Msajili afuta vyama 3 vya siasa

Abraham Ntambara

Jaji Francis Mutungi

MSAJILI wa Vyama vya Siasa nchini, Jaji Francis Mutungi amefuta usajili wa vyama vitatu kutokana na alichoeleza kuwa ni kupoteza sifa za usajili wa kudumu kwa kukiuka masharti ya sheria ya vyama vya siasa.

Kwa mujibu wa Jaji Mutungi, vyama vilivyofutiwa usajili ni Jahazi Asilia, Chama cha Haki na Ustawi (Chausta) na APPT- Maendeleo.

APPT- Maendeleo inaongozwa na Peter Mziray ambaye pia ni Mwenyekiti wa Baraza la Vyama vya Siasa nchini.  

Akizungumza na JAMBO LEO jana Dar es Salaam, Mziray alisema chuki binafsi za Msajili ndizo zilizomsukuma kufuta vyama hivyo, lakini akasema anamwombea Jaji Mutungi Mwenyezi Mungu aendelee kumwongeza vyeo.

“Ni chuki binafsi hakuna la zaida, kwa sababu hapa kuna vyama vingine havina hata mwenyekiti wa kitongoji, kuna vyama vina migogoro na kuna vyama polisi wanadai vinavunja amani ya nchi. Sasa mimi APPT-Maendeleo nimemkosea nini?” Alihoji Mziray.

Mziray aliongeza kuwa sababu nyingine ni suala la Zanzibar, kwa kuwa yeye ni miongoni mwa viongozi waliokosoa na kubainisha kwamba hatua ya kufutiwa chama haimpi presha yoyote na kusema: “Wacha mapenzi ya Mungu yatimie.”

Alisema kwa kuwa Jaji Mutungi ni Mkristo kama yeye na kwa kuwa amemfutia chama, Mungu atamwadhibu hapa hapa duniani.  

Alisema kwa hali ilivyo sasa siasa inaelekea kubaya nchini kwa sababu ingawa yeye ni kiongozi, hakuna hata siku moja waliyokaa na Jaji Mutungi kuzungumza juu ya chama chake na wala hakuwahi kuitwa.

Alisema huenda ni kwa sababu Msajili huyo amechongewa kwa Rais John Mgufuli, kwamba alikuwa akituhumiwa kuwa ni mwana Ukawa hivyo kuchangia kufutwa kwa APPT- Maendeleo.

Awali, Jaji Mutungi akizungumza na waandishi wa habari alisema: “Nachukua nafasi hii kuutaarifu umma wa Watanzania kuwa, kwa mamlaka niliyopewa chini ya kifungu cha 19 cha Sheria ya Vyama vya Siasa namba 5 ya mwaka 1992, nimefuta usajili wa vyama vya siasa vitatu kuanzia leo Novemba 9.”

Jaji Mutungi alifafanua kuwa vyama hivyo vilipoteza sifa na kufikia hatua hiyo kutokana na kwenda kinyume na matakwa ya sheria ya usajili ikiwa ni pamoja na kushindwa kuwasilisha hesabu za mapato na matumizi ya mwaka kwa Mdhibiti na Mkaguzi Mkuu wa Hesabu za Serikali (CAG) kukaguliwa kwa mujibu wa kifungu cha 14(1)a.

Mengine ni kushindwa kuwasilisha kwa Msajili wa Vyama vya Siasa tamko la orodha ya mali za chama kwa mujibu wa kifungu cha 14(1)(b)(ii), kushindwa kutekeleza matakwa ya kifungu cha 15(1) kwamba mapato yote ya fedha ya chama yawekwe katika akaunti ya chama.

Aidha, alisema mashariti mengine yaliyokiukwa na vyama hivyo ni kutokuwa na ofisi ya chama Tanzania Bara na Zanzibar kwa mujibu wa kifungu cha 10(d), kutokuwa na wanachama Zanzibar kwa mujibu wa kifungu cha 10(b) na kushindwa kuweka kumbukumbu za mapato na matumizi ya chama kwa mujibu wa kifungu cha 14(1)a.

Mutungi alifafanua, kwamba kwa mujibu wa kifungu cha 7(3) Sheria ya Vyama vya Siasa, taasisi yoyote hairuhusiwi kufanya kazi kama chama cha siasa ikiwa haijasajiliwa kwa mujibu wa Sheria ya Vyama vya Siasa.

Aliwakumbusha waliokuwa wanachama na viongozi wa vyama hivyo, kwamba hawapaswi kufanya shughuli yoyote ya kisiasa kwa kutumia jina la chama kilichofutwa kwa kuwa kufanya hivyo ni kukiuka sheria za nchi ikiwamo ya vyama vya siasa.

Aliviasa vyama vya siasa kuheshimu Katiba na kanuni za vyama vyao ili kuepusha migongano ndani ya vyama ambayo inafanya vyama kuwa dhaifu na kushindwa kutekeleza sheria na majukumu yake kisiasa.

Share on Google Plus

About Unknown