Wanachuo 12 kujifunza masoko ya dhamana

Salha Mohamed

WANAFUNZI 12 wa vyuo vikuu nchini wanatarajia kwenda Ghana kujifunza na kuongeza uwezo kwenye masoko ya dhamana na mitaji.

Hayo yalibainishwa Dar es Salaam juzi kwenye hafla ya utoaji tuzo kwa washindi wa masoko ya dhamana na mitaji ulioshirikisha wanafunzi 7,791 wa vyuo vikuu vya nchini huku walioshinda nafasi hizo, wakiwa ni 80 pekee.

Akizungumza baada ya mchakato wa kupata washindi wa tuzo hizo, Naibu Waziri wa Fedha na Mipango, Dk Ashatu Kijaji alisema wanafunzi waliofaulu tuzo hizo watakuwa mabalozi wazuri wanakokwenda kujifunza.

"Kwenda kwenu Ghana kutasaidia kuwajengea uwezo washiriki wote katika soko la mitaji ... mkirudi muwe mabalozi wazuri wa kufundisha wengine elimu hiyo nchi nzima," alisema.

Alisema mwaka jana wanafunzi hao walikwenda Afrika Kusini, na Serikali iliahidi kuwakwamua watakapokwama.

"Nitoe rai kwa mamlaka hii kuwafikia wananchi na kueleza umuhimu kwa jamii ili kutanua huduma mnayotoa, lakini pia mamlaka kukubaliana na changamoto kwa kutoa elimu na kujenga uwezo ili kuongeza hamasa," alisema.

Aliongeza kuwa kupata ujuzi huo kutapunguza idadi ya wananchi wanaokaa mitaani kwani watajiajiri na kuongeza pato la Taifa kwa asilimia 7.

Alisema ni vema vijana hao wakajengewa uwezo na kujiamini kuzungumza mbele za watu na kwamba mashindano mengine yatashirikisha walimu wa sekondari.

Mshindi wa kwanza alipata Sh milioni 1.8, wa pili Sh milioni 1.4  wa tatu wakichukua Sh 500,000 na wa nne na wa tano wakishinda Sh 200,000 kila mmoja.

Washindi hao walitoka vyuo vikuu vya Ardhi, Dar es Salaam (UDSM), Mzumbe, Dodoma (UDOM), cha Usimamizi wa Fedha (IFM) na Chuo cha Uhasibu (TIA).

Share on Google Plus

About Unknown