Lema aibuka na madai ya kufichwa kwa Kinana

Mwandishi Wetu

Godbless Lema

WAKATI CCM ikidai kuwa Katibu Mkuu wake, Abdulrahman Kinana, amepewa likizo bila kutaja muda maalumu, Mbunge wa Arusha Mjini, Godbless Lema (Chadema), amedai bungeni kuwa kuna taarifa kiongozi huyo amefichwa.

Juzi Katibu wa Halomashauri Kuu (NEC) ya CCM, Itikadi na Uenezi, Humphrey Polepole akiwa mkoani Arusha, alikaririrwa akisema kuwa Kinana yuko katika mapumziko ya kutazama afya yake.

Lakini wakati Polepole akitoa taarifa hiyo, bungeni Lema alidai kuwa amesoma taarifa katika mitandao ya kijamii kuhusu kufichwa kwa Kinana.

Akichangia juzi katika vikao vya Bunge vinavyoendelea mjini Dodoma, Lema ambaye pia ni Waziri Kivuli wa Mambo ya Ndani, alisema kumekuwepo na taarifa nyingi za kufichwa kwa Kinana.

Kutokana na taarifa hizo za mitandao, Mbunge huyo aliwataka wabunge kuungana na kupaza sauti bila kufumbia macho taarifa hizo.

Katika hotuba yake hiyo bungeni, Lema alisema kutokuwepo kwa uhuru wa habari nchini kumechangia watu wengi kuwa waoga na kushindwa kuhoji juu ya taarifa zinazoibuliwa mitandaoni.

Alitoa mfano kupotea kwa aliyekuwa Msaidizi wa Mwenyekiti wa Chadema, Freeman Mbowe na kada wa chama hicho, Ben Saanane kuwa taarifa ya kupotea kwake ilianzia mitandaoni.

“Hata suala la Ben Saanane lilianzia huko kwenye mitandao, lakini tukakaa kimya kwa uoga, leo yapata miezi sita tangu kupotea kwake, hili la Kinana kama mkiamua kukaa kimya mimi nitamtetea kama Waziri Kivuli wa Mambo ya Ndani.

“Kumekuwa hakuna uhuru wa kuongea kila sehemu, si bungeni, kwenye mitandao ya kijamii wala mitaani. Watu wanaogopa kuzungumza na kukaa na vitu mioyoni mwao, siku wakichoka wataingia barabarani bila kuambiwa na Chadema na CUF na hakuna kati yenu atakayesalia,” alisema Lema.

Alisema si vema Serikali na Bunge kupuuzia taarifa hizo na kuwataka wabunge wa CCM kuungana naye kupaza sauti, kwani leo wanaumizwa wao wa upinzani na wakimalizwa watahamia upande wa pili wa chama tawala.

“Nyie mnashangilia Bunge kutokuoneshwa moja kwa moja, mikutano ya kisiasa kukatazwa lakini niwaambieni, machafuko ya Syria yalianza baada ya kijana mmoja wa miaka 16 kupaza sauti yake kuwa Assad anapaswa kuondoka na tangu hapo nchi hiyo imeingia katika machafuko.

“Tunisia kijana mmoja mdogo ndio alianzisha maandamano na mpaka leo nchi haijatulia inapita katika kipindi kigumu, nyie mnaona Chadema inapiga kelele, lakini mnapaswa kutambua kuwa hakuwezi kuwa na Taifa lenye amani pasipo kuwa na uhuru wa habari,” alisema Lema.

Wakati Lema akiendelea kuzungumza, Waziri wa Nchi Ofisi ya Rais Tawala za Mikoa na Serikali za Mitaa (TAMISEMI), George Simbachawene aliomba muongozo kwa Mwenyekiti wa Bunge, Mussa Zungu.

Alipopewa nafasi, Simbachawene alimtaka Lema kuthibitisha taarifa zake za kufichwa kwa Kinana na kabla ya kujibiwa, Mnadhimu Mkuu wa Upinzani Bungeni, Tundu Lissu alinyanyuka kuomba muongozo na kusema alichokifanya Lema ni kurejea kile alichokisoma mitandaoni na si  vinginevyo.

Kinana hajasikika tangu Rais John Magufuli alipotangaza Machi 24 mwaka huu kuwa amemtuma kwenye matibabu nchini India na angerudi baada ya siku 14.

Tangu kutolewa kwa kauli hiyo, hivi karibuni kulikuwepo taarifa katika mitandao ya kijamii ikielezwa kuwa Kinana alifichwa huku wengine wakieleza kuwa alionekana nchini Canada.

Share on Google Plus

About Unknown