Serikali yashindwa asimilia 50 ya kesi

 Paul Wilium, Moshi

George Masaju

SERIKALI imeshindwa zaidi ya asilimia 50 ya kesi  za jinai zinazofikishwa mahakamani mkoani Kilimanjaro, kutokana na ushahidi wake kukosa nguvu.

Hali hiyo imesababisha wapelelezi wa kesi hizo kutupiwa lawama za kukosa umakini katika kupeleleza na kupata ushahidi.

Mwanasheria wa Serikali, Abdallah Chavula alibainisha hayo juzi kwenye semina ya kuwajengea uwezo iliyokutanisha maofisa wa Polisi wa wilaya zote za mkoa, Takukuru na Ofisi ya Mwanasheria wa Serikali.

Alisema makosa ambayo yamekuwa yakiongoza kwa kesi zao kushindwa ni ya mauaji, wizi wa kutumia silaha na ujambazi wa kutumia silaha.

Chavula alisema kesi hizo ushahidi wao kwa asilimia kubwa umekuwa ukiegemea kwenye utambuzi ambao ni dhaifu na kudai kuwa mahakama hazina nguvu za kumtia hatiani mshitakiwa, kwa kuamini ushahidi wa utambuzi peke yake.

Alisema kushindwa kesi hizo kunatokana na ofisa upelelezi au polisi kukosa uelewa  wa kanuni na sheria ambazo hutolewa na Mahakama na jinsi ya kupeleleza.

Hivyo kutokana na changamoto hizo askari wanatakiwa kuwa na tabia ya kujisomea vitabu vya sheria ili kuzielewa.

Aidha, Chavula alisema ili kuwe na upelelezi bora, askari au mpelelezi anatakiwa kuelewa sheria na jinsi ya kupeleleza ili kufanikisha ushahidi dhidi ya makosa ya jinai.

“Jamhuri tumekuwa tukishindwa kesi nyingi kutokana na wapelelezi mlivyotafuta ushahidi wa kumtia mtuhumiwa hatiani, kukosa nguvu na hii inasababishwa na kutozingatia sheria wakati wa kupeleleza, hivyo ni lazima mjijengee tabia ya kusoma vitabu mara kwa mara, ili kutambua mnachopaswa wakati mkipeleleza,” alisema Chavula.

Alisema jukumu la kupeleleza makosa ya jinai ni la Jeshi la Polisi na maofisa wake kwani   lipo kwa mujibu wa sheria ambayo imelipa mamlaka ya kufanya upelelezi kwa kina, ili kujenga ushahidi bila shaka yoyote dhidi ya mtuhumiwa, ili afikishwe mahakamani na kutendewa haki.

Ofisa Mwandamizi wa Takukuru wa Mkoa, Benedict Mongela alisema askari hawapaswi kupendelea marafiki au jamaa zao wawapo kazini na kwamba wajibu wao ni kuzuia uhalifu kwa haki bila upendeleo.

Mongela alisema askari wanapaswa kuepuka zawadi haramu na kuomba au kupokea rushwa kwa mtu aliyemsaidia au anayemhudumia, kwani kufanya hivyo ni kosa kisheria  na kimaadili ya kazi.

Aidha, Ofisa Mwandamizi huyo wa Takukuru alibainisha kuwa mmomonyoko wa maadili umechangia ongezeko la vitendo vya rushwa na kuitaka Polisi kushirikiana na Takukuru kupambana nayo.

Share on Google Plus

About Unknown