Fidelis Butahe na Hussein Ndubikile
 |
| Julius Mtatiro |
WAKATI watumishi na viongozi wa umma 9,932
wakipoteza ajira zao kwa madai ya kughushi vyeti, wanasiasa nchini wamekosoa
kitendo cha mawaziri, wabunge, wakuu wa mikoa na wilaya kuachwa kwenye uhakiki
huo ulioacha vilio na simanzi maeneo mbalimbali nchini.
Wakizungumza na gazeti hili kwa nyakati
tofauti walisema haki hutolewa kwa watu wote si kundi fulani pekee huku Mwenyekiti
wa Kamati ya Uongozi ya CUF, Julius Mtatiro, akienda mbali zaidi na kueleza
ugumu wa kutenganisha dhana ya siasa na utumishi wa umma kwa mawaziri, wabunge,
wenyeviti wa vijiji na madiwani.
“Hawa wenye vyeti feki haikupaswa
kuwafukuza. Kwanza, ilitakiwa kuangalia miongoni mwao je wapo walioonesha weledi
kazini? Nasema hivi kwa sababu wapo wenye cheti feki cha kidato cha nne, lakini
wana Shahada na ni watendaji wazuri,” alisema Mtatiro.
“Pia wapo madaktari bingwa wenye vyeti
feki vya kidato cha nne, lakini kwa sasa wanaaminika sana, sasa huyu
unamfanyaje. Unamfukuzaje huyu?”
Takribani wiki moja iliyopita Waziri wa
Nchi Ofisi ya Rais, Utumishi wa Umma na Utawala Bora, Angella Kairuki
alikabidhi majina ya watumishi hao kwa Rais John Magufuli baada ya kuvifanyia
uhakiki vyeti vyao kwa kushirikiana na Wizara ya Elimu, Sayansi, Teknolojia na
Ufundi.
Alisema uhakiki huo haukugusa viongozi
wa kisiasa wakiwamo mawaziri, wabunge, wakuu wa mikoa, wakuu wa wilaya na
madiwani.
Wakati Kairuki akisema watu hao wanatakiwa
kuchukuliwa hatua pamoja na mawakala wanaotumika kutengeneza vyeti, Rais
Magufuli aliagiza waondoke kazini wenyewe na kunyimwa mishahara yao ya Aprili.
Kati ya watumishi 400,035 waliofanyiwa
uhakiki wa vyeti vya kidato cha nne, sita na ualimu waliopatikana wakiwa safi
ni 376,969 sawa na asilimia 94.2.
Katika maelezo yake, Mtatiro alisema: “Kwanza
kwa dhana ya uanzishwaji wa wakuu wa mikoa na wilaya hawa si wanasiasa, ni
watumishi wa umma. Wanasiasa katika Serikali wapo wa aina nne; kwanza kuna rais,
makamu wake na waziri mkuu, pili ni
mawaziri, tatu ni wabunge na nne ni
madiwani,” alisema Mtatiro.
“Huwezi kutenganisha dhana ya siasa na
utumishi wa umma kwa mawaziri, wabunge, wenyeviti wa vijiji na madiwani. Hawa
wote ni watumishi wa umma kwa sababu wanalipwa mishahara na fedha za umma.”
Alisema kwa kuwa wote ni watumishi wa
umma, haiwezekani ufanyike uamuzi wa kubaini vyeti feki halafu baadhi ya watu waachwe.
Alibainisha kuwa vita dhidi ya vyeti
feki ilipaswa kumulika wanasiasa, kama ni wabunge taarifa zao zifuatiliwe
kubaini waliodanganya elimu zao.
“Hii ilipaswa kuanzia juu na
watakaobainika kuonywa na kuchukuliwa hatua. Iweje uanze na kada ya chini ya utumishi
wa umma na kuacha kada ya juu ya utumishi wa umma? Hili ni jambo lisilokubalika,
tunapongeza ila hatua zinazochukuliwa ndizo tunazopinga,” alisema.
Alisema Rais mzuri anaweza hata kutembelea
majambazi walioshindikana gerezani na kusisitiza kuwa ni ajabu kuona Rais
akisema watu walio magerezani si raia wake, kwa sababu tu ya makosa yao na
kufananisha jambo hilo na watumishi wa umma waliofukuzwa kwa vyeti feki huku
wengine wakiachwa kwa kigezo cha uanasiasa.
Alisema watendaji wa aina hiyo walipaswa
kuandaliwa programu maalumu ili kurudia kidato cha nne na kupata cheti halali au
kuachishwa kazi kwa maslahi ya umma, ikiwa ni pamoja na kulipwa mafao yao yote.
“Wapo walioitumikia Serikali kwa miaka
30, mtu huyu unamfukuzaje hivi hivi. Si bora wapewe likizo ya miaka miwili na
kulipwa nusu mshahara ili wakasome na kupata cheti cha kidato cha nne,”
alisema.
Akimtolea mfano mteule wa Rais ambaye
kwa sasa ni Mkuu wa Mkoa wa Dar es Salaam, Mtatiro alihoji: “Huyu alifeli
kabisa sasa mbona mpaka leo yupo huku wengine wakiondolewa?”
Katibu Mkuu wa Chama cha Wakulima (AFP),
Rashid Rai alisema: “Hili jambo si sawa hata kidogo. Kughushi vyeti hakupaswi
kuangalia hadhi ya mtu. Awe waziri, mbunge au mtu wa kawaida kama ana cheti
feki anapaswa kuchukuliwa hatua tu.
“Kama sifa kwa wanasiasa inaelezwa kuwa
ni kusoma na kuandika, mbona katika uombaji kazi, mfano wabunge wanataja mpaka
shahada walizonazo? Huu ni uongo wa mchana kabisa, ni sawa na dhambi za wizi,
uwe mdogo au mkubwa ni wizi tu.”
Tofauti na Mtatiro, Rai alisema kuliko
kuwapa muda maalumu warudie kidato cha nne, ni bora wafukuzwe kazi na kuchukuliwa
hatua.
Mwenyekiti wa NCCR-Mageuzi, James Mbatia
alisema: “Nitalizungumzia kwa kina kwenye hotuba ya elimu wakati nawasilisha
maoni ya upinzani kuhusu bajeti ya Wizara ya Elimu, nitaweka vielelezo na
kuanika udhaifu mkubwa katika hili.”
Katibu Mkuu wa National League for
Democracy (NLD), Tozy Matwanga alisema uamuzi wa Rais ni mzuri na kumwomba uhakiki
huo ufanyike kwa wakuu wa mikoa, wakuu wa wilaya, wabunge na mawaziri.
"Watumishi hawatakiwi kuwa na doa
la kitaaluma, maana madhara yake ni utendaji mbovu usioridhisha. Kuwaacha
baadhi kunaweza kuitia doa Serikali kwa wananchi na kuanza kuhisi kuna viongozi
wanalindwa akiwamo Mkuu wa Mkoa wa Dar es Salaam ambaye ana cheti feki,”
alisema.
Mjumbe wa Kamati Kuu ya Chadema, Profesa
Mwesiga Baregu alisema udhaifu wa kukagua vyeti vya watumishi unasababishwa na
Rais kuhodhi madaraka makubwa kwa mujibu wa Katiba.
"Watumishi wa umma wengi
wanateuliwa na Rais, kila rais ana vigezo vyake, achilia hiyo Katiba inayompa madaraka
ya kuwateua kwa kigezo cha kujua kuandika na kusoma," alisema Profesa
Baregu.
Mjumbe huyo wa iliyokuwa Tume ya
Mabadiliko ya Katiba alisema Tume hiyo ilitoa rasimu ya Katiba iliyopunguza
madaraka ya rais katika uteuzi wa mawaziri, wabunge, wakuu wa wilaya, mikoa na
madiwani.
“Katika rasimu tulipendekeza uteuzi huo
ufanywe na Tume ya Utumishi wa Umma,” alisema.
0 comments:
Post a Comment