Enlesy Mbegalo
WATU 10 wamekufa huku 44 wakijeruhiwa
kwenye ajali ya barabarani iliyotokea eneo la Mikeja wilayani Kilwa.
Akizungumza na JAMBO LEO, kwa njia ya
simu jana, Kamanda wa Polisi wa Mkoa wa Lindi, Renatha Mzinga alisema ajali
hiyo ilitokea jana saa tano asubuhi.
Alisema basi namba T 110 TWU aina ya
Yutong mali ya kampuni ya Barcelona lililokuwa likitoka Dar es Salaam kwenda
Newala lilipinduka na kusababisha vifo na majeruhi hao.
Kamanda Mzinga alisema chanzo cha ajali
hiyo ni gurudumu la mbele kushoto kupasuka na basi hilo kupoteza mwelekeo na
kupinduka.
“Ni kweli ajali hiyo imetokea leo (jana)
watu 10 wamepoteza maisha papo hapo na wengine 44 kujeruhiwa na kati yao wanawake ni 16, wanaume 10 watoto 10,” alisema
Kamanda Mzinga
Pia alisema miili ya marehemu na
majeruhi wako kwenye hospitali ya Kinyonga, Kilwa Kivinje.
Alisema hadi jana jioni hawakuwa
wametambua majina ya marehemu wala majeruhi kutokana na madaktari kuendelea kuhudumia
majeruhi.
Pia Kamanda Mzinga alisema dereva wa
basi hilo naye hakuwa amefahamika bado.
0 comments:
Post a Comment