 |
| Dk John Magufuli |
LICHA ya Serikali kufanya vizuri katika
mwaka wake wa kwanza na kurejesha nidhamu ya kazi kwa kiasi kikubwa, viongozi
wa Upinzani wametaja mambo tisa ya Rais John Magufuli kuzingatia ili aweze
kufanya vizuri zaidi katika mwaka wake wa pili.
Ushauri huo umetolewa na baadhi ya viongozi
waliozungumza na JAMBO LEO jana wakisema hakuna Rais anayefanya mazuri bila
kuwa na dosari kwenye baadhi ya maeneo na kwamba kazi yao na wananchi ni kuhoji
na kukosoa ili mambo yaende sawa.
Walitaja mambo ambayo mkuu huyo wa nchi
aliyeapishwa Novemba 5 anapaswa kuyaweka sawa kuwa ni utawala bora, kutominya
demokrasia, kuweka mikakati imara ya kuinua uchumi na ujenzi wa viwanda,
kuboresha huduma za elimu, uhusiano wa kimataifa, kuepuka uamuzi wa ghafla,
kushughulikia ipasavyo migogoro ya ardhi na taasisi kuachwa zijisimamie pamoja
na kuboresha sekta ya afya.
Tangu Rais Magufuli aingie madarakani,
amefanya mambo kadhaa ikiwa ni pamoja na ununuzi wa ndege, kusimamia miradi ya
umeme, kuanzisha Mahakama ya mafisadi na kuzuia matumizi yasiyo ya lazima kwa
kufuta sherehe mbalimbali.
“Anapaswa kuacha mifumo ifanye kazi ili
kuepuka kuingilia mambo. Aiache mihimili mingine kama Bunge na Mahakama ifanye
kazi yenyewe kwa sababu kuiingilia ni sawa na kuua demokrasia,” alisema Salum
Mwalimu, Naibu Katibu Mkuu wa Chadema Zanzibar.
Alisema hali hiyo imesababisha wasaidizi
wake, wakiwamo wakuu wa mikoa na wilaya kufanya kazi kwa hofu na kudai kuwa baadhi
wanashindwa kufuata sheria na kuishia kutekeleza majukumu yao kwa kumfurahisha
Rais.
“Mfano vyombo vya habari kuminywa katika
utendaji wa shughuli zake na Jeshi la Polisi kutumika kisiasa. Haya mambo
yanaminya demokrasia. Ni baadhi ya vitu ambavyo Rais anapaswa kuvitazama kwa umakini
mkubwa,” alisema Mwalimu.
Mwenyekiti wa Chama cha Umma (Chaumma),
Hashim Rungwe ambaye aligombea urais mwaka jana, alimshauri Rais kuongoza nchi
kwa kufuata sheria na Katiba.
“Ameshamaliza mwaka na sasa anaelekea
mwaka wa pili, lakini bado sijaiona Tanzania ya viwanda ambayo (Rais) aliinadi
wakati wa kampeni, badala yake tunashuhudia mvutano kati ya Serikali na
wawekezaji,” alisema Rungwe huku akitolea mfano mvutano baina ya Serikali na
kiwanda cha saruji cha Dangote.
“Viwanda
vinakufa na tayari tumesikia kuwa kiwanda hicho kinasitisha uzalishaji sasa
utasema tunapiga hatua au tunarudi nyuma?”
Rungwe alisema Wizara ya Viwanda na
Biashara na Nishati na Madini zinapaswa kuacha kubana wawekezaji kwa
kuwalazimisha kutumia malighafi za nchini, badala yake zitafute mbinu mbadala
za kuwavutia.
Katibu Mkuu wa NCCR-Mageuzi, Danda Juju
alisema, “Rais anapaswa kutekeleza wajibu wake kwa kufuata sheria ili walio
chini yake nao waige. Mkuu wa mkoa huwezi kutukana na kudhalilisha watumishi,
tena hadharani.”
Alisema Rais anapaswa kufanya taasisi
kuaminiana kutokana na siku za karibuni baadhi ya vigogo serikalini kuzungumzia
jambo moja lakini kila mmoja na msimamo wake.
Juju alitolea mfano kauli ya Rais
Magufuli kwamba ni kosa kuweka fedha za umma kwenye akaunti za muda maalumu
huku Gavana wa Benki Kuu (BoT), Benno Ndullu akibainisha kuwa hakuna tatizo
lolote kuweka fedha za umma kwenye akaunti hizo.
“Tulivutia wawekezaji kwa masharti nafuu
wakaja nchini, ila sasa tumegeuka. Nadhani umeona ya kiwanda cha Dangote,”
alisema.
Kauli hiyo iliungwa mkono na aliyekuwa Mbunge
wa Kigoma Kusini kwa tiketi ya chama hicho, David Kafulila na kusisitiza kuwa kuzuiwa
kwa matangazo ya moja kwa moja ya Bunge ni kuminya demokrasia na kutenganisha
wananchi na wawakilishi wao na Serikali.
“Rais anapaswa kutazama upya mikakati ya
uchumi maana mzunguko wa fedha haueleweki na biashara zimeyumba. Pia katika
uhusiano wa kimataifa kuna tatizo, Serikali inapaswa kuwa na msimamo mmoja ili
kuwaondolea hofu wawekezaji ambao wanahisi jambo lolote, zikiwemo sheria
zinaweza kubadilishwa muda wowote na kuathiri biashara zao,” alisema.
Katibu Mkuu wa Chama cha Alliance of
Tanzania Farmers (AFP), Rashid Rai alishauri kiongozi mkuu wa nchi amulike sekta
ya afya kwa maelezo kuwa bado kuna changamoto nyingi.
Alisema kero katika huduma za afya hazipo
Hospitali ya Taifa ya Muhimbili (MNH) pekee, bali hospitali zote nchini.
Kuhusu hoja ya ‘Tanzania ya Viwanda’,
Rai alisema wakati Serikali ikiingia mwaka wake wa pili, hakuna mikakati ya
kueleweka ya kujenga viwanda nchini.
Huku akionesha kushangazwa na mawaziri
kushindwa kujifunza jinsi Japan na China zilivyokuwa na viwanda vingi, alisema migogoro
ya ardhi kati ya wakulima na wafugaji ni tatizo sugu ambalo miaka nenda rudi
limekosa ufumbuzi.
“Ni rahisi sana kumaliza mgogoro wa
ardhi, Serikali ina maeneo mengi ya wazi ambayo ni mapori na misitu, kwa nini
wasiyagawe kwa hawa wakulima na wafugaji ili kuzuia watu kuuana? Serikali
sikivu haiwezi kushuhudia mauaji ya raia wake ilhali inaweza kuyatatua na
kuyamaliza,” alisema.
Katibu Mkuu wa NLD, Tozi Matwange
alisema: “Rais anapaswa kuendelea kushauriwa juu ya uminyaji wa demokrasia kwa
kuzuia mikutano ya hadhara na maandamano…ni kinyume na Katiba.
“Pia utawala bora ni tatizo. Huku ‘kutumbua
majipu’ kunafanyika kinyume na taratibu, sheria na Katiba ya nchi, ni tatizo
kubwa.”
Katibu Mkuu wa CCK, Renatus Muabhi alisema
Rais anapaswa kuboresha maisha ya wananchi kwa kuimarisha uchumi wa nchi huku
akinukuu taarifa za BoT zinavyoainisha uchumi wa nchi kuyumba.
“Serikali
imekwenda kununua ndege mpya bila kuwa na mikakati halisi ya kuinua shirika la
ndege. Nadhani fedha zile zingepelekwa kwanza kuboresha sekta ya afya, elimu na
maji, huku ikiendelea kupanga mikakati ya kulifufua shirika hilo, ambalo
linahitaji kusaidiwa mengi ili liweze kusimama si kuwa na ndege peke yake,”
alisema.
0 comments:
Post a Comment