Jemah Makamba
MAHAKAMA ya Mwanzo Kariakoo imemhukumu
kwenda jela miezi sita, Dalius Kaishema (34), raia wa Rwanda kwa kosa la
kutoroka akiwa chini ya ulinzi mahakamani.
Hukumu hiyo ilisomwa jana na Hakimu
Agnes Barasobian baada ya Koplo Said wa Polisi, kutoa maelezo ya jinsi Kaishema
alivyotoroka na kukimbia.
Sehemu ya mahojiano katio ya Hakimu na
Koplo Said kabla ya hukumu ilikuwa kama ifuatavyo:
Hakimu: Unaitwa nani na unaweza kuelezea
nini kimetokea kuhusu huyu mshtakiwa?
Akari: Naitwa Koplo Said, nikiwa eneo
langu la kazi mahakamani hapa Januari 23, saa 6:20 mchana niliwatoa washitakiwa
kwenye mahabusu ya Mahakama na kwenda kusomewa mashitaka.
Hakimu: Baada ya kusomewa nini
kiliendelea?
Akari: Washitakiwa walisomewa hapa kwako
na baada ya hapo wakati nikiwa nawarudisha mahabusu, mshitakiwa huyu
alikurupuka na kuruka uzio wa Mahakama na kukimbia nilipuliza filimbi na askari
wenzangu walisikia na tukamkimbiza mshitakiwa na kumkamata maeneo ya Fire.
Hakimu alimhoji mshtakiwa kama kweli
alikimbia na kwa nini alifanya kitendo hicho.
Alijibu: "Hakimu kwanza kabisa mimi
si Mtanzania mimi kwetu ni Rwanda, nilikuja Tanzania Julai 23, 2013 na nikiwa
Rwanda nilikuwa mfuasi wa chama cha upinzani cha Rwandanziza na niliingia hapa
kihalali nikiwa na hati ya kusafiria.
“Sikuwahi kupata kesi yoyote na kufanya
uhalifu wowote nchini, lakini Watanzania wanashindwa kunielewa, mimi naumwa
ugonjwa wa OTISM na ni watu wachache huumwa ugonjwa huo, sasa muda mwingi
wananitenga na hata kesi iliyonileta nimesingiziwa.
“Nilijaribu kutoroka ili nisiende
mahabusu, ilikuwa bahati mbaya Hakimu naomba UNHCR (Shirika la Umoja wa Mataifa
la Kuhudumia Wakimbizi) waje kunisaidia nirudi nyumbani Rwanda," alidai
mshitakiwa.
Hakimu alisema mshitakiwa anatiwa
hatiani kutokana na kukimbia chini ya ulinzi baada ya kusomewa mashitaka ya
wizi yanayomkabili na kwa kuwa alikiri kukimbia.
Barasobian alimwomba karani kumbukumbu
za nyuma za mshitakiwa za ambapo alisema hakuna kumbukumbu za nyuma hivyo apewe
adhabu liwe fundisho kwake na kwa wengine wenye tabia kama yake.
Mshitakiwa alipewa nafasi ya kujitetea
kabla ya kupewa adhabu ambapo aliiomba Mahakama imsamehe na kwamba hawezi
kurudia kitendo hicho.
Hakimu alisema kwa kuwa mshitakiwa alijutia
alichokifanya na ni mara yake ya kwanza, basi anamhukumu kifungo cha miezi sita
jela.
0 comments:
Post a Comment