanyika.
Kiini
Akizungumzia chanzo cha migogoro ndani
ya chama hicho, alisema ilianza mwaka 2013 kwenye Bunge la Katiba wakati Maalim
alipotaka kuwepo Muungano wa Mkataba jambo ambalo Lipumba alilipinga.
“Maalim alikuwa na lengo la kuvunja Muungano,
hivyo nilikataa suala hilo kwa kuwa Muungano uliopo ni wa serikali tatu na
dhamira yetu ni kuwapo na unaoendana na wa Jaji Nyalali (marehemu Francis)
ambao kwa sasa ni wa Jaji Mkuu mstaafu Joseph Warioba hivyo kana ningekubali
uliopo ungevunjwa,” alisema.
Januari 14, 2013 Maalim Seif alipokuwa
Makamu wa Kwanza wa Rais wa Zanzibar alitoa mapendekezo yake kwa Tume ya Maoni
ya Katiba, kuwa kutokana na uzoefu wake wa miaka 49 wa Muungano wa Katiba kati
ya Zanzibar na Tanganyika, alipendekeza nchi hizo ziingie kwenye mfumo wa Shirikisho
kupitia Muungano wa Mkataba.
Alisema chini ya Muungano huo wa mkataba
kuwe na serikali mbili ambapo Jamhuri ya Tanganyika itakuwa na serikali yake na
Zanzibar itakuwa na ya kwake ambapo zote mbili zitakuwa na mamlaka kamili
kitaifa na kimataifa.
“Kisha
Serikali hizo mbili zitaingia mkataba wa ushirikiano baina yao ambao unaweza
ukapewa jina la ‘Tanzanian Union Treaty’. Yale maeneo yatakayokubaliwa kuwa
chini ya ushirikiano wa nchi mbili huru yatasimamiwa na Kamisheni ya Muungano,
kama ilivyo kwa Kamisheni ya Ulaya au jina lingine lolote litakalokubaliwa na
nchi mbili hizo,” alisema kupitia hotuba hiyo.
Lowassa
Akizungumzia moja ya sababu za migogoro
ndani ya chama hicho, Lipumba alisema wakati mgombea urais kupitia ukawa,
Lowassa alipoteuliwa Maalim hakumhusisha kwenye vikao, bali alimletea taarifa tu.
Alisema Maalim alimwambia kwa kuwa CUF haina
fedha za kujiendesha, ni vema wakamkubali Lowassa asimame kama mgombea wa
Ukawa.
Sumaye
Profesa Lipumba alionekana kumshangaa
Maalim Seif kwa kueleza kuwa amemsamehe Waziri Mkuu mstaafu Frederick Sumaye
wakati kipindi cha uongozi wake, walitangaza kufanya maandamano ya amani lakini
cha kushangaza wanachama wa chama hicho zaidi ya 60 walipoteza maisha.
“Tuliiomba Serikali kufanya maandamano
ya amani baada ya uchaguzi wa Zanzibar ili urejee kipindi hicho, ambacho Sumaye
ndiye alikuwa Waziri Mkuu kwenye Serikali iliyokuwa madarakani, lakini cha
kushangaza tulipigwa na mimi nikavunjwa mkono, hivyo namshangaa Maalim
anaposema amemsamehe nahisi ana matatizo,” alisema.
Alisema kwa kiasi kikubwa wao kama
viongozi walijisaliti kwa kujiunga na Ukawa huku wote wakijinadi kuwa
watapambana na ufisadi kisha wakachukua uamuzi wa kumchukua Lowassa awe mgombea
wakati ni CCM.
“Tulimpokea Lowassa tukasema masuala ya
kupambana na rushwa ni ya wote, si mmoja bali kujenga mfumo lakini sikusema
kama nitamnadi, licha ya kwamba nilikwenda kwake nikazungumza naye kuhusu yeye
kuhamia nilimshauri hilo suala wazungumze na vyama vyote vinavyounda Ukawa si
Chadema pekee.
“Nilikwenda nikazungumza naye kwamba
hata ACT- Wazalendo washirikishwe kwenye mchakato, badala yake Maalim alikutana
na Mwenyekiti wa Chadema, Freeman Mbowe kwa siri na kufanya uamuzi,” alisema.
Ikulu
Akifafanua alichokwenda kufanya Ikulu
baada ya Rais John Magufuli kuapishwa, alisema aliitwa Ikulu kwenda kuzungumza
naye kuhusu suala la uchaguzi Zanzibar.
“Niliitwa Ikulu na Rais Magufuli
tukazungumza kuhusu suala la uchaguzi wa Zanzibar, akaniambia kuwa
tutakavyokubaliana yeye ataunga mkono nikaenda kumweleza Maalim ambaye naye
alipata fursa ya kuonana naye,” alisema.
Ofisi
Akitoa ufafanuzi kuhusu yeye kuvamia
ofisi za chama Buguruni, alisema hakuvunja bali hatua hiyo ilitokana na
utambuzi wa Msajili kwake kama Mwenyekiti wa Chama.
“Sikuvunja ofisi bali nilikwenda pale na
walinzi wa chama, Blueguards, tukagonga lakini mlango haukufunguliwa, kwa kuwa
ilikuwa imewekwa kampuni binafsi ya ulinzi jambo ambalo ni kinyume na Katiba,” alisema.
Alisema kwa kuwa lango lilifungwa,
walinzi wa chama ambao Maalim Seif juzi aliwaita maharamia licha ya kuwa ndiye aliwapa
vitambulisho walipanda uzio na kufungua kwa nguvu.
Alisema baada ya kuingia walikaribisha
wanachama upya ili kuweka mikakati ya kujenga chama yeye akizunguka wilaya na
mikoa yote na kufanya mkutano na viongozi.
Hata hivyo, aliweka wazi kuwa anamtambua
Maalim kama Katibu Mkuu hivyo “hakuna CUF yangu wala yake bali ni ya wanachama”.
Uvamizi
Alipoulizwa anahusikaje na uvamizi wa
mkutano wa hivi karibuni Mabibo, alisema kwa kiasi kikubwa hausiki na suala
hilo kwa kuwa hawana utaratibu wa kwenda kuvamia mikutano ya upande wa pili.
Aliongeza kuwa kipindi cha nyuma wakati
wa mfumo wa vyama vingi aliwahi kuwa mshauri wa mambo ya kiuchumi wa Rais Alhaji
Ali Hassan Mwinyi lakini baadaye alihamia CUF baada ya kuombwa na Hamad Rashid Mohamed kugombea urais kupitia
CUF mwaka 1995.
0 comments:
Post a Comment