Peter Akaro
 |
| Mwenyekiti TEF, Theophil Makunga |
WAANDISHI
wachanga wanaoingia katika tasnia ya habari, wameaswa kuwa wavumilivu na
wabunifu kwa sababu ukuaji wa teknolojia umeleta changamoto kubwa katika
upashanaji habari.
Hayo
yalibainshwa juzi Dar es Salaam na Mwenyekiti wa Jukwaa la Wahariri Tanzania
(TEF) Theophil Makunga, wakati akikabidhi vyeti kwa wahitimu 200 wa Kozi ya Uandishi
wa habari katika Chuo cha TSJ.
Akizungumza
kama mgeni rasmi katika hafla hiyo, Makunga alisema uhalisia wa tasnia ya
habari ni kwamba mwandishi huweza huchukua muda mrefu hadi kufikia malengo
yake.
Makunga
aliwaeleza wahitimu kuwa wengi itawachukua muda kwenda kuajiriwa, lakini hilo
lisiwakatishe tamaa. Wanapaswa kusimamia kwenye ukweli siku zote.
“Nimekuwa
mhariri kwa muda mrefu, ukiangalia maisha yangu nilipitia changamoto nyingi.
Lakini nilikuwa nasimamia kwenye ukweli. Chombo chochote cha habari kikisimamia
ukweli hata kama unaumiza au kufurahisha, kitakuwa kwenye ushindani na watu
watakipenda.
“Muwe
wavumilivu katika tasnia, changamoto nyingi ni za kawaida, unapokuwa kwenye
chombo cha habari watu wengi wanakutazama wewe na kama kazi yako utaifanya kwa
kufuata ulichofundishwa utafanikiwa,” alisema.
Alisema
wahitimu bado wana safari refu, kuhitimu ngazi ya cheti na stashahada ni hatua
ya kwanza, hatua ya pili ni kutumia yale maarifa uliyoyapatiwa ili waonekane kuwa
ni waandishi wazuri na baadaye maisha yao kuwa mazuri.
Makunga
alisema waandishi wa habari wachanga, wanaingia katika tasnia kukiwa na
changamoto kubwa ya ukuaji wa teknolojia, kitu kinachotoa fursa kwa kila mtu
kuripoti habari hata kama hana taaluma hiyo, hivyo mazingira hayo
yanawalazimisha kuwa wabunifu.
“Hali
ya upashanaji habari umebadilika sana, vyombo vya habari vimekuwa vinazidiwa na
mitandao ya kijamii, ingawaje taarifa zake unakuwa huna uhakika nazo.
“Kwa
hiyo kesho yake magazeti yanakuja kudhibitisha kile ambacho watu wanakuwa wamekisoma
katika mtandao,” alisema Makunga.
Aliongeza
licha ya hiyo uandishi wa mtandaoni utachukua muda kwa Tanzania kuwafikia watu
wengi na kukubalika kwa sababu ya mazingira yetu, hivyo waandishi bado wana
nafasi ya kufanya kazi katika vyombo vya habari vya kawaida.
“Kwa
mfano ukienda vijijini hamna umeme, kwa hiyo vyombo vya habari bado vitakuwepo
vikiendelea na kazi yake,” alisema Makunga.
0 comments:
Post a Comment