Udhibiti mapato kupunguza kodi za watumishi

Jemah Makamba

Zitto Kabwe

MBUNGE wa Kigoma Mjini na Kiongozi Mkuu wa Chama cha ACT-Wazalendo, Zitto Kabwe amesema udhibiti wa mapato kutokana kodi za kimataifa utasaidia kupunguza kodi kwa wafanyakazi nchini.

Aidha, amewashauri wafanyakazi wa Tanzania, kutambua kwamba wanapaswa kutambua uhusiano chanya kati ya maslahi yao na aina ya uongozi wa kisiasa kwenye Taifa akiwataka wasikae kando kwenye harakati za mabadiliko ya kisiasa nchini.

"Jana ni siku yenu katika mwaka. Kama ilivyo kawaida siku hii husherehekea kwa maadhimisho makubwa ambapo waajiri Serikali na sekta binafsi hutoa hotuba hivyo ni lazima mzingatie mahitaji yenu,” alisema.

Alisema pamoja na sherehe hizo, bado ajira zinazotolewa nchini ni chache ikilinganishwa na idadi ya Watanzania wenye sifa za kuajiriwa.

Zitto alisema takwimu zinaonesha kuwa ni wafanyakazi milioni 2.1 sawa na asilimia tisa ya nguvukazi yote ya Taifa.

“Sekta binafsi waliajiriwa wafanyakazi milioni 1.4 sawa na asilimia 67 na sekta ya umma 700,000 sawa na asilimia 33,” alisema.

Alisema sekta isiyo rasmi imeajiri asilimia 91 ya Watanzania, hali ambayo inachangia kukosekana kwa mapato mengi.

Mbunge huyo alisema asilimia kubwa ya kundi hilo inajihusisha na kilimo, biashara ndogo, uvuvi, ufugaji, uchimbaji wa madini na utoaji huduma.

Alisema zipo kampuni zinazokwepa kulipa kodi, hivyo wamiliki wake kujilimbikizia mali nyingi na kuongeza tofauti ya kipato kati ya wananchi.

Alisema kama hatua madhubuti hazitachukuliwa tofauti ya kipato itazidi kuongezeka na kuleta hatari kubwa kwa ustawi wa wananchi na nchi.

"Mwaka 2015/16 kampuni zilichangia Sh bilioni 773 wakati wafanyakazi walichangia Sh trilioni 2.2  na mwaka 2014/15 yalichangia Sh bilioni  600 na wafanyakazi Sh trilioni 1.9 kama kodi zao kwenye mapato ya Serikali," alisema.

Alisema ni muhimu Serikali itazame upya michango ya wafanyakazi kwenye Mifuko ya Hifadhi ya Jamii kwa kuwa viwango hivyo kwa Tanzania viko juu mno na vinapunguza kipato cha mfanyakazi na kuongeza gharama kwa waajiri.

Zitto pia aliitaka Serikali ifanye marekebisho ya sheria za kodi zinazohusisha kampuni ya kimataifa ili kuzuia kumomonyoa wigo wa kodi  unaofanywa na kampuni hizo.

Kuhusu wafanyakazi kutojitenga na siasa alisema historia inaonesha vyama vya wafanyakazi vina nguvu zaidi ya kuhamasisha na kuweka mazingira mazuri ya kidemokrasia na utawala wa kikatiba nchini.

Share on Google Plus

About Unknown