Walimu 3 mbaroni kuzuia wanafunzi kufanya mtihani

Joyce Kasiki, Dodoma

Profesa Joyce Ndalichako

JESHI  la Polisi mkoani hapa linashikilia walimu watatu wa   sekondari wilayani Kongwa kwa tuhuma za kuzuia wanafunzi wawili wa kidato cha nne kufanya mtihani wa Taifa ulioanza Novemba mosi.

Akizungumzia tukio hilo jana Kamanda wa Polisi wa Mkoa, Lazaro Mambosasa alisema walimu hao walizuia wanafunzi hao kufanya mtihani wa Kiingereza.

Wanafunzi waliozuiwa kufanya mtihani huo ni Amina Said wa sekondari ya Zoissa na Bahati Ntigonza wa sekondari ya Mnyakongo.

Mambosasa alisema Amina alizuiwa kwa kuhofiwa ana ujauzito na walimu hao wakaamuru akapimwe ujauzito wakati wenzake wakiendelea na mtihani ambapo hata hivyo majibu yalionesha hakuwa na ujauzito.

Bahati alizuiwa kuingia chumba cha mtihani kwa kuwa alivaa viatu visivyo na gidamu, hivyo alirudishwa nyumbani kufunga gidamu huku wenzake wakiendelea na mtihani.

Kamanda Mambosasa alitaja watuhumiwa hao kuwa ni Mwalimu Mkuu wa Sekondari ya Mnyakongo, Lukonge Mwezo, Mkuu wa Sekondari ya Zoisa, Omari Athumani na mwalimu wa zamu wa   Sekondari ya Mnyakongo Daud John.

Aidha alisema upelelezi utakapokamilika walimu hao watafikishwa mahakamani kujibu tuhuma zinazowakabili.

Kamanda huyo alitoa rai kwa walimu wote wanaosimamia mitihani kuzingatia sheria, kanuni na taratibu za Baraza la Mitihani (NECTA) kwani walichokifanya walimu hao hakikustahili kwa kipindi hiki cha mtihani.

Alisema Polisi haitasita kuwachukulia hatua za kisheria watakaokiuka taratibu zilizowekwa katika kazi hiyo ya kusimamia mitihani.

Baada ya kukamatwa kwa walimu hao, Mwenyekiti wa Chama cha Walimu Tanzania (CWT) wilaya ya Kongwa, Andrew Nyemba alitaka kuzingatiwa kwa taratibu, sheria na kanuni katika kushughulikia suala hilo litakalofanya wanafunzi hao kupata haki kwa kutofanya mtihani huo.

Share on Google Plus

About Unknown