Mwigulu: Polisi haikuruhusu mkutano wa Lipumba

Sharifa Marira

Mwigulu Nchemba

WAZIRI wa Mambo ya Ndani ya Nchi, Mwigulu Nchemba amesema   Polisi haikuruhusu mkutano wa hadhara wa Mwenyekiti wa CUF, Profesa Ibrahim Lipumba, bali ilitumia busara kutotawanya wananchi kwani walishajikusanya.

Alisema baada ya mkutano huo, Jeshi hilo lina uwezo wa kumhoji Lipumba ni wapi alikosea katika kufanya mkutano huo kuliko kutawanya wananchi ambao wangeweza kuumia.

Mwigulu alitoa majibu hayo juzi baada ya kuibuka kwa hoja kwenye kundi la WhatsApp linalojulikana kama Tanzania Yetu 2016 ambalo lina wajumbe kutoka maeneo mbalimbali wakihoji sababu za Jeshi hilo kuruhusu mkutano wa Lipumba wakati imepigwa marufuku nchi nzima.

“Si kwamba tunaruhusu, ila njia nzuri ya kudhibiti  tukio ambalo limeshatokea yaani watu walishakusanywa, kuwatawanya tungeweza kuumiza au kuua watu, tulichofanya ni kuruhusu amalize halafu tumwambie makosa yake,’’ alisema Mwigulu.

Baadhi ya wajumbe walihoji kuwa ikiwa Polisi imetumia busara katika mkutano wa Lipumba kutotimua watu kwa nini ilitimua wananchi kwenye mkutano wa Chadema wa Kahama?

Akijibu swali hilo, Mwigulu alisema: “Nilikuwa bado Kilimo lakini nakumbuka nikiwa wizara hii, Mbunge wa Buyungu, Kasuku Bilago (Chadema) watu walikusanyika bila kibali nikawaambia mwacheni aongee na wananchi waondoke.’’

Aluiongeza: “Mbunge wa Viti Maalumu Chadema, Cecilia Paresso, pia vivyo hivyo kipindi mikutano hata ya wabunge ilipozuiwa, niliwaambia askari walindeni wafanye mikutano na wananchi wakishaondoka waulizeni walipokosea kama ilivyotokea kwa Lipumba’’.

Hata hivyo, baadhi ya wajumbe walitaka kujua sababu za mikutano ya hadhara kuzuiwa huku wengine wakieleza kwamba Serikali inahofia matusi alisema mikutano haijazuiwa kwa sababu ya matusi ila ni utaratibu wa siasa.

“Kuna miaka miwili ya uchaguzi yaani  wa serikali za mitaa na uchaguzi mkuu, kuna hamasa  ya daftari, basi tufanye kazi hata miaka miwili  kati ya mitano,’’ alisema na kuongeza:

“Ni vema kwa sasa tuongelee fursa na tukosoane kwenye kazi ili wananchi wapate manufaa, halafu uchaguzi ukifika tuongee uchaguzi, haya mambo ya kuwaza uchaguzi kwa miaka  minne ijayo, si uzalendo tufanye kazi Serikali imeshaundwa.’’

Katika kundi hilo pia iliibuka hoja ya Serikali kutaka kuua vyama visivyo na wabunge kwa kuruhusu mikutano kwa wabunge pekee ambapo Mwigulu alisema: ”Hili la vyama kwa kweli mtazamo wake ni tofauti maana wanatakiwa watengeneze miundo ya vyama kabla ya mikutano wanaweza kufanya hivyo kwa mikutano ya ndani si lazima ya hadhara.”

Share on Google Plus

About Unknown