NAIROBI, Kenya
 |
| Janeth Magufuli hospitalini |
PICHA ya Rais John Magufuli akimjulia
hali mkewe, Janeth, aliyelazwa katika Hospitali Kuu ya Taifa ya Muhimbili, Dar
es Salaam, imeibua mjadala mzito miongoni mwa Wakenya.
Picha ya CCTV iliyotolewa juzi na Ikulu
ya Tanzania ilimwonesha Magufuli na mkewe akiwa katika hospitali hiyo ya rufaa.
Hata hivyo haikufahamika mara moja
Janeth anasumbuliwa na nini lakini hospitali alimolazwa, ina hadhi sawa na
hospitali ya Taifa ya Kenyatta iliyoko jijini hapa.
Rais Magufuli, kutokana na vitendo
vyake, anatoa changamoto kwa marais wengine wa Afrika na maofisa wa serikali
wanaopendelea kupeleka wagonjwa wao katika hospitali za ng’ambo hata kwa
magonjwa madogo.
Kwa mujibu wa vyanzo vya habari,
hospitali hiyo ina eneo la meta za mraba 3,700 la wagonjwa wa nje linalohudumia
watu 1,000 kwa siku.
Ina vyumba 34 vya kuchunguza wagonjwa,
famasia na majengo ya mafunzo kwa wanafunzi wa udaktari na wataalamu wengine wa
afya.
Changamoto hiyo ya Magufuli inakuja siku
chache baada ya Gavana wa Bomet, Issac Rutto kwenda Afrika Kusini kupata tiba
maalumu ya jeraha kwenye jicho lake.
Jeraha hilo lilitokana na kipande cha
bomu la kutoa machozi kilichompata baada ya kurushwa na polisi waliokuwa
wakitawanya kundi la watu kwenye uwanja wa Silibwet, Bomet.
Agosti, Rais mstaafu Mwai Kibaki
alifanyiwa upasuaji uliofanikiwa wa mshipa wa shingo nchini Afrika Kusini.
Mkuu huyo wa Nchi wa zamani alilazwa
kwenye hospitali ya Netcare Sunninghill jijini Johannesburg, baada ya kupewa
rufaa kutoka hospitali ya Karen.
Vyanzo vya habari kutoka familia yake,
vilisema alipelekwa Afrika Kusini kutokana na ushauri wa madaktari wake.
Wakati huo huo, Salha Mohamed anaripoti,
kwamba Mama Magufuli aliyekuwa amelazwa katika wodi ya Sewahaji ameruhusiwa na
kurejea nyumbani.
Mama Magufuli aliruhusiwa jana baada ya
afya yake kuimarika kwani alipelekwa Muhimbili baada ya kuugua ghafla na
kupoteza fahamu.
Taarifa ya Mkurugenzi wa Mawasiliano ya
Rais, Ikulu, Gerson Msigwa alisema kabla ya kuondoka Sewahaji, Mama Magufuli
alishukuru madaktari na wauguzi wa Muhimbili kwa matibabu mazuri aliyopata.
Pia alishukuru Watanzania wote kwa kumwombea
afya njema ambapo alimshukuru Mungu kwani afya yake imeimarika.
"Napenda kushukuru madaktari na wauguzi,
nimepata huduma nzuri sana maana siku nilipoletwa hapa, sikuwa na fahamu na
hali yangu ilikuwa mbaya, lakini mmenipigania na leo narudi nyumbani nikiwa na
afya njema.
"Naomba pia nishukuru Watanzania
wote kwa kuniombea, nawahakikishia kuwa sasa niko vizuri na madaktari
wameniruhusu nirudi nyumbani ambako nitamalizia matibabu yangu," alisema
Mama Magufuli.
Mama Magufuli alilazwa hospitalini hapo
tangu juzi baada ya kuugua ghafla na kupoteza fahamu.
0 comments:
Post a Comment