Sharifa Marira, Dodoma
 |
| Freeman Mbowe |
KIONGOZI
wa Kambi ya Upinzani Bungeni, Freeman Mbowe, amechafua hali ya hewa bungeni, baada
ya kusema wabunge wa CCM wamehongwa Sh milioni 10 kila mmoja ili kupitisha
Muswada wa Huduma ya Habari na Mpango wa Maendeleo wa Taifa wa Mwaka 2017/18.
Mbowe
alitoa tuhuma hizo wakati wa kipindi cha maswali ya papo kwa hapo kwa Waziri
Mkuu jana ambapo pia kambi hiyo ilimshauri Rais John Magufuli ‘kumtumbua’
Waziri Mkuu Kassim Majaliwa, ikisema ndiye aliyeongoza kikao kilichotoa rushwa
hiyo.
Kambi
hiyo pia ilitaka ‘kutumbuliwa’ kwa Baraza la Mawaziri ikieleza kuwa limepoteza
sifa, kwani viongozi wa umma hawapaswi kupokea rushwa.
Mbowe
alisema wabunge na mawaziri ni viongozi wa umma kwa mujibu wa Sheria ya Maadili
ya Viongozi wa Umma, namba 13 ya mwaka 1995 lakini kuna taarifa kuwa Jumanne
saa mbili usiku katika kikao cha ndani cha CCM, fedha hizo zilitolewa.
Kwa
mujibu wa Mbowe, kikao hicho cha wabunge wa CCM kiliitishwa na Waziri Mkuu
Majaliwa na kuratibiwa na Naibu Katibu wa CCM, Abdallah Ulega na mgeni rasmi
alikuwa Katibu Mkuu wa Chama hicho, Abdulrahman Kinana.
“Tuna
taarifa kwamba kwenye kikao hicho ambacho lilijadiliwa suala la Muswada wa
Habari ambao unawasilishwa bungeni kesho (leo) na Mpango wa Maendeleo ya Taifa
ambao umeshawasilishwa mliamua kuwapa zawadi wabunge wote Sh milioni 10,”
alisema Mbowe.
Alisema
kwa taarifa alizonazo, fedha hizo zilitolewa kwa wabunge, mawaziri, Spika na Naibu
Spika ili kufanikisha kupitisha hoja hizo, jambo ambalo ni kinyume na Sheria ya
Maadili ya Viongozi wa Umma.
Hata
hivyo, Mbowe alikwenda mbali zaidi kwamba mgao huo uliendelea kutolewa katika
ofisi za CCM makao makuu ukiratibiwa na Naibu Katibu wa Wabunge wa CCM (Ulega)
ambaye pia ni Mbunge.
“Je,
Waziri Mkuu taarifa hizi ni za kweli?” Alihoji Mbowe.
Hata
hivyo, Naibu Spika Dk Tulia Ackson alizuia swali hilo kujibiwa akisema maswali
kwa Waziri Mkuu ni yanayohusu sera kwa hiyo wabunge wakumbushane vizuri na
kumtaka Mbowe aulize swali linalohusu sera.
Mbowe
alirudia swali lake na kudai kuwa masuala ya rushwa na masuala ya maadili ya
viongozi ni sehemu ya sera.
“Kama
Bunge hili linataka kuaminishwa kuwa masuala haya ambayo ni rushwa si ya kisera
masuala ambayo yako ‘ serious’ kwa Taifa, hutaki Waziri Mkuu atoe majibu, Waziri
Mkuu tunaomba ujibu swali tafadhali na Naibu Spika tuachie Waziri Mkuu ajibu
swali hili, ni swali la kisera,” alisema Mbowe.
Kutokana
na hali hiyo, Dk Tulia alimwambia Mbowe ataruhusu Waziri Mkuu kujibu maswali
yanayohusu sera kama ambavyo atamzuia mwingine yeyote.
“Kwa
hiyo hata wewe ndio maana nimekupa nafasi tena, ili uulize swali
linalohusu sera ndivyo kanuni zetu zinavyosema,” alisema Dk Tulia.
Mbowe
na Dk Tulia waliendelea kuvutana kuhusu swali hilo na Mbunge huyo wa Hai alipopewa
nafasi tena, alirudia na kusisitiza suala la rushwa katika Taifa ni la kisera,
linatokana na Sheria ya Kuzuia na Kupambana na Rushwa ya mwaka 2007 na ni
matunda ya sera.
“Kwa
hiyo hili swali ni la kisera na sijasema tuhuma hizi ni za kweli ila nimeuliza
Waziri Mkuu atujibu ni za kweli au si za kweli, Naibu Spika unalinda nini?”
Alihoji Mbowe.
Kutokana
na kauli hiyo, Dk Tulia alisema: “Nadhani kwa hapa sasa tulipofika kama wewe
unaona hili swali ni la sera, kanuni hizi ndio zinaniongoza mimi, kwa maana
hiyo nitaendelea na maswali mengine.”
Mwongozo
Mbunge
wa Momba (Chadema), David Silinde aliomba Mwongozo kwa Spika akidai kuwa swali
hilo halijapewa majibu sahihi na kutaka liundiwe tume huru ya kimahakama ya kibunge
ili lifanyiwe uchunguzi ndani ya Bunge.
Mbunge
wa Chemba (CCM), Juma Nkamia aliomba Mwongozo akitaka Mbowe athibitishe kauli
yake ndani ya Bunge, ya wabunge wa CCM kupewa fedha hizo na kama hawezi
kuthibitisha hatua zichukuliwe na Bunge.
Akijibu
miongozo hiyo Dk Tulia alifafanua sababu ya kuzuia kujibiwa kwa swali la Mbowe
kuwa ni kutokana na kuongelea mambo ya rushwa ambapo kwa mujibu wa sharia, vipo vyombo maalumu vya kushughulikia
na si Bunge.
Alisema
pia hawezi kumwambia Mbowe athibitishe kauli yake kwa wabunge kwa sababu suala hilo
alilizuia na kusisitiza kuwa kama kuna ushahidi upelekwe sehemu husika na baada
ya chombo hicho kufanya kazi ikithibitishwa watachukua hatua, kwa sababu
watakuwa wamevunja sheria.
Nje
ya Bunge
Kambi
ya Upinzani imesema itamwandikia barua Rais John Magufuli kumshauri ‘amtumbue’ Majaliwa
kutokana na kudaiwa kuhusika kwenye suala hilo, pamoja na kuundwa kwa tume ya
kimahakama ili ichunguze suala hilo.
Mbowe
ambaye alizungumza na waandishi wa habari kufafanua suala hilo, alisema Ulega
aliita wabunge wa CCM akiwambia Waziri Mkuu ana nia ya kukutana nao na
kutakuwa na mgeni rasmi ambaye ni Kinana na katika kikao hicho wabunge hawakufurahishwa
na namna Serikali inavyoendeshwa, mdororo wa kiuchumi, kukosekana kwa huduma za
jamii na mambo yanayolikabili Taifa.
“Waziri
Mkuu na Kinana walijaribu kuwatuliza wabunge ili waivumilie Serikali na kulinda
chama chao ikiwa ni pamoja na kupitisha mambo haya mawili na fedha hizo
ziligawiwa kwenye bahasha za khaki na dada anayeitwa Mariam, tunao ushahidi wa
kutosha,’’ alisema Mbowe.
Alisema
tuhuma hizo ni nzito zinamhusu Waziri Mkuu na Baraza la Mawaziri zinahusu Bunge
na uongozi wa Bunge ilistahili Serikali kujiuzulu na alipomwuliza Waziri Mkuu
kama angesema si kweli angemtaka kuundwa kwa tume ya kimahakama, kwa sababu Bunge haliwezi
kujichunguza.
“Inapofika
hatua sasa Dola inahonga wabunge, tuna Serikali hapa? Tumewabana wabunge wa CCM
wengine wamesema ni kutokana na maisha magumu kama Mbunge analipwa Sh milioni 10
kwa mwezi, anasema maisha ni magumu hao wananchi wanalipwa na nani?” Alihoji
Mbowe.
Mbunge
wa Singida Mashariki, Tundu Lissu (Chadema), alisema mtihani mkubwa wa pili ambao
anatakiwa Rais aufanye na kufaulu, ni kuchukua hatua ya ‘kumtumbua’ Waziri Mkuu
ili asikwepe.
Alisema
Rais afikirie upya uteuzi wa Dk Tulia kwa kuwa ana mamlaka ya kumwondoa na
umefika wakati wa kuyatumia kumwondoa bungeni kwa kuwa hafai.
0 comments:
Post a Comment