Salha Mohamed
TAASISI ya Tiba ya Mishipa ya Fahamu (MOI),
imewataka wananchi kujitokeza kuchangia damu ili kusaidia upasuaji wa watoto
wenye vichwa vikubwa na migongo wazi.
Taasisi hiyo iliyokatika Hospitali ya
Taifa Muhimbili (MNH), yenye watoto 40 waliofanyiwa na wanaosubiri kufanyiwa
upasuaji,ikiwa ni maadhimisho katika kuelekea kilele cha siku ya watoto wenye
migongo wazi na vichwa vikubwa duniani, Octoba 25 kila mwaka.
Mkuu wa Kitengo cha Mawasiliano kwa Umma
katika taasisi hiyo, Jumaa Almasi alisema takwimu zinaonesha kuwa zaidi ya
watoto 4000 huzaliwa wakiwa na matatizo hayo kila mwaka.
“Maadhimisho
hayo yataadhimishwa kwa kuchangia damu Octoba 24, kama mnavyofahamu kuwa
upasuaji unahitaji damu, hivyo kwa kushirikiana na Chama cha Wazazi wenye
watoto wenye migongo wazi na vichwa vikubwa (Asbhat), kuchangia damu,”alisema.
Alisema kwa sasa idadi ya watoto wanaofika hospitalini
hapo na kuonana na madaktari imeongezeka
kutokana na elimu wanayopata wazazi.
Alisema kumekuwa na mwitikio wa wazazi kupeleka
watoto wao hospitali huku watoto wa mikoani wakipatiwa matibabu kutokana na
Kambi ambazo zipo kila mkoa.
“Wananchi wajitokeze kutoa damu ili
tufanikishe zaidi ingawa sisi mara kwa mara huwa tunafanya upasuaji hapa na
kambi zilizopo mikoani pia lakini wanaohitaji uangalizi huletwa hapa,”alisema.
Almasi alisema mkoa ya Dar es Salaam,
Morogoro, Lindi na Mtwara imeonekana kuwa na wagonjwa wengi kutokana na muamko
wa wazazi kupeleka watoto wao hospitali.
Aliwataka wanawake wanaotarajia kubeba
mimba kujiandaa kabla ya kubeba ili kuepuka matatizo ya kujifungua motto mwenye
kichwa kikubwa na mgongo wazi.
“Wajawazito wafuate masharti wanayopewa
na madaktari kufuata ulaji mzuri wa kula vyakula vya ziada na madini ya Folic
Acid,”alisema.
Almasi alisema wapo wazazi wasiowarudisha
watoto wao kuangaliwa pindi wanapopata matibabu ya awali kwa kukosa fedha za
kusafiri hasa wa mikoani.
“Utakuta wagonjwa wengine tunaopata
wamefika hapa kutokana na kupata michango kutoka misikitini au makanisani na
wakipata matibabu.
“Na wakipangiwa siku ya kurudi
kuangaliwa hawarudi tena hivyo tunakuwa
hatujui maendeleo ya watoto wao,”alisema.
0 comments:
Post a Comment