Acacia waipa hospitali vifaatiba

Neema Sawaka, Kahama

Fadhili Nkurlu

KAMPUNI ya uchimbaji madini ya Acacia Buzwagi imeipa vifaatiba hospitali ya wilaya vyenye thamani ya Sh 22,410,000 ili kuokoa maisha  ya watu na kuboresha huduma za afya.

Akizungumza wakati akikabidhi  vifaa hivyo jana Meneja wa Mgodi wa Acacia Buzwagi, Asa Mwaipopo alisema  kampuni  hiyo imetoa msaada huo   baada  ya kutembelea hospitali hiyo na kushuhudia wagonjwa wakibebwa mgongoni badala ya viti vya magurudumu au machela. 

Mwaipopo alisema  waliguswa na hali hiyo na kutoa vifaa tiba ili kupunguza tatizo la vifaa na kuboresha huduma     na   kusaidia kuokoa maisha ya watu.

Alitaja vifaa tiba vilivyotolewa kuwa ni  mashine tatu za oksijeni, viti vya magurudumu vitano, machela, mashine  ya ufuatiliaji mapigo ya moyo na mashine ya kusafishia vifaa vya upasuaji. 

Akipokea msaada  huo,  Mkanga Mkuu wa Halmashauri ya Wilaya,  Bruno Minja  alishukru wawekezaji hao  na kuongeza kuwa  hospitali inakabiliwa na msongamano mkubwa  wa wagonjwa  kutoka halmashauri za Ushetu, Msalala, Urambo, Tabora, Ulyanhulu na Kaliua.   

Alisema vifaatiba hivyo ni msaada mkubwa na muhimu sana kwao  ambapo kwa siku hospitali inahudumia wagonjwa 600.

Mkurugenzi wa Halmashauri ya Mji, Underson Msumba  aliushukuru  uongozi wa Buzwagi   akisema wamekuwa  wadau wakubwa wa maendeleo  ambapo wamesaidia kuboresha huduma za jamii  katika sekta za afya, maji na elimu.

Mkuu wa Wilaya, Fadhil Nkurlu  aliwataka  madaktari na wauguzi wa hospitali hiyo kutunza vifaa hivyo na kuhakikisha  vinatumika kwa malengo  yaliyokusudiwa.

Share on Google Plus

About Unknown