*Ni baada ya kukataa kurusha kipindi chake
*Yapendekezwa Mamlaka imchukulie hatua
Celina Mathew na Abraham Ntambara
 |
| Nape Nnauye |
KAMATI ya Waziri Nape Nnauye ya kuchunguza uvamizi wa
kituo cha Clouds Media, imebaini kwamba Mkuu wa Mkoa wa Dar es Salaam, alitumia
tuhuma za dawa za kulevya kutisha wafanyakazi wa kituo hicho.
Kwa mujibu wa taarifa ya Tume hiyo kwa Waziri Nape jana,
iliyosomwa na mjumbe Deodatus Balile, usiku wa uvamizi wake Mkuu wa Mkoa, Paul
Makonda aliwalazimisha wafanyakazi hao kurusha kipindi chake, vinginevyo
angewaingiza kwenye tuhuma hizo.
“Baada ya hapo aliwatisha kuwa yote yaliyotokea usiku ule
yabaki pale pale ndani … palikuwa na vitisho kwa walinzi na wafanyakazi kwa
kutumia askari wenye silaha,” ilisema taarifa.
Aidha, ilibainisha kwamba Mkuu wa Mkoa aliwatishia watangazaji
wa kituo hicho kuwaweka ndani kwa miezi sita bila kufikishwa mahakamani, iwapo
wangetoa taarifa hizo nje na kuwaunganisha wadhamini wa kipindi hicho kwenye
tukio tuhuma za mihadarati.
Kubainika kwa tabia hiyo kwa Makonda kunaweza kuhusishwa
na hatua yake ya kutaja hadharani majina ya watu aliodai wanajihusisha na
biashara ya dawa za kulevya mapema Februari.
“Makonda aliwatishia watangazaji wa Clouds kuwa endapo
wangetoa taarifa hizo nje angewafunga kifungo cha miezi sita jela au
kuwahusisha na tuhuma za dawa za kulevya, pia wadhamini wa kipindi
wangeunganishwa kwenye tukio hilo,” alisema Balile.
Alisema kabla ya kumhoji Mkuu wa Mkoa, Machi 20 walifanya
mahojiano na wafanyakazi wa Clouds na kujumuisha waliokuwa kazini pamoja na
viongozi wao.
Alieleza kuwa pia walifanyia uchunguzi picha za kamera za
CCTV ambazo zilisambaa kwenye mitandao ya kijamii, uchunguzi uliofanywa kuanzia
saa 3 asubuhi hadi saa 4 usiku.
Alisema Machi 21 saa 5.10 walifika ofisini kwa Makonda
ambako waliambiwa yuko ofisini na ilipofika saa 6.30 walipoambiwa wamfuate
ofisini, na wakati wakipanda ngazi, kiongozi huyo aliwakimbia kwa kupitia
mlango wa nyuma.
Matokeo
Balile alisema baada ya Kamati kuchunguza kwa kina
ilibaini kuwa siku ya tukio, Machi saa 4.30 usiku, Makonda alifika ofisi za
Clouds akiendesha gari namba T553 DFH akifuatana na askari wenye silaha za
moto.
Alisema lengo lilikuwa ni kushinikiza kurushwa kwa
kipande cha video katika kipindi cha De Weekend Chat Show ‘Shilawadu’ ambacho
kilikuwa na kashfa dhidi Askofu wa Kanisa la Ufufuo na Uzima, Josephat Gwajima.
Maoni
Alisema Kamati ilibaini kuwa kitendo alichofanya Mkuu wa
Mkoa kina viashiria vya uvunjifu wa sheria za nchi hususan za utangazaji na
huduma za habari.
Aidha, alisema pia ilibaini kuwa Mkuu wa Mkoa hatambui
madaraka makubwa aliyonayo na kujikuta akiyatumia vibaya katika mazingira yasiyostahili.
Pia alisema walibaini kuwa uongozi wa Clouds unastahili
pongezi kwa kusimamia misingi, sheria na maadili ya uandishi wa habari kwa kukataa
kurusha habari isiyo na mizania.
Mapendekezo
Kuhusu mapendekezo Kamati ilitaka Makonda aombe radhi
wafanyakazi wa Clouds Media Group na vyombo vya habari kwa ukiukwaji wa usalama
na maadili ya vyombo vya habari.
Pia katika kulinda maslahi ya tasnia ya habari, Kamati
ilimtaka Waziri wa Habari, Sanaa, Utamaduni na Michezo ambaye ndiye mwenye
dhamana, kuwasilisha malalamiko rasmi ya wanahabari dhidi ya Makonda kwa
mamlaka ya uteuzi ili imchukulie hatua stahiki.
Kadhalika vyombo vya Dola vianzishe uchunguzi wa ndani
dhidi ya askari walioingia na silaha kwenye kituo hicho, ili kudhibiti matukio ya
aina hiyo yasijirudie siku za usoni.
Aidha, Kamati iliitaka Clouds Media ipitie upya miongozo,
kanuni, sheria na taratibu zinazoongoza shughuli za utangazaji na kuangalia njia
bora za udhibiti wa watu wanaoingia ovyo ndani ya ofisi zake na kujipa majukumu
yasiyowahusu.
Nape
Baada ya kukabidhiwa ripoti hiyo, Nape aliahidi
kuiwasilisha kwa viongozi wake wa juu ambao ni Rais John Magufuli, Makamu wa Rais
Samia Suluhu Hassan na Waziri Mkuu, Kassim Majaliwa ambao ndio watatoa uamuzi.
Alikiri kuwa kazi haikuwa ndogo, kwa kuwa ilihusisha
tukio la kihistoria ambalo halijawahi kutokea nchini huku akiwataka wananchi kuwa
na tabia ya uvumilivu wakati uchunguzi ukifanyika.
“Wakati uchunguzi unafanyika, kuna watu walikuwa wakipiga
simu sana na wengine wakizungumza maneno hivyo nawaomba Watanzania tujenge
utaratibu wa kuvumiliana na kuaminiana, tukiri kwamba sisi ni binadamu kunaweza
kuwepo udhaifu, hivyo unapojitokeza inabidi tuvuliane, maana udhaifu si tope kwa
viongozi wote,” alishauri.
Tume yalaani
Tume ya Haki za Binadamu na Utawala Bora (THBUB) imelaani
kitendo cha Makonda kuvamia ofisi za Clouds Media Group.
Aidha, imesema kitendo hicho kinapingana na ibara ya 18
ya Katiba ya nchi ya mwaka 1977 inayolinda uhuru wa maoni na mawasiliano.
Kwa mujibu wa taarifa iliyotolewa jana kwa vyombo vya
habari na Mwenyekiti wa Tume hiyo, Bahame Nyanduga ni jambo ambalo pia
linalindwa na ibara ya 19 ya mkataba wa kimataifa wa haki za kiraia na kisiasa
wa mwaka 1966 na ibara ya 9 ya mkataba wa Afrika wa haki za binadamu na watu ya
mwaka 1986.
“Tume imepitia sheria kadhaa ikiwamo ya tawala za mikoa
sura ya 97 ya sheria za Tanzania na imebaini kwamba hakuna sheria inayomruhusu
Mkuu wa Mkoa kuchukua hatua za uvamizi kama alivyofanya Makonda,” alisema Nyanduga.
Alisema hatua ya kuvamia kituo hicho akiambatana na
askari wenye silaha ni kitendo kisichojali wala kuheshimu utawala wa sheria na haki
za binadamu.
Nyanduga alisema ni kitendo cha kujichukulia sheria
mkononi na kisichokubalika katika jamii au nchi ya kidemokrasia.
Ili kulaani kitendo hicho, Tume ilishauri Makonda akiri
kuwa kitendo hicho ni uvunjifu wa haki za msingi za waandishi wa habari na
uhuru wa vyombo vya habari.
Aliongeza kuwa kitendo cha kuvamia ofisi hiyo kwa kutumia
askari wa Polisi kwa maslahi binafsi hakiendani na utawala wa sheria na hivyo
Makonda amelidhalilisha Jeshi hilo na hivyo si budi awaombe radhi Watanzania.
Malalamiko
Wakati huo huo, Meya wa Manispaa ya Ubungo Boniface Jacob
amewasilisha malalamiko matano kwa Tume ya Maadili inayosimamia uwajibikaji kwa
viongozi wa umma dhidi ya Makonda.
Akiwasilisha malalamiko hayo kama mwananchi wa kawaida
jana, alisema hatua hiyo inakuja baada ya kupokea maoni ya wabunge zaidi ya 40
ambao wengi wao ni wa CCM waliompigia simu kumwomba aondoe shauri hilo
mahakamani na badala yake apeleke kwa Tume hiyo ili waweze kumjadili bungeni.
“Wabunge wengi walionipigia ni wa CCM, wakisema wana hamu
ya kumchambua Makonda, hivyo kwa kuwa Tume haina haki ya kumwondoa mtu kwenye
uongozi hapana budi kusubiri majibu yake,” alisema.
Alitaja malalamiko hayo kuwa ni pamoja na vyeti vyake
ambapo wakihitajika walimu na wanafunzi wataletwa, matumizi mabaya ya madaraka,
namna ambavyo anatumia watuhumiwa kujipatia mali, ukiukwaji wa matumizi mabaya ya
ofisi za umma kwa kudhalilisha watu kwa kuwataja majina na kupokea zawadi bila
kutangaza.
“Tunaamini kwamba Tume itasaidia, maana umma unalalamika lakini
viongozi wa juu wanamwogopa Makonda wakati ni mtumishi wa kawaida, Waziri Mkuu
amekosa uthubutu hivyo tunataka kujua kama Jaji Mkuu naye anamwogopa,” alisema.
Jacob aliongeza kuwa inawezekana Rais John Magufuli alitaka
vitu ambavyo havizungumzwi kwenye mitandao na badala yake waende kulalamika
kwenye Tume husika, jambo ambalo amelifanya.
Alifafanua kuwa alichofanya ni namna Rais alivyomwagiza
na kueleza mwavuli aliotumia Makonda wa kusema anapambana na dawa za kulevya,
si kweli maana vita hivyo vilianza muda mrefu na anavitumia kuficha maovu yake.
Jacob alimkabidhi Msaidizi wa Kamishna wa Maadili, Dora
Mgeta nakala za picha nne na kadi za magari na ambaye alimwahidi Jacob kuwa
malalamiko hayo yatajibiwa
kwa barua.
0 comments:
Post a Comment