Wahamiaji haramu 107 wa Malawi wahukumiwa

Grace Gurisha

MAHAKAMA ya Hakimu Mkazi Kisutu, Dar es Salaam imewahukumu kifungo cha miezi mitatu jela, raia 107 wa Malawi au kulipa faini ya Sh milioni moja kila mmoja huku ikielekeza kuwa watakapomaliza adhabu hiyo warudishwe kwao mara moja.

Hukumu hiyo ilitolewa jana na Hakimu Mkazi Victoria Nongwa, baada ya washitakiwa hao kusomewa mashitaka mawili na kukiri kuingia nchini  na kuishi bila kibali cha Serikali.

Hakimu Nongwa alisema mshitakiwa wa kwanza hadi wa tatu Jessy Phiri (29), Saulos Lohane (43) na Jungu Kaunda watatakiwa kulipa faini ya   Sh 500,000 kila mmoja kwa sababu walikutwa wakiishi nchini bila kibali.

Kabla ya hakimu kutoa hukumu hiyo, washitakiwa hao waliomba wapunguziwe adhabu, lakini Hakimu Nongwa alisema adhabu aliyotoa kwao ni ndogo hivyo hawezi kushuka zaidi ya hapo kutokana na kwamba sheria kuhusu makosa hayo iko bayana.

“Washitakiwa mmepatikana na hatia kwa hiyo mtatumikia kifungo cha miezi mitatu jela au kulipa faini, mshitakiwa wa kwanza hadi wa tatu watalipa faini ya Sh 500,000 kila mmoja na mshitakiwa wa nne hadi wa 107 kila mmoja atalipa Sh milioni moja na mtakapomaliza kutumikia adhabu hii Serikali iwarudishe kwenu mara moja,” alisema Nongwa.

Awali, akisoma hati ya mashitaka, Mwendesha Mashtaka wa Idara ya Uhamiaji, Method Kagoma alidai kuwa Novemba 12 washitakiwa hao wakiwa Kinondoni Shamba, Dar es Salaam wakiwa raia wa Malawi walikutwa nchini bila viza.

Pia katika tarehe hiyo hiyo na eneo hilo hilo, washitakiwa wa kwanza, wa pili na wa tatu, walikutwa wakiishi nchini bila kibali wala hati za kusafiria huku wakijua ni kosa kisheria.

Baada ya hukumu hiyo kutolewa, washitakiwa hao waliangua vilio kwa kutojua la kufanya kwa sababu wote wako ndani.

Washitakiwa hao walikuwa na watoto wengi hali ambayo iliwafanya waendelee kulia kwa madai kuwa hawajui hatima ya watoto wakati wao wakiwa gerezani.

Share on Google Plus

About Unknown