Suleiman Msuya na Fidelis Butahe
 |
| Rais Magufuli akizungumza na wahariri Ikulu |
WANASIASA na Wasomi wametaja makaburi manne ambayo Rais John Magufuli anapaswa kuyafukua,
likiwemo la Katiba Mpya, wakipingana na kauli ya kiongozi huyo mkuu wa nchi
kwamba hakuingia Ikulu kufukua makaburi.
“Katiba mpya ndio kaburi linalopaswa
kufukuliwa na iwapo tunaamua basi ile rasimu ya Warioba (Jaji Joseph-Mwenyekiti
wa Iliyokuwa Tume ya Mabadiliko ya Katiba) ndio inapaswa kuwa Katiba ya nchi. Itafaa
kufufua makaburi mengine,” alisema Zitto Kabwe, Kiongozi wa chama cha
ACT-Wazalendo.
Wakati Zitto akieleza hayo, Katibu Mkuu
wa Chadema, Vicent Mashinji alisema kauli ya Rais Magufuli kuhofia ‘kufua
makaburi’, inaweza kuwa mwanzo wa kushindwa vita dhidi ya ufisadi, jambo ambalo
lilipingwa na msemaji wa CCM, Christopher Ole Sendeka, aliyesema “Rais anafanya
mambo aliyojipangia, sio kufukua ya nyuma.”
Wakizungumza kwa nyakati tofauti na
gazeti hili waliyataja madudu mengine yanayohitaji kufukuliwa na Rais kuwa ni
sakata la Akaunti ya Tegeta Escrow, ufisadi katika mifuko ya hifadhi za jamii
pamoja na kashfa ya Meremeta.
Ijumaa
iliyopita, siku moja kabla ya kutimiza mwaka mmoja madarakani, Rais Magufuli
alizungumza na wahariri wa vyombo vya habari nchini na kuwataka Watanzania
wamwache anyooshe nchi kwanza ndio mengine yafuate, kutokana na kukutana na
‘madudu’ ambayo mengine hakuyatarajia, huku akitaja mfano wa mapya matatu
aliyokutana nayo.
Alitaja
madudu hayo kuwa ni kupotea kwa meli 60 bandarini, wanasiasa kukopa katika
mabenki na kutishia kufilisika kwa taasisi hizo pamoja na mkopo wa dola za
Marekani milioni 20, sawa na zaidi ya Sh bilioni 40, kwa ajili ya ujenzi wa
kiwanda mkoani Lindi, ambazo zimeyeyuka na kiwanda husika hakipo.
Wasomi
na wanasiasa hao walilieleza JAMBO LEO kuwa makaburi hayo yaliyotajwa na Rais
Magufuli si lolote si chochote mbele ya hayo manne waliyodai kuwa ndio msingi
wa kuirejesha Tanzania katika mstari ulionyooka.
Katika maelezo yake Zitto alisema maoni yaliyokuwemo katika rasimu ya Jaji
Warioba yaliyoondolewa kwa kiasi na wabunge wa CCM na kuingiza maoni yao
binafsi katika Katiba Inayopendekezwa,
ndio yaliyokuwa na majibu ya masuala yote yanayowasumbua viongozi kwa
sasa katika kufanikisha majukumu yao.
Alibainisha kwamba nchi ilifanya makosa kuingia
katika Uchaguzi Mkuu bila Katiba mpya, jambo alilodai huwafanya walioingia
madarakani kwa Katiba iliyopo, kujisahau kuwa kuna kilio cha kudai Katiba Mpya.
Alisema iwapo Katiba Iliyopendekezwa
ingepita pamoja na upungufu wake, ingesaidia kwa kiasi fulani kuleta mabadiliko
nchini, tofauti na Katiba ya sasa ambayo inampa madaraka makubwa Rais wa
Jamhuri ya Muungano wa Tanzania.
Kwa upande wake, Mashinji alisema kaburi
ambalo lipo wazi ila limemshinda ni ufisadi wa zaidi ya Sh bilioni 205
unaodaiwa kufanywa kupitia kampuni ya Meremeta iliyokuwa ikimilikiwa na Jeshi
la Wananchi Tanzania (JWTZ).
“Meremeta imelalamikiwa miaka yote,
lakini hakuna ufumbuzi wowote. Rais ameonesha dhahiri kuwa vita ya ufisadi imemshinda.
Viatu alivyovaa vinampwaya…, alishaingia katika mfumo wa CCM wa ‘upigaji’ kwani
makaburi yapo mengi ila amekiri kuwa hawezi kuyafukua.” alisema.
Alisema ndani ya CCM hakuna mtu ambaye
atatokea na kufanya mabadiliko katika nchi, huku akijipigia chapuo kuwa
wapinzani wanapaswa kuungwa mkono kwa maelezo kuwa wao ndio vigogo wa kupambana
na ufisadi.
Mhadhiri wa Chuo Kikuu cha Josia Kibira
cha mjini Bukoba, Dk Azavel Lwaitama alisema kinachomsumbua Rais Magufuli ni
kuingia madarakani na kukumbana na mfumo ambao ni zao la kuwa na Katiba
iliyopitwa na wakati, inayokifanya chama kilichopo madarakani kung’ang’ania
kutawala.
“Rais anapaswa kukaa meza moja na Jaji
Warioba pamoja na wajumbe wa tume ili wamueleze nini maana ya msingi wa Katiba
Mpya iliyotokana na maoni ya wananchi.
Hapo ndio anaweza kufanya mabadiliko ya nchi,” alisema.
”Unajua hata wakati wa utawala wa
Nyerere (Julius-Rais wa Awamu ya Kwanza) changamoto hizo zilikuwepo, lakini
sababu kubwa ni mfumo uliongiza vyama tawala madarakani na njia ya kutatua
changamoto hiyo ni kuviondoa madarakani au Katiba mpya.”
“Katiba ndio kaburi la kufufua. Rais
kuzungumza kwa mafumbo si njia sahihi ya kusaidia Watanzania kwani ni wazi
ameonesha kuanza kushindwa kutekeleza lengo la kusafisha nchi kwa mujibu wa
Katiba,” alisema Profesa Abdallah Safari.
Katibu wa Habari na Uenezi Chama cha
NCCR-Mageuzi, David Kafulila alitaja sakata la Escrow na Mifuko ya Hifadhi ya
Jamii, kusisitiza kuwa ni mambo ya msingi yanayopaswa kufukuliwa.
Alibainisha kuwa licha ya Rais kuitambua
kiundani kashfa ya Escrow, ameonesha kushindwa mapema jambo ambalo
linawakatisha tamaa wananchi walioanza kujenga imani naye.
“Mifuko ya hifadhi za jamii ina uchafu
mwingi sana, lakini kwa kuwa CCM imekuwa ikiitumia mifuko hiyo ni ngumu kwake
(rais) kuishukia na kuibua madudu yake,” alisema.
“Nadhani unaona hadi leo Tanesco
linaendelea kuilipa IPTL na kati ya malipo hayo nusu zinaenda kampuni ya Simba
Trust ambayo mpaka sasa hatujui wamiliki wake ni akina nani? Hakuna maelezo ya
kutosheleza yanayotolewa kuhusu suala hilo.”
Kafulila ambaye aliibua sakata la
Escrow, alibainisha kuwa kauli hiyo ya Rais inakatisha tamaa kwa sababu
wananchi wamekuwa wakimuombea ili aweze kutekeleza majukumu yake vizuri, “kesi
kubwa zitachinjwa maana mwenye nchi ameshaamua kutofukua makaburi.”
Alisema wakati mifuko ya hifadhi ikiwa
na kashfa waliokuwa viongozi wake wanateuliwa kushika nafasi mbalimbali, huku
wanaoshughulikiwa wakiwa watu wa ngazi za chini.
Akizungumzia kauli hiyo ya Rais
Magufuli, Ole Sendeka alisema, “Rais anatakiwa aende mbele ili kunyoosha nchi
na si kurudi nyuma kwani kunamchelewesha…, hakuna kashfa ambayo itaachwa kama
kuna ushahidi kwa kisingizio cha kutofufua makaburi,” alisema.
0 comments:
Post a Comment