Katika kesi hiyo, aliyekuwa Mkuu wa Upelelezi wa Mkoa wa Dar es
Salaam (RCO), AbdallahZombe na wenzake wawili, wamenusurika baada ya upande wa mashitaka
kushindwa kuthibitisha makosa dhidi yao.
Hukumu hiyo ilitolewa jana Dar es Salaam na jopo la majaji watatu;
Bernard Luanda, Sauda Mjasiri na Semistocles Kaijage na kusomwa na Msajili wa
Mahakama ya Rufaa, John Kahyoza.
Mauaji
Akisoma hukumu hiyo, Kahyoza alisema baada ya kupitia hoja kwenye
hukumu ya Mahakama Kuu iliyowaachia huru washitakiwa hao, majaji hao walimwona Bageni
kuwa alihusika kwenye mauaji ya watu wanne, hivyo Mahakama ya Rufaa ikatengua
uamuzi wa kuachiwa huru kwa bosi huyo.
Jopo hilo lilieleza kuwa baada ya kupitia kwa makini ushahidi uliotolewa
na utetezi wa Bageni, ilionesha wazi kuwa alitoa kibalicha wafanyabiashara hao
kupelekwa kwenye msitu wa Pande, Mbezi, Dar es Salaam.
Pia jopo hilo lilieleza kuwa mazingira ya ushahidi na utetezi wa
Bageni, yanaonesha kuwa alishuhudia mauaji hayo, baada ya Mahakama hiyo
kujiuliza swali, la kwa nini aliamuru wafanyabiashara hao wapelekwe sehemu
ambayo haina nyumba, kama hakukuwa na lengo la kutekeleza mauaji hayo.
Akiendelea kusoma hukumu hiyo, Kahyoza alisema Bageni pia
aliidanganya Mahakama kuwa tukio hilo lilitokea Sinza, wakati wakirushiana
risasi na wafanyabiashara hao, kwa madai kuwa ni majambazi na ramani ya tukio hilo
ikachorwa.
Hata hivyo, alisema walibaini kwamba kulikuwa na jambo ambalo
Bageni alilificha kwa sababu yeye na mashahidi wake wengine wawili,
waliidanganya Mahakama kuwa tukio hilo lilitokea Sinza.
“Mahakama imetengua kuachiwa huru kwa Bageni, baada ya kupatikana
na hatia katika makosa manne, ambapo katika kosa la kwanza la mauaji ya watu
wanne, adhabu yake ni kunyongwa hadi kufa,” alisema Kahyoza.
Baada ya kusema hayo, askari wanne walimzunguka Bageni na kumkamata
kwa kumweka chini ya ulinzi ndani ya chumba hicho na baada ya muda kidogo
alipelekwa mahabusu.
Zombe
Kwa upande wa Zombe, Ahmed Makelle na Koplo Rajabu, jopo hilo
lilisema wakatiwa rufaa
hao hawakupatikana na hati
ya kulinda wauaji kwa sababu upande wa mashitaka, ulishindwa kuthibitisha
hilo.
Pia walieleza kuwa hawawezi kuwatia hatiani wakatiwa rufaa hao, kwa
sababu aliyeua hajahukumiwa, kwa sababu mtu anayetajwa kuwa muuaji, hakupata
kukamatwa wala kushitakiwa na kati ya wakatiwa rufaa waliokuwa mbele yao,
muuaji hakuwapo.
“Hakuna ushahidi wa moja kwa moja, kuonesha kuwa Zombe alishiriki
mauaji, kwa hiyo Mahakama inatupilia mbali rufaa hiyo na kuwaacha huru,”
alisema Kahyoza kwa niaba ya jopo.
Hata hivyo, jopo hilo lilieleza kuwa Zombe ana kitu kichwani mwake
ambacho anakijua. Hukumu hiyo ilianza kusomwa saa 3:49 asubuhi hadi saa 5:14,
na ilipofika saa 4, Kahyoza alimwita msaidizi wake na kumnong’oneza kisha mtu
huyo kutoka nje.
Baada ya muda kidogo, waliingia askari wawili jambo lililoshangaza
watu mahakamani humo, huku ndugu na jamaa wakishusha pumzi na kusababisha
minong’ono ya chini kwa chini kutokana na kutojua nini kinaendelea.
Awali, DPP alifanya mabadiliko katika rufaa yake na kumwondolea
Zombe kosa la mauaji na kutaka ahukumiwe kwa kuhifadhi wahalifu.
Mkurugenzi huyo alifikia uamuzi huo, baada ya kujiridhisha kuwa
hakuna ushahidi wa kumtia hatiani Zombe kwa mauaji.
Katika rufaa hiyo, DPP alidai kuwa Jaji Salum Massati alikosea
kuwaacha huru washitakiwa hao, kwa sababu kulikuwa na ushahidi wa kutosha
kuwatia hatiani wote.
Katika kesi ya msingi, ilidaiwa kuwa Januari 14, 2006, katika msitu
wa Pande, Mbezi Luis, Zombe na wenzake waliwaua kwa makusudi wafanyabiashara watatu
wa madini kutoka Morogoro, Mathias Lunkombe, Sabinus Chigumbi na ndugu yake
Ephrahim Chigumbi na dereva teksi, Juma Ndugu.
Nje ya Mahakama
Baada ya hukumu kutolewa vilio vilitawala kwenye viunga vya
Mahakama hiyo huku aliyedaiwa kuwa mke wake, akilia huku akimlaumu mumewe kwa kufika
mahakamani.
Zombe alionekana kupongezwa na ndugu na jamaa kwa kumkumbatia na
kumpa pole tangu apate matatizo hayo ya kesi hadi jana, alipoachwa kwa rufaa
iliyokatwa na Jamhuri.
Pia kulitokea tukio lingine la kusikitisha ambapo mwanamke aliyedaiwa
ndugu wa Bageni alionekana akikimbia hovyo kama mtu aliyerukwa na akili. Hata
hivyo haikufahamika mara moja kiini cha hali ile.
0 comments:
Post a Comment