Wakizungumza kwa nyakati tofauti na gazeti hili walisema
lilikuwa tukio la ghafla ambalo hawajapata kuliona tangu wazaliwe.
Mmoja wa waathirika hao, Emilius Lutajayana alisema
wakati linatokea alikuwa ndani amelala lakini ghafla alishituliwa kwa kupondwa
na kompyuta mpakato iliyokuwa juu ya kabati.
“Nilikuwa nimelala muda huo. Kilichonishitua kutoka
usingizini ni kompyuta yangu iliyokuwa juu ya kabati kuniangukia na kuniponda.
Nilinyanyuka lakini miguu ikawa haina uwiano na nyumba ilikuwa kama mawimbi ya
ziwani,” alisema na kuongeza:
“Baada ya sekunde kadhaa nilitoka nje na tayari kuta za
nyumba zilishaanguka ingawa hakuna mtu kwenye familia yangu aliyepoteza maisha,
ila mbwa wangu walikufa kwenye tetemeko hilo.
“Kwa kweli tunamshukuru Mungu ila ni tukio la kusikitisha
kwa jinsi watu walivyopoteza maisha na mali zao.”
Happyness Felician alieleza kuwa tetemeko lilimkuta ndani
ya kibanda cha mabao na mtikisiko ulimfanya ashindwe kutambua kilichotokea na
alishuhudia nyumba zikianguka bila kujua chanzo.
Alisema akiwa kwenye kibanda alikumbwa na hofu akidhani
mwisho wa dunia umefika na baada ya hali kutulia, aliona watu wakikimbia ovyo
huku wengine wakiangua vilio na ndipo fahamu zilimtuma kuchukua mwanawe mchanga
na kutoka nje.
Linus Julius wa Hamugembe ambaye alivunjika mkono
akieleza kuwa hakupata kuona jambo kama hilo maishani mwake, kwani akiwa
nyumbani kwao, alishangaa kusikia mtikisiko mkubwa huku baadhi ya nyumba
zikianguka.
“Ni ajabu na kweli hata nashindwa kueleza tukio hili
lilivyo. Nikiwa nyumbani ulitokea mtikisiko mbao maishani mwangu sikuwahi
kuusikia. Nilisikia kama upepo nilijikuta naangukiwa na ukuta na kuvunjika
mkono. Nilitambua kuumia baada ya hali kutulia,” alisema Julius.
Godwin Laurian wa Rwamishenye alidai kuwa wakati tetemeko
hilo linatokea, aliona ardhi ikipanda na kushuka mithili ya mawimbi ya ziwa na
kujikuta akishindwa kukimbia kujiokoa na alipondwa na ukuta wa nyumba
akajeruhiwa kichwani.
Mwingine ni mwanafunzi wa sekondari ya Ihungo, Emmanuel
Renatus, ambaye alivunjika mguu wa kushoto akidai aliangukiwa na ukuta wa bweni
wakati akijiokoa.
Enjoy Jovit wa Rwamishenye ambaye alivunjika uti wa
mgongo alisema alikutwa na hali hiyo kwa kuangukiwa na ukuta wakati akijiokoa
wakati anatoka ndani ya nyumba ukuta ukamwangukia.
“Nashindwa nianzie wapi kueleza tukio hili na sijui kama
nimenusurika. Kila mahali hali ilikuwa mbaya kutokana na tetemeko na sikuwa
nahafamu hadi nilipohamishwa baada ya kufika hospitalini.
“Ni mara yangu ya kwanza kuona jambo hili ila mwanzo
nihisi ni mtikisiko wa umeme,” alisema Jovit akiwa hospitali ya rufaa ya Bukoba
alikolazwa.
0 comments:
Post a Comment