Suleiman Msuya
MKUU wa Mkoa wa Dar es Salaam Paul Makonda ametangaza
siku ya Oktoba mosi mwaka huu itakuwa siku ya kupanga miti katika mkoa wake
ambapo vyombo vya usalama vitashiriki.
Makonda aliyasema hayo jana katika mkutano wa 14 wa
wahandisi nchini ikiwa ni siku moja baada ya Chama Cha Demokrasia na Maendeleo
(Chadema), kutangaza kuahirisha maandamano na mikutano nchi nzima Oktoba mosi
iwapo hakutakuwa na muafaka kati ya viongozi wa dini na Rais John Magufuli
kuhusu madai yao ya kutaka kufanya mikutano.
Chadema ilikuwa imetangaza kufanya maandamano na mikutano
kupitia kivuli cha Umoja wa Kupambana na Udikteta Tanzania (Ukuta), Septemba
mosi ila waliahirisha kwa madai kuwa wameombwa na viongozi wa dini ili wamuone
rais.
Alisema baada ya jana kufanya usafi kwa kushirikiana na
Jeshi la Wananchi Tanzania (JWTZ), ikiwa ni maadhimisho ya miaka 52 ya jeshi
hilo aliona ni vema wakaanzisha kampeni ya upandaji miti katika mkoa huo.
“Ndugu zangu wahandisi mimi nimejipanga kushirikiana
nanyi na katika kuonesha hilo Oktoba mosi itakuwa siku ya kupanda miti Dar es
Salaam ambayo itabeba kauli mbiu ya ‘mti wangu’,” alisema.
Aidha, alitumia mkutano huo wa wahandisi kuwaomba kufanya
mijadala ya kitaaluma na kuwa vyombo vya usalama vitawapatia ulinzi na kuwa
hataruhusu mikutano na malumbano yasiyo na tija.
Mkuu huyo wa mkoa alisema wananchi wa Dar es Salaam
wanapaswa kufanya kazi na kuachana na tabia ya kuzurura kwani hawatawavumilia.
Baada ya kauli hiyo baadhi ya washiriki wa mkutano huo
walisikika wakinung’unika kwa kudai kuwa upo uwezekano wa Serikali kupata
mtikisiko wa Ukuta jambo ambalo linasababisha kupanga matukio yanayogongana na
mipango ya Chadema.
“Naona sasa kila kukicha jamaa wanateseka hali ambayo
inawalazimu kila linalopabgwa na Chadema nao wanapanga kufanya jambo sidhani
kuwa huu ndio uongozi unaotakiwa,” alisema.
0 comments:
Post a Comment