Serikali: Morogoro ilikithiri migogoro ya ardhi

Mwandishi Wetu

SERIKALI ilianza kutatua changamoto ya migogoro ya ardhi mkoani   Morogoro kwa kuwa ndio ulikuwa umekithiri kuliko mingine nchini, imeelezwa.

Kauli hiyo ilitolewa jana na Naibu Waziri wa Ardhi, Nyumba na Maendeleo ya Makazi, Angelina Mabula akijibu swali la nyongeza la Mbunge wa Mtwara Vijijini, Hawa Ghasia (CCM) lililohoji sababu za Serikali kuanza kazi hiyo mkoani humo, licha ya kuwa tatizo hilo liko karibu mikoa yote.

Akifafanua, Mabula alisema migogoro ya ardhi Morogoro ilikuwa mingi tofauti na mingine hivyo wakaamua kuanzia huko ili baadaye mikoa iliyobaki.

Swali hilo la nyongeza lilitokana na swali la msingi la Mbunge wa Viti Maalumu, Amina Makiragi (CCM) lililohoji namna Serikali ilivyojipanga kupima ardhi ili kuondokana na migogoro nchini.

Wakati akijibu swali hilo, Mabula alisema azma ya Serikali ni kuhakikisha programu ya kupanga na kupima ardhi inafanyika ili kuhakikisha migogoro inapungua, kuwezesha wananchi kutambua maeneo yao na kukabiliana na changamoto za athari za mabadiliko ya tabianchi.

“Hiyo itahusisha halmashauri 181 kwa miaka 10 na itafanyika kwa awamu mbili za miaka mitano mitano na mikoa iliyobaki itawekwa kwenye ratiba hiyo,” alisema.

Share on Google Plus

About Unknown