Salha Mohamed na Asha Kigundula
 |
| Dk Ali Mohammed Shein |
SERIKALI ya Mapinduzi ya Zanzibar
imetangaza nyongeza ya mishahara kwa asilimia 100 kwa watumishi wa umma
ikieleza itaanza kulipwa Aprili.
Akihutubia maadhimisho ya miaka 53 ya
Mapinduzi ya Zanzibar jana, Rais wa Visiwa hivyo, Dk Ali Mohammed Shein alisema
mshahara kwa watumishi wa umma umeongezeka ikiwa ni sehemu ya maadhimisho hayo.
“Katika kipindi hiki mipango yote
imekamilika ya kulipa wafanyakazi wa Serikali kima cha chini cha mshahara
kutoka Sh150,000 za sasa hadi Sh 300,000 kwa mwezi,” alisema.
Alisema katika miaka 53 ya Mapinduzi ya
Zanzibar, Serikali imedhamiria kupandisha kiwango cha mshahara kwa watumishi
wake.
Alisema uwajibikaji wa wafanyakazi
kazini umeongezeka ingawa bado wapo wanaofanya kazi kwa mazoea ambao Serikali
itaendelea kuwachukulia hatua za ziada ya kusimamia nidhamu kazini.
“Wapo watumishi walioondolewa kwenye
dhamana ya kazi, wapo waliosimamishwa kazi kutokana na ubadhirifu wa fedha za umma
na wapo wanaoendelea kuchunguzwa na taasisi husika,” alisema.
Dk Shein alisema Serikali imeendelea
kusimamia na kudhibiti matumizi ya fedha kwa safari za nje na za ndani bila
kuathiri kazi.
Alisema mafanikio yaliyopatikana katika
maiaka 53 ya Mapinduzi ni mengi.
“Leo (jana) ni siku muhimu kwa historia
ya Zanzibar ambapo miaka 53 iliyopita tulikata minyororo ya Wakoloni, wananchi
walikataa kwa vitendo kudharauliwa, kunyanyaswa, kubaguliwa na kutoheshimiwa,” alisema.
Alisema Mapinduzi yalileta uhuru wa
kweli na kusimamisha utawala wa Wakoloni katika misingi ya haki na maendeleo,
wananchi wa Zanzibar waliporudisha heshima yao.
“Siku zote tutawakumbuka, kuwaenzi na
kuwaombea dua waliojitoa mhanga kutukomboa, tuko huru na tunasherehekea
mafanikio hayo,” alisema.
Alisema Serikali inaahidi kuendelea
kuyaenzi Mapinduzi na kusherehekea kwa amani, umoja na mshikamano.
“Yapo mambo yanatekelezwa kwa mafanikio ikiwamo
miradi 51 iliyowekwa mawe ya msingi kwenye halmashauri na ni haki ya kila mmoja
kujivunia na kuendeleza mafanikio haya,” alisema.
Alisema mwaka wa kwanza wa kipindi cha pili
cha awamu ya saba, Serikali ilianza vema utekelezaji wa Ilani ya Uchaguzi ya CCM
ya Mwaka 2015 na dira ya maendeleo kwa mafanikio.
“Katika kipindi hiki mafanikio makubwa
tuliyopata ni kuimarika kwa uchumi wetu, pato halisi la taifa limekua kwa kiwango
cha wastani wa asilimia 6.6,” alisema.
Alisema pato la mtu binafsi limefika
wastani wa Sh milioni 1.6 sawa na dola 817 mwaka juzi.
Alisema mwaka jana kasi ya mfumuko wa
bei wa bidhaa na huduma ilifikia asilimia 6.7 ambapo kasi hiyo ilikua kwa
asilimia 5.7 mwaka juzi.
“Mfumuko wa bei bado umedhibitiwa katika
kiwango cha tarakimu moja. Mafanikio haya ni kutokana na jitihada za kukusanya
mapato katika vyanzo mbalimbali,” alisema.
Alisema katika kipindi cha Januari hadi
Novemba mwaka jana mapato yalikusanywa kutoka vyanzo vya ndani yakiongezeka
kutoka Sh bilioni 336.6 mwaka juzi hadi sh bilioni 441.3 mwaka huu, sawa na ongezeko
la asilimia 31.
Alisema Serikali ilipokea Sh bilioni 54.53
kutoka kwa washirika wa maendeleo kuanzia Januari hadi Oktoba mwaka jana.
“Serikali ilitumia Sh bilioni 436.6 kati
ya Januari na Oktoba mwaka jana, kwa jumla katika kipindi hicho mapato ya Serikali
yalipindukia matumizi ya jumla ya Sh bilioni 4.7 sawa na ongezeko la asilimia mbili,”
alisema na kuongeza kuwa Serikali inatarajia kununua meli mpya mwaka huu.
Makamu wa pili wa Rais, Balozi Seif
Khalid alimpongeza Rais Shein kwa uongozi wa heshima na busara.
Maadhimisho hayo yalihudhuriwa miongoni
mwa viongozi wengine na Makamu wa Rais, Samia Suluhu Hasan, Waziri Mkuu Kassim
Majaliwa, marais wastaafu, Alhaji Ali Hassan Mwinyi, Jakaya Kikwete, Benjamin
Mkapa na Amani Abeid Karume.
0 comments:
Post a Comment