Watozwa faini ya milioni 120/- kwa kuingilia TCRA

Grace Gurisha

RAIA watatu wa Pakistani wamehukumiwa kulipa faini ya Sh milioni 120, baada ya kupatikana na hatia ya kuingilia mawasiliano ya Mamlaka ya Mawasiliano Tanzania (TCRA), bila kibali na kuisababishia Serikali hasara ya Sh milioni 140.

Washitakiwa hao ni Hafees Irfan, Mirza Irfan Baig na Mirza Rizwani Baig, ambapo walikiri kuingilia mawasiliano hayo bila kibali huku wakijua kufanya hivyo ni kosa kisheria.

Hukumu hiyo ilitolewa jana na Hakimu Mkazi Mkuu Respicius Mwijage, baada ya kupitia hoja zilitolewa na upande wa Jamhuri, vielelezo na sheria.

Alisema washitakiwa walikiri makosa kwa mujibu wa sheria hivyo wanapaswa kulipa faini ya Sh milioni tano katika kosa la kwanza ambalo wanashitakiwa kwa kuingilia mawasiliano ya Mamlaka hiyo.

Pia alisema katika kosa la pili na la tatu watatakiwa kulipa Sh milioni tano kwa kila kosa, jumla Sh milioni 15 katika makosa matatu na wakishindwa watatumikia kifungo cha mwaka mmoja jela kwa kila kosa.

Hakimu Mwijage alisema katika kosa la nne kila mshitakiwa anatakiwa kulipa faini ya Sh milioni 35 kutokana na kuisababishia Serikali na TCRA hasara ya Sh milioni 140, ili kuepuka kutumikia kifungo cha mwaka mmoja jela. Washtakiwa hao walilipa faini.

Kabla ya hukumu hiyo kutolewa, Wakili wa Serikali, Esther Martin aliwasomea washitakiwa hao maelezo ya awali kwa kudai kuwa katika tarehe Dar es Salaam, walikutwa na vifaa vya kuunganishia mawasiliano ya kimataifa bila kibali cha TCRA.

Ilidaiwa kuwa katika kufanikisha malengo yao, walitoka nchini kwao Pakistan na kwenda maeneo mbalimbali ikiwamo Falme za Kiarabu, Malaysia, Msumbiji na hatimaye nchini ili kutumia vifaa hivyo.

Martin alidai walifika nchini tarehe tofauti na kufikia kwenye hoteli ya Butterfly iliyoko Kariakoo, Dar es Salaam chumba namba 905.

Alidai kuwa Oktoba 5 mwaka jana maofisa wa Polisi wakifuatana na wa TCRA walifika maeneo hayo na kuichunguza na kuwakamata washitakiwa hao.

Ilidaiwa kwenye chumba hicho, walikutwa na vifaa vya mawasiliano ambavyo ni kadi za simu 15, CPU 18, kompyuta mpakato saba, kadi za Airtel 258, modemu ya Huawei na vocha zilizotumika.

Baada ya kukutwa na vifaa hivyo, washitakiwa walifikishwa kituo cha Polisi Kijitonyama na baada ya uchunguzi ilibainika kuwa waliisababishia Serikali na TCRA hasara hiyo.

Baada ya kusomewa maelezo hayo, washitakiwa walikiri kukutwa na kutenda makosa hayo wakiwa kwenye hoteli ya Butterfly.

Wakili Martin aliiomba Mahakama kutoa adhabu kali kwa washitakiwa ili iwe funzo kwa wengine.

Hata hivyo, Wakili wa Utetezi Shadrack Ishengoma aliiomba Mahakama hiyo kuwapunguzia adhabu washitakiwa kwa sababu walikiri makosa, pia wanategemewa na familia zao.

Share on Google Plus

About Unknown