Bodaboda wakataa ushirikiano na trafiki

Grace Gurisha

MADEREVA wa bodaboda wametoa msimamo wa kutosaidia askari wa Jeshi la Polisi Kikosi cha Usalama wa Barabarani wanapopatwa na matatizo.

Wamefikia hatia hiyo kwa walichodai kuwa wasimamizi hao wa sheria hawana huruma kwani huwatoza faini bila makosa.

Wakizungumza kwa nyakati tofauti jana Dar es Salaam, madereva hao walisema wamekuwa wakitoa msaada mkubwa askari wanapopata matatizo kazini, lakini wao wamekuwa wagumu kuwasadia hata kuwasikiliza na kuwabambikia makosa na kuchukua fedha zao kwa rushwa au faini.

Mmoja wa madereva hao, Emmanuel Noel alisema askari hao wamekuwa wakiwaonea bila sababu ya msingi hali inayoendelea kukithiri kwa kasi kutokana na hali ngumu ya kimaisha sasa, hivyo huona nafuu yao ni kukamata bodaboda.

“Askari wamekuwa wakigongwa na magari wakiwa kazini, sisi tunafanya jitihada za kulifukuzia gari hilo hadi kulikamata bila hata kulipwa, wakati mwingine tunawasafirisha bure tukidhani ni wenzetu, kwani kila siku tuko nao barabarani, lakini wao hawatuchukulii sisi kama wenzao,” alisema Noel.

Aliongeza: “Hivi karibuni askari alipigwa kibao na mtu aliyekuwa ndani ya gari wakati anaongoza magari kwenye mataa ya Tazara, nilimchukua askari huyo na kulifukuzia gari hadi akalikamata, lakini wao wanashindwa kututhamini sisi, kwa hiyo hakuna haja nasi kuwathamini.”

Dereva mwingine, Hashim Omary anayefanya kazi Tabata Kimanga, alisema kila siku Polisi inawahamasisha wafanye kazi pamoja, lakini askari wamekosa ushirikiano kwao kwa sababu hata wanapopata tatizo au kufanya kosa, hawawapi nafasi ya kusikilizwa.

Omary alisema ikitokea wao wamefanya kosa, askari hawataki hata kuwasikiliza, jambo ambalo si zuri na kwamba trafiki hao walichokiweka mbele ni faini.

“Sijui ndiyo kutekeleza ile aliyosema Rais wapate hela ya kiwi? Juzi hapa kituoni kulikuwa na askari, ghafla akaumwa tumbo, nilimchukua hadi hospitali ya Amana, sikumdai hata shilingi moja, lakini cha kushangaza wao hawana huruma nasi kwa kututoza fedha bila sababu,” alisema Omary.

Shabani Zuberi aliomba Serikali kupunguza ugumu wa maisha kwa kuiacha fedha izunguke kwa sababu maisha yamekuwa magumu na askari wameamua kuponea kwenye bodaboda.

Share on Google Plus

About Unknown