Wakulima, wafugaji Geita waingia kwenye mgogoro

Salum Maige, Geita

JAMII za wakulima na wafugaji zilizovamia Hifadhi ya Taifa ya Misitu ya Geita mkoani Geita, zimeingia kwenye mgogoro baada ya wafugaji kuwatuhumu wakulima kujeruhi ng’ombe zao kwa mapanga.

Mgogoro huo pia unadaiwa kutokana na wakulima kuvamia vyanzo vya maji na kuendesha shughulisha za kilimo, huku wafugaji wakitumia vyanzo hivyo kunywesha mifugo yao na kulisha ngombe zao.

Baadhi ya wafugaji walisema kwa nyakati tofauti kuwa matukio ya ng’ome kukatwa mapanga yameanza kutokea tangu mwaka jana na hadi sasa tayari ng’ombe wanane wamejeruhiwa.

“Juzi saa 10 jioni alikamatwa mfugaji Robert Kabulizina na wakulima kwa kushirikiana na mgambo akapelekwa hadi kituo cha polisi akituhumiwa kulisha mifugo kwenye mazao ya Bahati yaliyo kwenye hifadhi hiyo. Kwa kuwa tatizo hilo limekuwa kwa muda mredu, tunaiomba Serikali iingilie kati kulitatua kwani yanaweza kutokea mauaji,”alisema mfugaji Mapinduzi Salehe.

Mkurugenzi wa Halmashauri ya Mji wa Geita, Modest Apolinary, Ofisa Mazingira Pancrace Shwettelele pamoja na Mwenyekiti wa Mtaa wa Upendo ulio jirani na hifadhi hiyo, Dk Deodratias Katunzi juzi walitembelea maeneo yenye mgogoro huo kujionea hali halisi.

Dk Katunzi alimwambia mkurugenzi huyo kuwa kwa sababu wote wakulima na wafugaji wana makosa ya kuvamia hifadhi, Serikali inapaswa kuangalia utaratibu wa kuwasaidia wafugaji kupata maeneo ya kuchungia na kunyweshea mifugo wao.

“Wafugaji hawana maeneo kabisa ya kufugia mheshimiwa mkurugenzi, lakini wakulima wana maeneo ya kulima, kinachotakiwa ni Serikali kuangalia utaratibu wa kutenga maeneo ya kuchungia mifugo,”alisema Dk Katunzi.

Hata hivyo, mkulima Deus Kulwa alisema kinachowafanya wavamie hifadhi hiyo na kujishughulisha na kilimo ni umasikini unaowakabili na kwamba wamekuwa wakijishughulisha na kilimo cha mazao ya chakula na biashara kwa ajili ya kujipatia kipato.

Mkurugenzi wa Halmashauri ya Mji wa Geita, aliunda timu ya watu 12 ya wakulima na wafugaji yenye kazi ya kuhakikisha hakutokei tena uharibifu wa mazingira ndani ya hifadhi hiyo.

Share on Google Plus

About Unknown