Samia, Mghwira watajwa kuwa mashujaa 2015

Mary Mtuka

Samia Suluhu

MAKAMU wa Rais, Samia Suluhu Hassan na Mwenyeki wa Chama cha ACT – Wazalendo, Anna Mgwira wametajwa kuwa mashujaa katika historia ya Afrika na Tanzania kwa mwaka 2015.

Ripoti ya Uangalizi wa Uchaguzi Mkuu wa Tanzania wa mwaka 2015 imewataja kinamama hao kuwa ni mashujaa kutokana na ujasiri waliouonyesha katika kujitokeza, kushiriki  na kusimamia nafasi walizogombea.

Kwa mujibu wa ripoti hiyo iliyotolewa na Kituo cha Sheria na Haki za Binadamu (LHRC) na Mtandao wa Asasi za Kiraia wa kuangalia chaguzi Tanzania Mghwira na Samia walionesha uwezo mkubwa katika kampeni za uchaguzi huo uliomwingiza madarakani mgombea wa CCM, John Magufuli.

Katika uchaguzi huo, Mghwira alikuwa anawania Urais kupita chama hicho cha ACT-Wazalendo wakati Samia alikuwa anasaidiana na Magufuli kutetea tiketi ya CCM.

Kampeni za kinamama hao zilionekana kukonga nyoyo za wapenzi na mashabiki wengi wa vyama vyao, hasa wanawake ambao kwenye uchaguzi wa mwaka 2005, walilaumiwa kumtelekeza mwanamke mwanzao aliyewania Urais, Anna Senkoro.

Kilichofanu uchaguzi wa mwaka jana unekane wa kipekee ni uamuzi wa CCM kumteua Samia mgombea mwenza akiwa mwanamke wa kwanza kuwania nafasi hiyo tangu chama hicho kianze kusimamisha wagombea wenza.

Hata hivyo, Mghwira na Samia siyo wanawake wa kwanza Afrika na Tanzania kusimama kwenye kampeni za uchaguzi. Baadhi ya wanawake waliowahi kusimama kwenye kampeni na nchi/vyama vyao kwenye mabano ni Ellen Johnson (Liberia), Joyce Banda (Malawi) na Catherine Samba (Jamhuri ya Kati).

Nchi zingine zilizowahi kuwasimamisha wanawake katika nafasi za umakamu wa rais ni Uganda, Gambia, Zimbabwe, Afrika Kusini na Burundi.

Anna Senkoro ndiye aliyekuwa mwanamke wa kwanza Tanzania kuwania nafasi ya urais aliposimama mwaka 2005 kwa tiketi ya PPT- Maendeleo kupambana na aliyekuwa mgombea wa nafasi hiyo kwa tiketi ya CCM, Jakaya Kikwete.

Alipata kura 18, 741 sawa na asilimia 0.1 ya kura zote zilizopigwa. Lakini mwenyewe na wanaharakati kadhaa wamekuwa wakiwalaumu wanawake kuwa walimtelekeza mwenzao huyo kwa kutompigia kura.

Share on Google Plus

About Unknown