Tanesco hali si shwari tena

* Wakurugenzi watatu wang’olewa kisha warudishwa chuoni
* Ni siku chache baada ya Mkurugenzi Mtendaji kutumbuliwa

Mwandishi Wetu

HALI si shwari ndani ya Shirika la Umeme Tanzania (Tanesco). Ndivyo unavyoweza kusema baada ya wakurugenzi watatu wa shirika hilo kushushwa vyeo huku mwingine akiacha kazi.

                                                            

Tukio hilo limekuja siku tano baada ya Rais John Magufuli kutengua uteuzi wa Mkurugenzi Mtendaji wa Shirika hilo, Felchesmi Mramba na siku moja tangu kuanza kazi kwa Dk Tito Mwinuka, aliyeteuliwa kukaimu nafasi hiyo.

Habari za uhakika kutoka miongoni mwa watendaji waandamizi ndani ya shirika hilo zilizolifikia gazeti hili jana, zilieleza kuwa wakurugenzi hao watatu wamehamishiwa katika Chuo cha Tanesco (TSS) kilichoko eneo karibu na stesheni ya Kampuni ya Reli Tanzania (TRL), Dar es Salaam.

Uamuzi huo unaelezwa kufikiwa na Bodi ya Wakurugenzi ya Shirika hilo chini ya uenyekiti wa Dk Alex Kyaruzi baada ya kukutana na Dk Mwinuka na kwamba watendaji hao wameshakabidhiwa barua za kujulishwa uamuzi huo.

Pamoja na hatua hiyo, Watson Mwakyusa ambaye alikuwa Mkurugenzi wa Idara ya Rasilimaliwatu, ameamua kuacha kazi.

“Sina mengi ya kueleza kuhusu hilo. Kwa taarifa zaidi naomba uwasiliane na Msemaji wa Tanesco kwa ajili ya ufafanuzi zaidi,” alisema Dk Kyaruzi alipoulizwa kuhusu suala hilo.

Gazeti hili lilipomtafuta Msemaji, Leyla Muhaji alisema hana taarifa zozote, lakini watendaji hao waandamizi walilithibitishia gazeti hili kuwa watendaji hao wameshushwa vyeo.

Walioshushwa vyeo ni Naibu Mkurugenzi wa Uwekezaji wa Shirika hilo, Decklan Mhaiki, aliyekuwa Mkurugenzi wa Usambazaji, Sophia Mgonja na Johary Kachwamba aliyekuwa Mkurugenzi wa Uzalishaji.

Mramba uteuzi wake ulitenguliwa Januari mosi na Rais Magufuli ambaye papo hapo alimteua Dk Mwinuka ambaye ni msomi wa Chuo Kikuu cha Dar es Salaam.

Uamuzi huo ambao haukuelezwa sababu, ulichukuliwa muda mfupi baada ya Rais Magufuli kuwaweka kikaangoni vigogo waliotangaza kupandisha bei ya umeme, akisema hatua hiyo ni ushahidi kuwa bado kuna ‘majipu’ na ataendelea ‘kuyatumbua’.

Sakata hilo liliibuka baada ya Desemba 30 mwaka jana, Mamlaka ya Udhibiti wa Huduma za Nishati na Maji (Ewura) kukubali maombi ya Tanesco ya kupanda kwa bei ya umeme kuanzia Januari mosi kwa asilimia 8.5.

Hatua hiyo ilizuiwa na Waziri wa Nishati na Madini, Profesa Sospeter Muhongo huku Rais Magufuli akisema hatua hiyo ilikuwa inakwamisha mipango ya Serikali inayojiandaa kuelekea katika uchumi wa viwanda.

Ewura katika agizo lake namba 16-126, inaruhusu Tanesco kupandisha bei ya umeme kwa kiwango hicho, sambamba na kutekeleza maagizo zaidi ya 10, ikiwamo kuzalisha umeme kwa mitambo yenye gharama nafuu.

Uamuzi wa Ewura kuridhia maombi ya Tanesco uliwachanganya wananchi kutokana na kauli iliyotolewa mwaka juzi na Profesa Muhongo kuwa kazi yake kubwa ni kuhakikisha bei ya umeme inashuka, huku wakishuhudia Aprili mwaka jana Tanesco ikishusha bei ya umeme kwa kati ya asilimia 1.5 na 2.4.

Hata hivyo, Oktoba mwaka jana, Tanesco iliwasilisha maombi mapya ya kutangaza ongezeko la bei kwa maelezo kwamba wamekuwa wakipata hasara ya Sh bilioni 40 kila mwezi, maombi ambayo Desemba 31 mwaka jana yalipingwa na Profesa Muhongo, kisha Januari mosi kuwekewa msisitizo na Rais Magufuli.

“Tupo katika majonzi makubwa na mshituko baada ya kuwepo kwa taarifa hizo,” alisema mmoja wa watumishi wa Shirika hilo.

Share on Google Plus

About Unknown