BANDARI ya Dar es Salaam inatarajia kutumia dola milioni
690 sawa na Sh bilioni 145 kwa ajili ya kufanyiwa maboresho, imeelezwa.
Akizungumza na baadhi ya wahariri wa vyombo vya habari
Dar es Salaam hivi karibuni, Mkurugenzi Mkuu wa Mamlaka ya Usimamizi wa Bandari
Tanzania (TPA), Deusdedit Kakoko alisema sehemu ya fedha hizo itatokana na mkopo
nafuu.
Alisema maboresho hayo yanatokana na uchakavu wa
miundombinu ya bandari hiyo, pamoja na kina kifupi cha maji ambacho ni meta
tisa na ufinyu wa lango la kuingilia meli lenye upana wa meta 140.
“Lango hili linaruhusu meli za urefu wa usiozidi meta 243
tu meli kubwa kuzidi hapo haziwezi kuingia, hivi sasa meli zinazotengenezwa duniani
huko ni kubwa tu na ndizo zinazotakiwa kutia nanga hapa hivyo kwa lango hili
hazitaingia,” alisema.
Akifafanua kuhusu mkopo huo, Kakoko ambaye ni Mhandisi
alisema Benki ya Dunia kupitia mfuko wa Benki ya Kimataifa ya Ujenzi na
Maendeleo (IBRD) itatoa dola milioni 600.
Shirika la Maendeleo la Uingereza (DFID) litatoa ruzuku
ya dola milioni 30 huku TPA yenyewe ikichangia dola milioni 60.
Miradi itakayohusika na mkopo huo, Kakoko aliitaja kuwa
ni uboreshaji na uongezaji kina kufikia meta 14 kuanzia gati namba moja hadi
saba na nane hadi 11 sambamba na kujenga gati mpya namba 13 na 14.
Mingine ni ya ujenzi wa gati mpya ya kushushia magari
eneo la Gerezani Creek, uchimbaji wa kuongeza kina cha lango la kuingilia meli
hadi meta 14 na sehemu ya kugeuzia meli na kupanua lango.
Kakoko alisema pia wanatarajia kufunga mfumo wa kushusha
mizigo kwa mkanda na kujenga maghala ya kuhifadhia nafaka na kuhamisha gati na
mabomba ya mafuta ya KOJ.
Mtandao wa reli ndani ya bandari hiyo utajengwa na mwingine
kuboreshwa ikiwa ni pamoja na kujenga sehemu ya kupakilia na kushushia mizigo
kwenye mabehewa.
Hali kadhalika aliwambia wahariri hao kuwa jengo la
ghorofa lililoko barabara ya Sokoine ambako kutakuwa na kituo kimoja cha huduma
kwa wateja, litakamilishwa hivi karibuni na kuanza kazi.
“Pia tutaboresha na kupanua barabara ya Bandari na
Mivinjeni ili kupunguza msongamano wa magari ya mizigo yanayoingia na kutoka
bandarini,” alisema huku akizungumzia pia uimarishaji wa usalama na kuongeza
mitambo ya kukagulia mizigo bandarini hapo.
Lakini pia alisema ili kupunguza usumbufu kwa wateja
mfumo wa Teknolojia ya Habari na Mawasiliano (TEHAMA) utaboreshwa ili kurahisisha upakiaji na upakuaji mizigo
na malipo ya huduma za bandari kwa elektroniki.
0 comments:
Post a Comment