‘Mpemba’, wenzake kusomewa maelezo ya awali

Grace Gurisha

UPANDE wa Serikali katika kesi ya Yusuf Yusuf ‘Mpemba’ (34) anayetuhumiwa kwa ujangili, leo unatarajiwa kumsomea maelezo ya mashahidi pamoja na wenzake, baada ya upelelezi wa kesi hiyo kukamilika.

Maelezo hayo yatasomwa mbele ya Hakimu Mkazi, Victoria Nongwa wa Mahakama ya Hakimu Mkazi Kisutu, Dar es Salaam kwa sababu awali upande huo ulidai kuwa wanajiandaa kuwasomea maelezo hayo.

Wakili wa Serikali, Elia Athanas alieleza hayo Dar es Salaam baada ya upelelezi kukamilika.

Alidai kuwa kesi hiyo ilikuja kwa kutajwa na pia kuna maelezo yaliyochapwa yamerudishwa na Mahakama Kuu ya Tanzania Kanda ya Dar es Salaam, kwa sababu maelezo hayo yametofautiana na maelezo halisi, hivyo wanatakiwa wafanye marekebisho.

Alidai licha ya upungufu huo, lakini bado wanajiandaa kuwasomea maelezo ya mashahidi washitakiwa wote.

Mbali na Mpemba ambaye ni mkazi wa Tegeta washitakiwa wengine ni Charles Mrutu (37) wa Mlimba, Morogoro, Benedict Kungwa (40) wa Mbagala Chamazi, Jumanne Chima (30) wa Mbezi, Ahmed Nyagongo (33) dereva na Pius Kulagwa (46).

Washitakiwa hao wanadaiwa kujihusisha na mtandao wa ujangili na biashara ya meno ya tembo yenye thamani ya Sh milioni 785.6.

Ilidaiwa kuwa katika tarehe zisizofahamika kati ya Januari, 2014 na Oktoba, mwaka jana wakiwa maeneo tofauti ya Dar es Salaam, Tanga, Iringa na Mtwara, walijihusisha na mtandao wa ujangili kwa kukusanya na kuuza nyara za Serikali vipande 50 vya meno ya tembo vyenye thamani ya dola za Marekani 180,000 sawa na Sh milioni 392.8 mali ya Serikali bila kuwa na kibali cha Mkurugenzi wa Wanyamapori.

Aliendelea kudai kuwa katika mashitaka ya pili, Oktoba 26 mwaka huu, washitakiwa wakiwa Mbagala Zakhem ndani ya wilaya ya Temeke walikutwa na vipande 10 vya meno ya tembo vyenye uzito wa kilo 13.85 vyenye thamani ya dola 30,000 sawa na Sh milioni 65.4.

Ilidaiwa kuwa katika mashitaka ya tatu, Oktoba 27 washitakiwa wakiwa Tabata Kisukulu walikutwa na vipande vinne vya meno hayo  vyenye uzito wa kilo 11.1 vyenye thamani ya dola 15,000 sawa na Sh milioni 32.7, ambapo pia Oktoba 29 walikutwa na vipande 36 vyenye thamani ya Sh milioni 294.6 bila kibali cha Mkurugenzi wa Wanyamapori.

Share on Google Plus

About Unknown