*Mahakama Kuu yafutilia mbali rufaa yake
*Awambia mawakili wasihangaike atasota tu
Seif Mangwangi, Arusha
 |
| Godbless Lema |
HATIMAYE
Mahakama Kuu Kanda ya Arusha imeifutilia mbali rufaa iliyokatwa na mawakili wa
Mbunge wa Arusha Mjini, Godbless Lema, kupinga kunyimwa dhamana na Mahakama ya
Hakimu Mkazi Mkoa wa Arusha, baada ya kudaiwa kumtukana Rais John Magufuli.
Akisoma
uamuzi mdogo wa Jaji Fatuma Masengi jana, Naibu Msajili wa Mahakama Kuu Kanda
ya Arusha, Angelo Rumisha alisema Mahakama imeifuta rufaa hiyo, kutokana na
kuikata nje ya muda.
Rumisha
alisema waomba rufaa walitakiwa kuonesha kusudio la kukata rufaa ndani ya siku 10
tangu uamuzi wa maombi ya marejeo kutupwa na Mahakama Kuu, yaliyokuwa mbele ya
Kaimu Jaji Mfawidhi wa Mahakama Kuu Kanda ya Arusha, Sekela Moshi Novemba 11.
"Mwomba
rufaa hii, Lema kupitia mawakili wake alitakiwa kuonesha kusudio au kutoa notisi
ya kuonesha Mahakama sababu ya kukata rufaa na Novemba 21 walipaswa kukata
rufaa lakini wao walikata Novemba 22 nje ya muda wa kukata rufaa,” alisema na
kuongeza:
"Kutokana
na upungufu huo wa kisheria, Mahakama imekubaliana na upande wa pingamizi la upande
wa Serikali kupitia kwa Wakili Paul Kadushi akishirikiana na Martenus Marandu,
kuwa rufaa hiyo haikufuata misingi ya kisheria kukatwa kwa sababu hakuna kusudio
la kukata rufaa, ndipo wakaiomba Mahakama kuitupilia mbali."
Rumisha
alisema baada ya pingamizi hilo kutolewa, na upande wa Lema kuomba Mahakama
ilitupilie mbali kwani rufaa yao iko ndani ya muda na iliwasilishwa kwa hati ya
dharura, Mahakama ilivyopitia hoja za pande zote mbili iliona rufaa hiyo ililetwa
Mahakamani hapo nje ya muda unaotakiwa.
Alisema
mbali na nje ya muda, pia wakata rufaa hawakuzingatia sheria inavyotaka, kuwa
ukikata rufaa lazima uanze na kutoa siku 10 za kusudio la kukata rufaa, jambo
ambalo lilisababisha kufikiwa uamuzi wa kuifutilia mbali rufaa hiyo.
Baada ya
Msajili Rumisha kuifuta Rufaa hiyo, wakili wa Lema Adamu Jabir, aliiomba
Mahakama itoe angalizo kwa askari wanaokwenda mahakamani hapo kuweka ulinzi,
kwani wanawazuia na kuwapekua sehemu nyeti wakiwamo wanawake na hata ndugu
wa Mbunge huyo ambaye hawana muda wa kumwona hadi pale tu anapofika mahakamani.
Alisema
mteja wao Lema anasikitika kuona hali hiyo ikijitokeza wakati yeye ni Mbunge na
kesi inasikilizwa kwenye chumba cha wazi ili kila mmoja asikilize na kujua
kinachoendelea.
“Tunasikitika
watu wanapigwa, wengine wanazuiwa kuingia mahakamani na tumezungumza zaidi ya
mara tatu, lakini hali inaendelea vile vile, ulinzi mkali na kuzuia watu
wanaofika kufuatilia kesi ya Mbunge wao na ndugu yao,” alisema.
Alisema
hata walioingia walifanya hivyo kwa shida na kwa nguvu kubwa ambayo haikuwa ya
lazima na kuomba Mahakama iruhusu watu kuingia kwa wingi na chumba kikiwa
kidogo watakaa nje au wawekewe spika za kusikiliza.
Akijibu
hoja hiyo, Msajili Rumisha alisema Mahakama ikiruhusu watu wote kwenye kesi
hiyo watakaa wapi, chumba ni kidogo na ndiyo sababu watu wanadhibitiwa.
Kuhusu
kuweka vipaza sauti Rumisha alisema Mahakama haina bajeti hiyo wala haina fedha
za kuweka vipaza sauti, ila kwa kesi ya ubunge tofauti na hiyo, kwani ile ya ubunge
ina fungu lake, hivyo wanaweza kufanya lolote, ila kesi hiyo haina fungu,
hawawezi kuweka vifaa hivyo.
“Lakini
wakija wakakosa kukaa ndani wakakaa nje watasikiaje shauri hili likiendelea? Bora
wakae nje huko huko,” alisema.
Alipomaliza,
Lema alinyoosha mkono akitaka kuongea, lakini Msajili akamtaka aongee na
wakili wake ambaye atawasilisha hoja yake mahakamani hapo.
Hata hivyo,
wakati Lema anataka kuzungumza na wakili wake, Msajili aliahirisha kesi hiyo na
kunyanyuka akatoka nje na kuashiria kuwa Mahakama imemaliza kazi yake.
Nje ya Mahakama
Akizungumza
nje ya Mahakama, Wakili wa Lema, John Mallya alisema walizungumza na mteja wao baada
ya uamuzi ya Mahakama akawaomba wasijishughulishe na suala lolote la kukata
rufaa, ingawa wao wanaona bado kuna njia za kufanya kwenye Mahakama za juu.
Alisema
Lema aliwaambia yuko tayari kukaa gereza la Kisongo bila shida na kuhusu hoja
kuwa walikata rufaa nje ya muda, alisema wanafahamu ni ndani ya muda, ila Mahakama
ikishatoa uamuzi si rahisi kuukataa, lazima kukubaliana nao, hivyo waliahidi
kukutana mawakili wote wa Lema kupanga mbinu za kumpigania kupata haki yake ya
dhamana.
Katibu
Katibu
wa Chama cha Demokrasia na Maendeleo (Chadema), Kanda ya Kaskazini, Amani
Golugwa, alisema chama kimesikitika kuona Mahakama imefuta rufaa yao.
Alisema
kimefedheheshwa katika shauri hilo tangu lilipoanza, kwani mara mbili Jaji na
Msajili wamekuwa wakitoa maelekezo juu ya Mahakama hiyo ya wazi inayoruhusu
watu wote kuhudhuria, lakini haki ya Mbunge na wapiga kura wake imekuwa ikinyimwa
kwa kuzuiwa na kutishwa na askari.
Golugwa
alisema wananchi wana haki ya kufuatilia shauri la Mbunge wao, lakini baadhi
yao wanapigwa na kuumizwa ili wasiingie mahakamani hapo.
Alisema
kutokana na maelekezo hayo na mwenendo wa kesi, licha ya kuruhusiwa dhamana,
lakini ameendelea kunyimwa, hivyo kuona bora akae Kisongo na hatachukua uamuzi
wowote mpaka Jamuhuri itakapoona inafaa atoke.
“Kuhusu
hili suala, Chama tutatoa tamko na kueleza mazingira ya kesi hiyo na alichoonesha
Msajili na hali hiyo imeonesha kweli kuna kitu, mwenye akili amepata majibu,
ila sisi viongozi tumekaa na familia kuwapa moyo wasiogope na familia iko
vizuri,” alisema.
Awali mawakili
wa Lema akiongozwa na Peter Kibatala, walikata rufaa namba 112/113 ya
mwaka 2016 Mahakama Kuu Kanda ya Arusha, ili kudai haki ya dhamana ya Mbunge
huyo aliyonyimwa kutokana na makosa ya kisheria yaliyofanya na Mahakama ya
Hakimu Mkazi Arusha.
Walisema
waliamua kufungua maombi ya rufaa kwa ajili ya kujua sababu ya Lema kukosa
dhamana ambayo awali Hakimu Desdery Kamugisha alisema iko wazi.
Aidha,
walisema sababu ya kufungua rufaa hiyo ni mbili; kwamba hawakuridhishwa na
hatua ya Hakimu Kamugisha kumnyima dhamana Lema, huku akijua kuwa alifanya kosa
kwa sababu mawakili wa Serikali akiwamo Kadushi, walisema wameonesha nia ya
kukata rufaa.
"Tunapinga
Lema kunyimwa dhamana iliyo wazi na ndiyo maana tumeamua sasa kukata rufaa na
tunasubiri Mahakama Kuu kutupangia Jaji wa kusikiliza maombi ya rufaa yetu,” alisema.
Hali
hiyo ilikuja baada ya mawakili wa Serikali wakiongozwa na Kadushi, kupinga
dhamana ya Lema, kwa madai kwamba alifanya kosa akiwa amepewa dhamana na Mahakama
hiyo.
Pia
walidai iwapo Lema atapewa dhamana, kuna hatari ya usalama wa maisha yake.
Akitupilia
mbali hoja hizo, Hakimu Kamugisha alisema Mahakama haitoi dhamana kama hisani,
bali ni haki ya msingi ya mtuhumiwa, kama ilivyoainishwa kwenye Katiba ya nchi
na sheria.
Alisema
iwapo mtuhumiwa ananyimwa dhamana, sheria inatakiwa kutamka bayana.
0 comments:
Post a Comment