Serikali yauza kijiji kwa mwekezaji

ZAIDI ya wakazi 3000 wa Kijiji cha Ipanko kilichoko katika Hal­mashauri ya Wilaya ya Ulanga mkoani Morogoro, wametakiwa kuhama kijijini hapo baada ya vitongoji vitatu kati ya vitongoji vitano vya kijiji hicho kuuzwa kwa mwekezaji, JAMBOLEO li­meelezwa.

Wakazi hao wameilalamikia Serikali kwamba haikuwashiriki­sha katika hatua hiyo inayolenga kupisha mradi wa uchimbaji ma­dini ya graphite unaoendeshwa na Kampuni ya TanGraphite, chi­ni ya kampuni tanzu ya Kibaran Resources ya nchini Australia.

Wakazi hao waliliambia gazeti hili kuwa tangu mradi huo uanze mwaka 2012 na wao kutakiwa ku­hama maeneo yao hayo ya asili, kumeibuka sintofahamu kubwa, huku mambo mengi yakiam­uliwa bila wao kupewa fursa ya kushiriki. Walisema kumekuwa na matumizi ya nguvu hasa kwa wananchi wanaonekana kuhoji. Watu wanatishwa na wengine wanakamatwa na polisi, jambo ambalo linawafanya wakose ama­ni, alisema mmoja wa wakazi hao ambaye hakutaka kutajwa kwa hofu ya kukamatwa kama ilivyo­tokea kwa wenzake kadhaa.

“Awali tulipopewa taarifa ya ku­hama ili tupishe mradi, tulihoji mambo kadhaa, lakini inaoneka­na kwamba Kampuni hii ya Tan­Graphite ilishaanza kazi, hivyo wakatupuuza. Kuanzia viongozi wa kijiji hadi mkoa hakuna aliye­tusikiliza,” alisema.

Mwanakijiji huyo aliyeambat­ana na wenzake kadhaa kwenye ofisi za gazetili kuleta malalamiko hayo alisema, kimsingi wakazi hao hawapingi mradi, ila wana­taka kushirikishwa ili wajue ha­tima yao. “Kampuni imeshaanza kazi na wanatutaka tuhame, la­kini hawatwambii twende wapi na tunaenda vipi. Sasa haya ndiyo mambo tunayosema kuwa haya­ko vizuri tunahitaji kushirikish­wa tujue hatima yetu,” alisema.

Mkazi huyo alibainisha kuwa tangu mradi huo uanze ha­wakuambiwa chochote, lakini baada ya kulalamika Kampuni ya Mtei ilifika kijiji hapo kwa ajili ya kufanya tathmini ya makazi yao, lakini hata hivyo bado kuna usiri unagubika.

Kauli ya Serikali

Alipotakiwa kuzungumza suala hilo, Waziri wa Ardhi, Nyumba na Maendeleo ya Makazi, Wil­liam Lukuvi alitaka aulizwe Wa­ziri wa Nishati na Madini, Profesa Sospeter Muhongo

Waziri Muhongo alisema haamini kama wananchi hao wanaonewa kwani alituma watu mara nyingi ili waweze kuwasaid­ia kumaliza mgogoro huo.

“Ngoja nikwambie waambie hao wananchi washike Msahafu na Biblia waseme kama hawa­jawahi kushirikishwa na Serikali ya Mtaa na kusaidiwa katika suala hilo,”alisema.

Alisema vitengo mbalimbali Serikaliani ikiwamo, Kamishna wa Madini, mkuu wa wilaya na mkuu wa mkoa wamekuwa mstari wa mbele kuwasaidia wa­nanchi kwa namna tofauti.

Waziri Muhongo akamtaka mwandishi wa habari hii kuwasi­liana na mkuu wa wilaya ya Ulan­ga kuzungumzia suala hilo kwa kuwa tayari ofisi yake ilishatoa maelekezo kwake kushughulikia suala hilo.

DC anena

Mkuu wa Wilaya ya Ulanga, Jacob Kasemma alisema katika jitihada za kutatua mgogoro huo, Serikali kwa kushirikiana na Kampuni ya TanzGraphite walia­mua kujenga ofisi ambayo ita­sikiliza malalamiko na maoni ya wananchi hao lakini baadhi yao waliivamia na kuivunja.

“Kule ni kijijini, tuliamua ku­jenga ofisi maalumu kusikiliza kero, malalamiko na maoni na madukuduku ya wananchi kwa lengo zuri kabisa ili kuondoa tofauti zilizopo, lakini baadhi ya wananchi walivamia ofisi hiyo na kuivunja­vunja, huku wakitishia usalama wa maofisa waliowekwa pale. Kumbe unaweza kuona kuwa suala hilo lina changamoto kubwa,” alisema.

Akizungumzia madai ya wa­nanchi hao kwamab wamekuwa wakikamatwa na polisi, mkuu huyo wa wilaya alisema kuwa suala hilo halipo isipokuwa wananchi wa­nachojaribu kufanya ni kuihadaa jamii kuhusu jambo hilo.

“Kuna wananchi walivamia se­hemu vilipowekwa vifaa vya kam­puni ya TanzGraphite kwa lengo la kufanya uharibifu. Sasa suala la uharibifu wa mali ni jinai, hivyo Polisi lazima wachukue hatua. Jam­bo mbaya sana linalofanywa na hao watu wachache ni kwamba waliwa­tumia wanafunzi, na baada ya hapo walizusha habari kwamba Polisi imepiga mabomu wanafunzi,” alise­ma. Alibainisha kuwa anafahamu uwepo wa watu wachache kupinga mradi huo, lakini bado anafanya juhudi za kukutana nao ili kujua msingi wa madai yao.

Mkuu wa Wilaya wa zamani

Awali, aliyekuwa mkuu wa wilaya hiyo kabla ya Kasemma Christine Mndeme alisema madai ya wa­nanchi hao hayana msingi kwa kuwa hayaeleweki.

“Mradi huo ulipitia hatua zote. Tulianza na vikao vya kijiji, la­kini mkutano wa kijiji watu ha­wakuhudhuria. Binafsi kama Mkuu wa Wilaya niliwaita wananchi hao mmoja mmoja niwasikilize, lakini hawakufika. Baadaye wakazusha kwamba nimewaita ili niwahonge pesa na wengine wakasema nime­waita ili niwakamate, hivyo hadi naondoka tumeshindwa kujua hoja yao ni nini,’ alisema.

Mwekezaji anasemaje?

Mkurugenzi Mtendani wa Kam­puni ya TanGraphite, Grant Pierce alisema hakuna sababu yoyote ya wananchi hao kuwa na wasiwasi juu ya mradi huo kwa kuwa mchakato wake bado unaendelea.

“Ni kweli hadi sasa hakuna mwa­nanchi anayejua atahamia wapi kwa sababu kwa kushirikiana na Serikali ya Mkoa, Wilaya na Serikali ya kijiji tupo katika mchakato wa kutafu­ta maeneo ambayo tutawajengea makazi wananchi hao. Tumeunda kamati yenye wawakilishi wanne kutoka vitongoji sita vya kijiji hicho kwa ajili ya kufanya shughuli hiyo,” alisema.

Mradi ukoje?

Mradi wa uchimbaji madini ya graphite, ulianza mwaka 2012 kwa kampuni ya TanzGraphite kuanza kufanya utafiti. Mradi huo utadumu kwa miaka 27 na utahusisha viton­goji vitatu katika kijiji cha Epanko. Wakati wa kitongoji cha Epanko A na Kazimoto watahamishwa kupi­sha mradi huo. Pia nusu ya wakazi wa Kitongoji cha Itatira watatakiwa kuhama. Mradi huo hautagusa vitongoji vingine viashughuli za uchumbaji wa madini hayo huku nusu ya kitongoji cha Itatira iki­guswa. Vitongoji vingine vitatu vya Epanko B Mbera na Lurina havita­guswa kabisa.

Share on Google Plus

About Unknown