Ligi Kuu Bara sasa tamu

Mshamu Ngojwike

KWA sasa Ligi Kuu Tanzania Bara ilipofikia ni zaidi ya fainali, hilo halina ubishi kutokana na miamba ya soka nchini, Simba na Yanga kuhitaji pointi kila mechi.

Kwa lugha nyepesi unaweza kusema utamu sasa umekolea kwani hakuna timu inayohitaji kupoteza pointi kijinga na kumpa mwenzake faida.

Utamu huu unakolezwa kutokana na vita iliyopo kwa miamba miwili ya Ligi Kuu Tanzania Bara, Simba na Yanga ambao wanawania kumaliza mzunguko huu zikiwa kileleni mwa msimamo wa ligi hiyo.

Simba wao wana akili ya kutopoteza mchezo wowote ili kuepuka kukutwa na wapinzani wa Yanga ambayo inashika nafasi ya pili ikiwa na alama 27, nyuma ya alama tano na vinara wa ligi, Wekundu wa Msimbazi.

Achana na kukutwa na Yanga, lakini Simba inahitaji kulinda heshima yake ya kutopoteza mchezo msimu huu, ambapo katika michezi 12 waliyocheza hakuna waliyofungwa.

Yanga inahitaji kushinda mechi zilizosali, ili nao wasiruhusu alama nyingi kupitwa na Simba inayoongoza msimamo huo wa Ligi kuu Tanzania Bara.

Yanga inaamini endapo ikipoteza mchezo ama kutoka sare na timu yoyote ile ni kuipa kiburi Simba na kuzidi kutanua kileleni mwa msimamo huo ambao wameachwa kwa idadi kubwa ya pointi.

Katika Makala haya, nakuletea kile kilitokea kwenye michezo iliyopita ya Ligi Kuu Tanzania Bara kwa timu zote.

Simba inaukuta wa chuma

Simba msimu huu imeonekana kuwa makini kuanzia safu ya ulinzi kuwa imara ambao wameruhusu mabao machache kuliko timu nyingine yoyote ya Ligi Kuu Tanzania Bara.

Hadi sasa Simba imefungwa mabao matatu tu, katika michezo 12 iliyocheza wakati ikifunga mabao 24 na kuongoza msimamo wa ligi hiyo ikiwa na alama 32.

Hii inatokana na maelewano ya mabeki wao wa kati, Method Mwanjale ambaye anaungana na Juuko Murshid na Novaty Lufunga aliyekuwa katika kiwango bora msimu huu.

Fowadi ya Yanga tishio

Hakuna safu ya ushambuliaji iliyotishio msimu huu kama ya Yanga kwa timu zote zinazoshiriki Ligi Kuu Tanzania Bara.

Yanga imefunga mabao 27 katika michezo 12 iliyocheza, lakini ikiruhusu kufungwa mabao matano tu, hivyo kuwa na wastani mzuri wa kupachika mabao ukiacha timu zote za Ligi Kuu Tanzania Bara.

Washambuliaji wake wanne, Amis Tambwe, Donald Ngoma, Simon Msuva na Obrey Chirwa wamefunga mabao 21 msimu huu ikiwaacha washambuliaji kibao katika timu nyingine.

Majimaji kinara wa kuachia

Ukiacha kuburuza mkia katika msimamo wa Ligi Kuu Tanzania Bara, lakini Majimaji ndiyo klabu iliyoruhusu kufungwa idadi kubwa ya mabao msimu huu.

Katika michezo 13 iliyocheza Majimaji msimu huu, imeruhusu mabao 23, ikifunga mabao 10 tu licha ya kufanya mabadiliko kwenye benchi la ufundi.

Share on Google Plus

About Unknown