Fidelis Butahe, Dodoma
WABUNGE wa Upinzani jana kwa mara nyingine, walitoka
ndani ya ukumbi wa Bunge wakipinga kauli ya Naibu Spika, Dk Tulia Ackson kuhusu
Polisi kukamata wabunge wa kambi hiyo.
Hatua hiyio ilianzia kwa Mbunge wa Kigoma Mjini, Zitto
Kabwe (ACT-Wazalendo) baada ya kuwasilisha hoja bungeni akipinga wabunge
kukamatwa na Polisi kwa alichoeleza kuwa hakuna sababu za msingi.
Lakini pia akabainisha kuwa hata yeye alipewa taarifa
kuwa akitoka nje ya eneo la Bunge atakamtwa na Polisi kwa tuhuma asizozijua.
Zitto alitoa kauli hiyo jana saa 10.35 jioni mbele ya
waandishi wa habari baada ya wabunge wa Upinzani kutoka ndani ya ukumbi wa
Bunge kutokana na kueleza kutoridhishwa na kauli ya Naibu Spika, kupinga hoja
hiyo.
Awali, Dk Tulia alilaimbia Bunge jinsi alivyopata ujumbe
wa maandishi kutoka kwa Zitto ukimwomba ampe nafasi ya kutoa taarifa kuhusu
suala alilokuwanalo baada ya kumkatalia kufanya hivyo asubuhi.
Baada ya kauli hiyo, Zitto alisimama na kuliambia Bunge,
kwamba utaratibu wa Polisi kukamata wabunge wa Upinzani unakiuka Sheria ya
Kinga, Haki na Madaraka ya Bunge.
“Bunge letu liko nchi za Jumuiya ya Madola na linaongozwa
na Katiba, kanuni, sheria za mabunge mengine, uamuzi wa maspika wengine na sheria
zingine,” alisema.
“Hivi karibuni, Mbunge wa Arusha, Godbless Lema
(Chadema), alikamatwa nje ya Bunge baada ya kuhudhuria vikao vya Bunge na hadi
sasa Bunge halina taarifa.”
Alisema kwa mujibu wa nchi za Jumuiya ya Madola, polisi
wanapotaka kukamata mbunge, lazima wampe taarifa Spika naye Spika aliambie
Bunge juu ya taarifa hiyo na kueleza ni kwa nini mbunge anakamatwa.
Alisema hata Mbunge wa Kilombero, Peter Lijualikali
amefungwa miezi sita jela bila Bunge kuelezwa chochote juu ya tukio hilo, jambo
ambalo ni kinyume na sheria hiyo, huku pia akigusia kukamatwa kwa Tundu Lissu
(Singida Mashariki).
Lissu alikamatwa juzi saa 12 jioni wakati akielekea lango
la kutoka bungeni na kusafirishwa usiku kwenda Dar es Salaam kwa tuhuma ambazo
hazikuwekwa wazi.
“Hata mimi nimepata taarifa, kwamba polisi wananisubiri
ili nikitoka nje wanikamate na siogopi kukamatwa. Naomba jambo hili
lijadiliwe na kulitolea uamuzi,” alisema na kumtaja mbunge wa Nzega Mjini, Dk
Hamisi Kigwangalla (CCM) kuwa naye aliwahi kukamatwa kwa mtindo huo.
Akitoa ufafanuzi wa suala hilo, Dk Tulia alisema sheria
ziko hivyo, Bunge haliwezi kufuata sheria za mabunge mengine na kwamba jambo
hilo halihusu makosa ya madai, hivyo haliwezi kujadiliwa.
Baada ya majibu hayo, wabunge walionekana kutoridhishwa,
huku wakiwa wamesimama walipingana na uamuzi huo jambo lililomlazimu Dk Tulia
kumtaka Mbunge wa Serengeti, Marwa Chacha (chadema) atoke ukumbini.
Mbunge huyo aligoma, jambo lililomlazimu Naibu Spika
kuita askari wa Bunge kumtoa Chacha na kusababisha wabunge wote wa Upinzani
kusimama na kutoka huku wakitoa maneno ya kumponda Dk Tulia ambaye aliwataka
watoke kwa utaratibu bila vurugu.
Nje
Zitto akiwa na wabunge wengine wa Upinzani alisema
kutokana na taarifa kuwa anasakwa na Polisi, hatatoka nje ya eneo la Bunge.
“Sitoki nje kabisa hivi sasa nakwenda maktaba kujisomea,”
alisisitiza.
Mdee
Mapema Mbunge wa Kawe na Mwenyekiti wa Baraza la Wanawake
la Chadema (Bawacha), Halima Mdee alihoji sababu za Lissu kukamatwa.
Wakati Mbunge huyo akitaka kujua sababu jana, Jeshi la
Polisi Kanda Maalumu ya Dar es Salaam, lilizitaja likisema lilifanya hivyo ili
kumhoji huku Kamanda wa Kanda hiyo, Simon Sirro akisema Lissu alikamatwa kwa
amri yake kutokana na kauli alizotoa zikiashiria uvunjifu wa amani.
Mwanasheria Mkuu huyo wa Chadema juzi alihudhuria kikao
cha sita cha Bunge na mara baada ya kukamatwa, dereva wake, Simon Makira
aliiambia JAMBO LEO kuwa Lissu alipowahoji polisi sababu za kumkamata,
walimjibu ni kutokana na kauli zake juu ya upungufu wa chakula katika baadhi ya
wilaya nchini.
“Jana (juzi) Lissu alikamatwa na polisi katika eneo la
Bunge karibu na lango na kusafirishwa usiku kwenda Dar es Salaam. Nimeliuliza
hili maana kilichotokea kwa Lissu ndicho kilichotokea kwa Lema (Godbless-Mbunge
wa Arusha Mjini) miezi kadhaa iliyopita, ambaye yuko ndani wakati kosa lake ni
dogo la kupewa dhamana,” alisema Mdee
“Naomba Mwongozo wako, unadhani ni sahihi vitendo
vinavyofanywa na polisi ambao sijui wanapewa kiburi na nani kudhalilisha
wabunge wakiwa kwenye majukumu yao ya kawaida ya kibunge?” Alihoji Mdee.
Akijibu Mwongozo huo, Naibu Spika Dk Tulia Ackson alisema
jambo hilo hawezi kulitolea Mwongozo, kwa kuwa halikutokea ndani ya chombo
hicho.
Sababu za kukamatwa kwa Lissu kwa mujibu wa Polisi Kanda
Maalumu ya Dar es Salaam ni matamko aliyowahi kuyatoa kipindi cha nyuma ambayo
ni ya uchochezi.
“Siwezi kutaja matamko ambayo yamesababisha tumkamate
nitataja wakati mwingine, lakini ifahamike tu kwamba matamko yake ya nyuma
yaliashiria uvunjifu wa amani, hivyo akimaliza kuhojiwa tutaweka wazi hatua
zinazofuata,’’ alisema Sirro na kuongeza:
“Ikiwa atapelekwa mahakamani nitaweka wazi na kama
ataachwa pia tutasema, kwa sasa hatuwezi kuingilia mahojiano yanayoendelea.”
Alisema Lissu alitoa maneno ya uchochezi ambayo haikuwa
lazima kukamatwa kwa wakati huo kabla uchunguzi haujakamilika.
Alipoelezwa kuwa Jeshi hilo lilimwita Lissu mwishoni mwa
mwaka jana na kumhoji kuhusu maneno aliyotoa wakati akizungumza na waandishi wa
habari kuhusu kupotea kwa msaidizi wa Mwenyekiti wa Chadema, Freeman Mbowe, Ben
Saanane, lakini likamwacha, alisema si kosa kumwacha na kumkamata tena.
“Ni kweli tulimwita Lissu alipozungumza na waandishi wa
habari kuhusu na kupotea kwa Saanane, ambapo alitoa kauli nyingi ikiwamo
kuhusisha Polisi na kutesa wananchi katika nyumba aliyodai kwamba ipo
Mikocheni, lakini tulimwacha sasa tumeamua kumwita tena na si kosa kufanya
hivyo,’’ alisema.
Kamanda Sirro aliongeza: “Sheria haikatazi mtu uliyemhoji
leo (jana) ukamruhusu akawa huru, usimkamate tena baada ya kufanya uchunguzi
wako, mtu anaweza kukaa uraiani hata miaka miwili baada ya kuhojiwa, lakini
baadaye akaja kukamatwa tena na kutiwa hatiani, inategemea uchunguzi ulifikia
wapi wakati huo.”
0 comments:
Post a Comment