Suleiman Msuya
 |
| Rais John Magufuli |
“HAKUNA umaarufu kwenye mapambano dhidi
ya matumizi ya na dawa za kulevya.”
Hiyo ni kauli ya Rais John Magufuli jana,
siku moja baada ya Waziri wa Habari, Utamaduni, Sanaa na Michezo Nape Nnauye
kuzungumza na waandishi wa habari kupinga utaratibu wa Mkuu wa Mkoa wa Dar es
Salaam, Paul Makonda kutaja majina ya wasanii, akiwatuhumu kwa dawa hizo.
Nape alitaka busara itumike katika
kuwakamata na kuwataja wasanii maarufu ili kuepuka kuwaharibia majina waliyojijengea
baada ya kazi yao ya muda mrefu.
Kauli ya Nape ilitokana na hatua ya Makonda
kutaja majina ya baadhi ya wasanii maarufu wa muziki na waigizaji nchini akiwamo
Wema Sepetu kuwa wanajihusisha na mihadarati.
Lakini jana wakati akizungumza jana
Ikulu, Dar es Salaam, Rais Magufuli alisema vita hivyo havina kisingizio
chochote kinachosababisha mtu aachwe kwa sababu ya umaarufu wake.
Rais ambaye ni Amiri Jeshi Mkuu wa
Majeshi ya Ulinzi na Usalama, alikuwa akiapisha wateule wake wanane akiwamo
Mkuu mpya wa Majeshi ya Ulinzi, Jenerali Venance Mabeyo.
Pamoja na Jenerali Mabeyo wengine walioapishwa
ni Mnadhimu Mkuu wa Jeshi la Ulinzi wa Wananchi wa Tanzania (JWTZ), Luteni
Jenerali James Mwakibolwa, Kamishna Jenerali wa Jeshi la Magereza, Dk Juma
Malewa na Mkurugenzi wa Makosa ya Jinai (DCI), Robert Boaz.
Wengine ni Katibu wa Tume ya Utumishi,
Nyakimura Mhoji, Balozi wa Tanzania nchini DR Congo, Paul Meela na Balozi wa
Tanzania nchini Ufaransa, Samwel Shelukindo.
Rais Magufuli alisema ni jukumu la kila
kiongozi wa chombo cha usalama kushirikiana na wasaidizi wake kupambana na dawa
za kulevya na isitokee mtu akaachwa kwa kisingizo cha umaarufu, cheo, uanasiasa,
uwaziri, mtoto wa kiongozi au mke wa kiongozi na kwamba hata kama ni mkewe
(Jannet) akihusika Polisi imkamate.
Alisema haingii akilini atokee mtu
atetee wauza dawa za kulevya ambao wanatekeza kizazi ambacho ni nguvukazi ya
Taifa.
Rais Magufuli alisema Lindi kuna tajiri
analindwa licha ya kuwapo ushahidi wa kutosha wa biashara hiyo na kumtaka Kaimu
Jaji Mkuu, Profesa Ibrahim Juma kusimamia mchakato huo kwa haki.
Alisema katika jambo la kushangaza, mtu
huyo wa Lindi ana watu wakubwa wanaomtetea jambo ambalo si jema, kwa kuwa
haiwezekani watu wadogo wafungwe huku wakubwa wakibaki mitaani.
“Napenda kutumia nafasi hii kukupongeza
Mkuu wa Jeshi la Polisi (IGP), Ernest Mangu kwa hatua uliyochukua ya kuwasimamisha
kazi watumishi walio chini ya mamlaka yako, kwani usingefanya hivyo, leo
usingekuwa IGP,” alisema.
Alisema ni wakati wa vyombo vya ulinzi
kuongeza nguvu bila kuonea mtu huruma na kuhakikisha wahusika wote wa biashara
hiyo wanakamatwa, ili utaratibu wa kisheria uweze kufanyika.
Rais Magufuli alivitaka vyombo hivyo
kuhakikisha kuwa operesheni hiyo inafanyika huku wakimtanguliza Mungu ili
kuepuka kuonea mtu.
“Hivi ni vita vikubwa Tanzania Bara na
Zanzibar, hivyo naomba mwongeze ushirikiano kwani bila hivyo hatuwezi
kufanikiwa,” alisema.
Alisema kizazi kinachoathirika kutokana
na matumizi ya dawa hizo kingeweza kusaidia nguvu kazi ya nchi na kuchochea maendeleo.
Aidha, Rais alisisitiza Mahakama
kutochelewesha kesi zenye ushahidi dhahiri kuhusu dawa za kulevya, ili
kuhakikisha wahusika wanatumikia kifungo.
Hadi jana Polisi ilishakamata watu 112 wanaotuhumiwa
kuhusika na dawa za kulevya na uchunguzi ulikuwa bado unaendelea.
Akizungumza juzi na waandishi Dodoma, Nape
alisema ni makosa kuwahukumu moja kwa moja kuwa wanajihusisha na biashara hiyo.
Alisema licha ya kuunga mkono juhudi za
kupambana na biashara na matumizi ya dawa za kulevya, busara inapaswa kutumika kuwabaini kwa sababu bado ni watuhimiwa.
“Ni muhimu kulinda haki ya mtuhumiwa,
jambo lenye mjadala ni busara inayotumika kushughulika na wahusika ili kusaidia
vyombo vingine kutaja wanaosambaza,” alisema.
“Tusiwahukumu kwa tuhuma maana wasanii
kujenga brand (umaarufu) ni kazi kubwa ili kubomoa jina, ni sekunde tu. Ni sawa
na kusema huyu kichaa, lazima jamii itamchukulia ndivyo sivyo.”
Februari 2, Makonda alitaja wasanii
kadhaa pamoja na askari polisi 12 kwa tuhuma za kuhusika na biashara ya dawa za
kulevya.
Mpaka sasa takribani wasanii saba
wameshahojiwa huku askari hao wakisimamishwa kazi kupisha uchunguzi dhidi yao.
Wasanii wanaochunguzwa kwa tuhuma hizo
pamoja na Wema ni Khalid Mohamed (TID), Dogo Hamidu, msanii wa filamu nchini na
Babuu wa Kitaa ambaye pia ni mtangazaji wa Televisheni ya Clouds.
Wengine ambao walitakiwa kufika kituo kikuu
cha Polisi kuhojiwa jana ni wasanii Vanessa Mdee na Tunda Sabasita.
Tangu kuibuka kwa sakata hilo, wadau wamekuwa
wakikosoa utaratibu uliotumika kwa maelezo kuwa wasanii hao wanahukumiwa kabla
ya uchunguzi kufanyika ili ibainike kama wanajihusisha na biashara hiyo ama la.
“Ni vizuri tukaangalia tunalifanya
katika namna ya kumlinda mtuhumiwa ili hata kama hausiki jina lake
lisiporomoke,” alisema Nape.
“Matumizi ya dawa za kulevya yanaathiri
wadau wetu ndiyo maana tumekuwa tukifanya juhudi za kuwasaidia kuwapeleka
katika vituo maalumu vya kuwasaidia kuondokana na matumizi ya dawa hizi.”
Mbunge huyo wa Mtama alisema licha ya
juhudi za kupambana na dawa za kulevya, kumekuwa na sintofahamu kuhusu sheria
ya dawa za kulevya kutosema chochote kwa anayetumia.
Alisema wapo watu wa kada mbalimbali
wanaotumia dawa za kulevya, lakini wasanii wanaonekana zaidi kwa kuwa ni
maarufu na kubainisha jinsi Serikali kupitia wizara yake inavyowasaidia
kuondokana na matumizi ya dawa za kulevya, akiwamo msanii Rehema Chalamila ‘Ray
C’.
“Matumizi ya dawa za kulevya ni tatizo
la jamii nzima, mapambano lazima yaanzie kwenye familia zetu. Hawa watu
wanahitaji msaada kama ilivyo kwa wagonjwa wengine,” alisema Nape.
Alipoulizwa nini suluhisho la utaratibu
unaotumika kuwataja na kuwahusisha moja kwa moja wasanii na biashara hiyo
alisema, “tuache jamii ijadili.”
0 comments:
Post a Comment